Xalqın mübarizəsini və milli-mənəvi kimliyini göstərən belə bayraqlardan biri bu gün beynəlxalq təşkilatlarda, ən mötəbər tədbirlərdə və idman yarışlarında vüqarla dalğalanır, bəşəriyyətə suveren bir dövlətin ən gözəl təqdimatını verir. Bu, azadlığımız, istiqlalımız uğrunda apardığımız mübarizələri, mənəvi dünyamızı, milli mənsubiyyətimizi özündə birləşdirən üçrəngli, ay-ulduzlu bayrağımızdır. İlk dəfə 1918-ci ildə Azərbaycan Xalq Cümhuriyyətinin təsis etdiyi, Ulu Öndər Heydər Əliyevin 1990-cı ilin noyabrında Naxçıvan Muxtar Respublikasının dövlət bayrağı kimi ucaltdığı müqəddəs bayrağımız xalqımızın azadlıq məfkurəsinin, milli-mənəvi dəyərlərə və ümumbəşəri ideallara sadiqliyinin ən böyük tərənnümçüsüdür.

Azərbaycanın Dövlət bayrağı Xalq Cümhuriyyəti Hökumətinin iclasında qəbul edilib. 1920-ci ildə qurulan sovet hakimiyyəti xalqımızın kimliyini, tariximizi unutdurmaq yolu tutduğu üçün ay-hilallı bayrağımızdan imtina etmişdi. Lakin xalqımızın müstəqillik arzusu heç vaxt tükənmədi, milli dəyərlərə sadiqliyimiz heç vaxt bizləri tərk etmədi. Naxçıvan Muxtar Respublikası Ali Məclisinin vəsatəti ilə 1991-ci ilin fevralında Azərbaycan Ali Soveti "Azərbaycan Respublikasının Dövlət bayrağı haqqında Azərbaycan Respublikasının Qanunu”nu qəbul etdi. Bununla da üçrəngli bayrağımız Azərbaycan Respublikasının Dövlət bayrağı kimi təsdiq olundu və bu müqəddəs istiqlal rəmzimiz bütün Azərbaycanda dalğalanmağa başladı.

Bu gün Azərbaycan Prezidenti İlham Əliyevin fəaliyyətində diqqət çəkən əsas məqamlardan biri dövlətçilik tariximizə və dəyərlərimizə xüsusi ehtiramla yanaşı, onların təbliği məqsədi ilə mühüm qərarlar qəbul etməsidir. Belə ki, məhz cənab İlham Əliyev 2009-cu il noyabrın 17-də "Azərbaycan Respublikasının Dövlət bayrağı gününün təsis edilməsi haqqında” sərəncam imzalayıb. Sərəncamla Azərbaycan Xalq Cümhuriyyəti tərəfindən bayraığmızın təsdiq edildiyi tarix - noyabr ayının 9-u respublikamızda Dövlət Bayrağı Günü kimi qeyd edilir.

Eyni zamanda Bakının ən gözəl yerlərindən birində Dövlət Bayrağı Meydanının yaradılması da dövlət başçısının milli rəmzlərimizə olan yüksək ehtiramının göstəricisidir. Bütün bunlar ölkəmizdə milli həmrəyliyin daha da möhkəmlənməsinə, azərbaycançılıq məfkurəsinə və dövlət rəmzlərinin təbliğinə xidmət edən olduqca mühüm addımlardır.

Bu günlərdə Azərbaycan tarixinin ən şərəfli səhifələrindən biri yazılır. Ali Baş Komandan İlham Əliyevin rəhbərliyi ilə müzəffər Azərbaycan Ordusu torpaqlarımızı Ermənistanın işğalından azad edir. Olduqca qısa müddətdə 27 ildir işğal altında qalan Füzuli, Cəbrayıl, Qubadlı, Zəngilan azad edilib. Artıq əsgərlərimizin ayaq səsləri Şuşanın, Xankəndinin yaxınlığından gəlir. Hər gün işğaldan azad edilmiş yaşayış məskənlərimizin sıralarına yeni adlar yazılır. İndi işğaldan azad edilmiş ərazilərimizdə yenidən Azərbaycan bayrağı ucalır...

Ümumiyyətlə, Vətən müharibəsi həm də onu göstərdi ki, xalqımızın bayraq sevgisi olduqca böyükdür. Bu günlərdə ölkəmizin hər yeri üçrəngli bayrağımıza büründü. Küçələrimiz, evlərimiz, iş yerlərimiz, hətta avtomobillərimiz bayrağımızla bəzəndi.

Prezident İlham Əliyev öz fəaliyyəti ilə torpaqlarımızın işğaldan azad edilməsinin zamanını yetişdirdi. Dövlətimizin inkişafı, ordumuzun qüdrətlənməsi və Azərbaycanın beynəlxalq səviyyədə artan nüfuzu torpaqlarımızın güc yolu ilə azad edilməsində rol oynayan əsas vəsilələrdir. Bu gün İlham Əliyevin Ali Baş Komandanı olduğu Azərbaycan Ordusu cəbhədə uğurla irəliləyir. Eyni zamanda cənab Prezident Azərbaycana olan xarici təzyiqlərin qarşısını məharətlə alır, ölkəmizə qarşı diplomatik cəbhənin yaranmasına imkan vermir.

Azərbaycan artıq Böyük Qələbənin astanasındadır. Cənab İlham Əliyevin dediyi kimi, bizim bayrağımız Xankəndidə, Şuşada dalğalanacaq və o günə lap az qalır. Hər bir azərbaycanlı böyük səbirsizliklə həmin tarixi anları gözləyir.