Ermənistan sərsəm xəyallarından əl çəkməsə, nəticə özünü çox gözlətməyəcək və Azərbaycan hərbi gücündən istifadə edəcək.
Bu sözləri Axar.az-a Prezident İlham Əliyevin iftar mərasimindəki nitqini şərh edən millət vəkili Elman Məmmədov deyib. Onun sözlərinə görə, Prezidentin Qarabağla bağlı son mesajları təkcə Paşinyana deyil, bütün dünya ermənilərinə, onlara lobbiçilik edən dövlət və qurumlara ünvanlanıb:
"Dövlət başçısı erməniləri xam xəyallardan, işğalçılıq siyasətindən əl çəkməyə çağırıb. Ermənistan inkişaf etmək üçün ilk növbədə Azərbaycan və Türkiyə ilə normal münasibətlər qurmalıdır. Bunun üçün isə erməni qoşunları işğal etdikləri ərazilərimizi dərhal boşaltmalı və Türkiyəyə qarşı ərazi iddialarından əl çəkməlidirlər. Ermənilər yalnız bu halda normal bir dövlət kimi inkişaf edə bilərlər. Ermənistan sərsəm xəyallarından əl çəkməsə, nəticə özünü çox gözlətməyəcək. Yəni İrəvan Bakının təklifinə müsbət cavab verməsə, Azərbaycan mövcud hərbi gücündən istifadə edib torpaqlarını işğaldan azad edəcək”.
Millət vəkili bildirib ki, ermənilər hazırda dalana dirənmiş vəziyyətdədir:
"Ermənistanda hakimiyyətdə kimin olmasının elə də önəmi yoxdur. Əsas məsələ erməni xəstəliyinin müalicə olunmasıdır. Ermənilərin ərazi iddiası nəinki bütün qonşularına qarşı, hətta Rusiya, Gürcüstan və İrana kimi gedib çıxır. Əgər İrəvan işğalçılıq siyasətindən əl çəkməsə, bütün iqtisadiyyatı inhisarda olan və xaricdən yönləndirilən Ermənistan bundan da pis günə düşəcək. Çünki diplomatiyasi və siyasəti iflasa uğramış, inqilablar və dövlət çevrilişləri ərəfəsində yaşayan Ermənistanın vəziyyəti getdikcə çətinləşir”.

Xəbərdən istifadə edərkən istinad etmək vacibdir.