ABŞ-ın Bakıdakı səfirliyi Azərbaycan və Ermənistan Xarici İşlər nazirlərinin (Elmar Məmmədyarov və Zöhrab Mnatsakanyan) Cenevrədə keçirilən danışıqları ilə bağlı açıqlama yayıb.
Xeberle.com-un məlumatına görə, səfirliyin "Twitter” hesabında yazılıb ki, ATƏT-in Minsk Qrupunun həmsədrləri Cenevrədə Ermənistan və Azərbaycanın Xarici İşlər nazirləri ilə görüşdülər.
"ABŞ Dağlıq Qarabağ münaqişəsinin sülh yolu ilə həllində kömək etmək üçün qətiyyətli olaraq qalır”, - deyə bildirilib.
Qeyd edək ki, ATƏT-in Minsk Qrupunun həmsədrləri Cenevrə danışıqları ilə bağlı bəyanat yayıb.
Bildirilib ki, üç gün davam edən intensiv müzakirələr zamanı həmsədrlər və nazirlər həm birlikdə, həm də ayrı-ayrılıqda görüşüb, fikir mübadiləsi aparıblar.
Danışıqlarda ATƏT-in Minsk Qrupunun rusiyalı həmsədri İqor Popov, fransalı həmsədri Stefani Viskonti və amerikalı həmsədri Endryu Şofer iştirak edib. Daha sonra müzakirələrə ATƏT-in fəaliyyətdə olan sədrinin şəxsi nümayəndəsi Anjey Kaspişik də qoşulub.
Üç gün davam edən intensiv müzakirələr zamanı həmsədrlər və nazirlər gündəliyin aşağıdakı maddələrini müzakirə ediblər:
2019-cu ildə müzakirə olunan razılaşma və təkliflərin icrası və əhalini sülhə hazırlamaq üçün mümkün addımlar;
Gələcəkdə birgə yaşayışın əsasını təşkil edən prinsiplər və elementlər;
Nizamlama prosesinin irəliləməsinin vaxtı və gündəliyi.
Nazirlər yaxın vaxtlarda həmsədrlərin iştirakı ilə yenidən görüşməyə razılıq veriblər.
Xəbərdən istifadə edərkən istinad etmək vacibdir.
