Postsovet məkanına nəzarəti bərpa etməyə tələsən Kreml yalnız bircə yolu məqbul sayır - hərbi ekspansiya; Donbasdakı qanunsuz seçkilər Putinin neo-imperiya ambisiyalarını şiddətləndirib; Rusiya ölkəmizə müdaxiləyə hazırlaşır?..
Ukraynada bir həftənin içərisində reallaşan iki seçki - ümumölkə parlament seçkiləri (26 oktyabr) və separatçı bölgədə reallaşdırılan qanunsuz səsvermə (2 noyabr) regiondakı böhranın xarakterini əhəmiyyətli dərəcədə dəyişib. Əgər qərbyönlü qüvvələrin qələbəsi ilə yekunlaşan parlament seçkiləri Maydan inqilabını legitimləşdirib Rusiyanın bu ölkəyə "qanuni müdaxilə” imkanlarını sıfıra endirdisə, Donbasdakı "seçkilər” Kremlin separatçı bölgəyə hərbi müdaxiləsi üçün müəyyən legitim bəhanə yaradıb.
Kremlin saxta seçkiləri tanıması, şübhə yox ki, parlament seçkilərində rusiyayanlı qüvvələrin acınacaqlı şəkildə uduzmasına və Ali Radaya düşməməsinə onun cavabı idi. Ancaq analitiklərə görə, bu cavabın davamı da olacaq. Növbəti mərhələdə "Krım ssenarisi” bütün gücü ilə işə salına bilər, özü də daha aqressiv şəkildə. Çünki Donbas Moskva üçün postsovet məkanı uğrunda mübarizədə uğur əldə eləməkdə Qərbə qarşı son və həlledici savaşın ön cəbhəsi anlamındadır.
Öncələrdə yazdığımız kimi, Azərbaycan da daxil, Güney Qafqazın taleyi məhz Ukraynadakı böyük geosiyasi savaşın nəticəsindən asılı olacaq. Putinə bu savaşı udmaq olduqca vacibdir, çünki neo-imperiya planları, Avrasiya layihələri müstəsna olaraq ondan asılıdır. Bunu indi beynəlxalq sanksiyaların təsiri altında rus rublu ilə birgə Putinin özünün də aydan-aya enən reytinqi diktə edir...
Ukraynada geosiyasi müharibə Moskvanın xeyrinə başa çatsa, onda tarixi zəfərdən ruhlanan Putinin növbəti hədəfi yüzdə yüz Güney Qafqaz, daha doğrusu onun açar ölkəsi olan, "Qafqazın Ukraynası” sayılan Azərbaycan olacaq. Postsovet məkanına nəzarəti bərpa etməyə tələsən Kremlin isə müstəsna olaraq bir "sınanmış” yolu var - hərbi ekspansiya. Artıq şimal qonşumuz Ukraynada qorxulu "Novorossiya” planının sonuncu fazasını işə salmağa hazırlaşır. Bölgəyə "seçkilər”dən sonra altdan-altdan, humanitar yardım adı altında çoxlu sayda silah-sursat və hərbi texnika cəmləşdirilməkdədir.
Demək, Rusiyadan ölkəmizə qarşı da hərbi təhdidin xeyli ciddiləşdiyini söyləmək mümkündür. Bu xüsusda müstəqil təhlilçilər də artıq həyəcan təbili çalmağa başlayıblar.
"Ukraynadakı seçkilərdə qazanan demokratiya, uduzan isə Rusiya oldu”. Belə bir fikri mətbuata açıqlamasında NATO Əməkdaşlıq İnstitutunun rəhbəri Fərrux Məmmədov deyib. O, Qafqazın real təhlükə ilə qarşı-qarşıya qaldığını bildirib: "Biz artıq bir neçə aydır ki, Rusiyanın Qafqazda Ukrayna ssenarisindən istifadə edə biləcəyini açıq şəkildə söyləyirik. Ukraynada xalq öz seçimini etdi. Lakin Putinin Ali Radaya öz istədiyi millət vəkillərini yerləşdirə bilməməsi onu bərk qıcıqlandırıb. O, ikinci ssenarisini işə salır. Bu isə hərbi müdaxilədir. Yəni iki çıxış yolu var: biri NATO və Amerikanın Rusiya ilə açıq savaşa girməsidir. İkinci yol isə Putinin fiziki məhv edilməsidir. Bunlardan heç biri həyata keçirilməzsə, o zaman ”Şərq tərəfdaşlığı" Proqramına düşən ölkələrin işğalı qaçılmaz olacaq".
Məmmədovun fikrincə, Rusiya kəşfiyyat orqanları olan FSB və QRU-nun masasında Cənubi Qafqazın işğal planı hər zaman var: "Sadəcə, siyasi mühitin formalaşması gözlənilirdi və bu gün Rusiyaya sərf edən həmin siyasi mühit formalaşıb. Heç bir beynəlxalq hüquq normasını tanımayan, bütün konvensiyaları və normativləri rədd edən Rusiya sabahkı addımı üçün bu gün daha artıq hazırlıq görür. NATO Əməkdaşlıq İnstitutunun əldə etdiyi məlumata görə, Gümrüdəki hərbi hissədə xüsusi diversantlar Azərbaycana qarşı hazırlıq görürlər. Yəqin ki, bu barədə Bakıda kifayət qədər məlumat var. Ancaq biz də məlumat verməyi özümüzə borc sayırıq ki, düşmən artıq qapıdadır və o, Azərbaycandan daha güclüdür. Bu təhlükələrdən qurtulmaq üçün Azərbaycanın NATO və BMT-də təcili Cənubi Qafqaz böhran masasının təşkil olunmasına təşəbbüs göstərməsini təklif edirik. Belə addımlar nə qədər tez olarsa, bir o qədər təhlükədən yan keçmək asanlaşar”.
Ancaq Rusiyanın Azərbaycana müdaxiləsi sözsüz ki, Qərbin, ələlxüsus Birləşmiş Ştatların ona Ukraynada hansı cavabı verməsindən birbaşa asılı olacaq. Bu cavab yetərli effektdə olmasa, yeni sanksiyalar dişsiz təsir göstərsə, günün birində rus əsgəri həqiqətən öz çəkməsini Bakı sahillərində "yuya” bilər.
İndi bunun üçün maddi zəmin də real görünür. Bəllidir ki, Rusiya lüzum olmadığı halda illərdir şimal sərhədimiz boyu - Dağıstanda böyük sayda hərbi kontingent, canlı qüvvə və müasir hərbi texnika cəmləşdirib. Bundan əlavə, Rusiya bir neçə dəfə Xəzərdəki hərbi donanması ilə Azərbaycana qarşı əzələ nümayiş etdirib.
Beləliklə, ölkəmiz erməni işğalı ilə yanaşı, indi həm də sürünən işğal təhlükəsi ilə üz-üzədir. Azərbaycanda moskvayönlü "5-ci kolon”çuların artdığını da nəzərə alsaq, vəziyyətin rusca olduğuna şübhə qalmaz.
Xəbərdən istifadə edərkən istinad etmək vacibdir.
