Azərbaycan beynəlxalq dialoq platforması kimi faktiki olaraq bütün dünyada qəbul olunub.
Bu sözləri Axar.az-a açıqlamasında analitik Elçin Mirzəbəyli Rusiya Silahlı Qüvvələrinin Baş Qərargah rəisi Valeri Gerasimovla NATO-nun Avropada Müttəfiq Qüvvələrinin Ali Baş Komandanı (SACEUR) Körtis Skaparottinin Bakı görüşünə münasibət bildirərkən deyib. O bildirib ki, bundan əvvəl də Rusiya və Qərb generallarının Bakıda görüşləri keçirilib:
"Yenə də iki böyük güc mərkəzinin rəhbərləri Bakıda görüşür. Şübhəsiz ki, bu, önəmli hadisədir. Xüsusilə NATO ilə Rusiya arasında ciddi ziddiyyətlərin olduğu bir zamanda belə bir görüşün növbəti dəfə Bakıda keçirilməsi Azərbaycanın beynəlxalq danışıqlar üçün ideal mərkəz olduğunun sübutudur. Bu, bir daha ölkəmizin nə dərəcədə önəmli coğrafi mövqeyə, siyasi nüfuza malik olduğunu təsdiqləyir”.
Analitikin sözlərinə görə, adətən belə görüşlərdə siyasi qərarlar qəbul olunmur:
"Çünki hər iki tərəfin nümayəndəsi hərbi kəsimi təmsil edir. Hərbi kəsim isə o zaman qərarları yerinə yetirir ki, bu barədə siyasi iradə olsun. İndiki şəraitdə çox güman ki, tərəflər Yaxın Şərqdəki, Suriyadakı davranışlarını razılaşdıracaqlar. Siyasi münasibətlər hətta kəskin olanda da Rusiya ilə ABŞ və NATO arasında hərbi müstəvidə dialoq pəncərəsi hər zaman özünü qoruyub saxlayıb. İndiki şəraitdə də əməliyyatlar zamanı tərəflərin daha az zərər çəkməsi və əməliyyatların koordinasiyası ilə bağlı məsələlər müzakirə olunacaq”.
Analitik belə görüşlərin Bakıda keçirilməsinin səbəblərindən biri kimi Azərbaycanın neytral mövqeyini göstərib:
"Burada Bakının beynəlxalq müstəvidə neytral ölkə mövqeyini qoruyub saxlaması da önəmli rol oynayır. Digər faktor isə hər iki tərəflə Azərbaycanın münasibətlərinin kifayət qədər yaxşı olmasıdır. Eyni zamanda, Azərbaycandakı təhlükəsiz mühit belə görüşlərin keçirilməsini əlverişli edir”.
Qeyd edək ki, bu gün Rusiya Silahlı Qüvvələrinin Baş Qərargah rəisi Valeri Gerasimov və NATO Birləşmiş Qoşunlarının Baş komandanı Körtis Skaparottinin Bakı görüşü olacaq. Generallar birlikdə Prezident İlham Əliyevlə görüş keçiriblər.
Xəbərdən istifadə edərkən istinad etmək vacibdir.
