İran İslam Respublikası statistikasına görə, 2014-cü ilin İran təqvimin 7 ayının nəticələrinə əsasən, Azərbaycandan idxal edilən məhsulun dəyəri 13,7 milyon dollar (+1,4%), Azərbaycana ixrac edilən məhsulun dəyəri isə 279,3 milyon dollar olub (-8,9%). Öz növbəsində Azərbaycan Gömrük Komitəsinin məlumatına əsasən, 2014-cü ilin 9 ayında Azərbaycandan İrana ixracın həcmi 28,4 milyon dollar, İrandan idxalın həcmi isə –115,5 milyon dollar təşkil edib.

İranla ticarət dövriyyəsinin həcmi 2012-ci ildə 500 milyon dollar olmuşdusa, 2013-cü ildə bu göstərici 20%-dən çox azalmağa doğru meyl etmişdi.

İranla ticarət əlaqələrinin azalmasına çox güman ki, Qərbin qoyduğu maliyyə və bank əməliyyatları sanksiyaları da öz təsirini göstərmişdir.

Qazaxıstan Xəzər regionunda hazırda Azərbaycanın ikinci ticarət tərəfdaşıdır. 2014-cü ilin 9 ayında Azərbaycan Stakomun məlumatına görə, Azərbaycanla Qazaxıstan arasında ticarət dövriyyəsi 34,3% azalib. Azərbaycandan ixrac 23,3 milyon dollar (-41%), idxal isə –166,1 milyon dollar olub (33%).

Qeyd edək ki, Azərbaycanla Qazaxıstan arasında ticarət dövriyyəsinin həcmi 2013-cü ildə 371 milyon dollar 2012-ci ildə isə 390 milyon dollar təşkil etmişdi.

Türkmənistanla Azərbaycan arasında ticarət dövriyyəsinə dair son məlumatı bu il oktyabrın əvvəlində baş nazirin birnci müavini Yaqub Eyyubov hökumətlərarası komissiyanın iclasında səsləndirmişdi. Onun sözlərinə görə, 2013-cü ildə iki ölkə arasında ticarət dövriyyəsinin həcmi 82,3 milyon dollar olub. Cari il üçün hər hansı bir rəqəm bu iclasda mətbuat üçün açıqlanmayıb. Müqayisə üçün onu demək olar ki, 2008-ci ilin 9 ayının yekunlarına görə, iki ölkə arasında ticarət dövriyyəsi 488,6 milyon dollara çatmışdı. Bu o il idi ki, hər iki ölkənin dövlət başçıları qarşılıqlı səfərlər etmiş, iki ölkə arasında münbit iqtisadi əlaqələr yaranmağa başlamışdı. Ancaq sonradan birdən birə rəsmi Aşqabadın Bakını Xəzərin hüquqi statusu həllini tapmamış neft yataqlarını işləməyə görə Beynəlxalq İqtisadi Məhkəmə ilə hədələməsi ilə bu əlaqələr soyudu və təbii ki, iqtisadiyyatda da özünü göstərdi.

Rusiya Azərbaycanın Xəzəryanı ölkələr içərisində bir nömrəli ticarət tərəfdaşıdır. Cari ilin 9 ayının yekunlarına görə, Azərbaycanın Rusiya ilə ticarət dövriyyəsi 1,368 milyard dollar təşkil edib ki, bunun da cəmi 470,262 milyon dolları ixracın payına düşüb. Başqa sözlə, Rusiyaya ixrac Azərbaycanın ümumi ixracatında olan payının 2.7%-ni təşkil edib. Sözügedən dövrdə Rusiyadan idxal həcmi 897,794 milyon dollar olub ki, bu da Azərbaycanın ümumi idxalınin 13,8%-nə bərabərdir.

Xatırladaq ki, Azərbaycanın 2013-cü ildə Rusiya ilə ticarət dövriyyəsi 2,583 milyard dollar (1,505 milyard dollar – idxal) olub. O zaman Azərbaycanın 14,1% ümumi idxalı bu ölkənin payına düşüb. Həmin il Rusiyadan idxal 9% artıb.

2012-ci ildə isə iki ölkə arasında ticarət dövriyyəsi 2,338 milyard təşkil etmişdi ki, bunun da 1,378 milyardı idxalın payına (ümumi idxalda xüsusi çəkisi 14,3%) düşmüşdü.(axar.az)