Azərbaycan Qardaşlıq və İşbirliyi Dərnəyində 20 noyabr 1991-ci ildə Ağdamın Qarakənd kəndinin səmasında ermənilər tərəfindən vurularaq, içində yüksək vəzifəli şəxslərin də olduğu 22 şəhid verən vertolyot qəzasıyla bağlı anım tədbiri keçirilib.

Dərnəyin mətbuat xidmətinin rəhbəri Nigar Abdullayeva tədbir iştirakçılarına Qarakənd faciəsi barədə ətraflı məlumat verərək, içində yüksək vəzifəli şəxlərin də şəhid olduğu bu hadisəyə münasibətdə beynəlxalq aləmin hərzamankı kimi susduğunu bildirib. N.Abdullayeva kecən həftə Azərbaycanın sərhədlərini pozan erməni vertolyotunun vurulmasını dünyanın faciəyə çevirdiklərini xatırladaraq, dünyanın ikili standartlara son vermək niyyətində olmadığını da xatırladıb.

Qondarma erməni soyqırımıyla mübarizə aparan Tələt Paşa Komitəsinin İzmir dönəm başqanı Kevsər Kulachıoğlu, Qafqaz Dərnəyi başqanı Vehpi Kuş, Dərnəyin İdarə heyətinin üzvləri Fadil Ünal və Ahmet Börək də öz növbələrində şəhidlərimizə rəhmət diləyərək, Azərbaycanın dərdinin bütün türk dünyasının dərdi olduğunu xatırladıblar.

AQİD-nin başqan yardımçısı Cavid Əliyev də öz növbəsində o günlərə dönərək, dünyanın bundan dərs almasındansa, ermənilərin özbaşınalığına hələ də göz yumduqlarını vurğulayıb. O, həmçinin dərnəyə başsağlığına gələn hər kəsə təşəkürünü çatdırıb.