Xeberle.com-a verilən məlumata görə, Sumqayıt Bələdiyyəsində keçirilən görüşdə bələdiyyələrarası əlaqələrin inkişaf etdirilməsi, təcrübə mübadiləsi istiqamətində əməkdaşlıq imkanları müzakirə edilib.

Sumqayıt Bələdiyyəsinin sədri Sultan Əsədov son illər şəhərdə aparılan abadlıq- quruculuq işlərindən, bələdiyyənin həyata keçirdiyi layihələrdən danışıb. S.Əsədov şəhərin xüsusilə son üç ildə tamamilə yeniləndiyini, iri infrastruktur layihələri həyata keçirildiyini və Sumqayıtın hətta xarici investorlar üçün də cəlbedici, müasir bir şəhərə çevrildiyini qeyd edib.

Sumqayıt Şəhər İcra Hakmiyyətinin başçısının birinci müavini Teymur Səmədov Azərbaycanın sürətli sosial-iqtisadi inkişafını vurğulayaraq bildirib ki, ölkəmiz artıq dünyada sabitlik adası kimi tanınır. Sumqayıtın da bu dinamik inkişafın bir parçası olduğunu diqqətə çatdıran T.Səmədov qeyd edib ki, son 3 ildə şəhərdə çox sayda sosial, eləcə də sənaye müəssisələri fəaliyyətə başlayıb. 8 ay ərzində şəhərdə salınmış bulvar prezident İlham Əliyev tərəfindən "Möcüzə" adlandırılmışdı. Təsadüfi deyil ki, Sumqayıt Bulvarı ötən ilin iyul ayında Madriddə "İnternational Award for Excellence & Lider ship" (beynəlxalq üstünlük və liderlk) mükafatına və oktyabrda isə Parisdə "Global Trade Leaders” klubunun "Keyfiyyətə görə Beynəlxalq Avropa mükafatı”na (International Europe Award for Quality) və layiq görülüb.

Qonaqlar Azərbaycanın dinamik inkişafı barədə məlumatlı olduqlarını, Sumqayıtın da bu cür sürətlə inkişaf etməsinin cəlbedici göründüyünü, bələdiyyələr və iki ölkənin sahibkarları arasında əlaqələrin qurulmasında maraqlı olduqlarını bildiriblər.

Nümayəndə heyətinə Bosniya və Herseqovinanın Novi Qrad Sarayeva Bələdiyyəsinin sədri Semir Efendic, Olovo Bələdiyyəsinin sədri Demal Memagic və bir qrup iş adamı daxildir.

Görüşdə Türk Dünyası Bələdiyyələr Birliyinin Baş katibi Fəxri Solak iştirak edib.