Prezident İlham Əliyev 2009-cu il 3 oktyabr tarixində
Naxçıvanda keçirilmiş Türkdilli ölkələrin dövlət başçılarının IX zirvə
görüşündə Zəngəzur dəhlizinin əhəmiyyətinə diqqət çəkərək bildirmişdir
ki, vaxtilə Azərbaycanın tarixi torpağı, əzəli torpağı Zəngəzur
bölgəsinin Azərbaycandan ayırıb Ermənistana birləşdirilməsi demək olar
ki, böyük türk dünyasını coğrafi baxımdan parçaladı. Yəni türk
dünyasının vahid bir ailə kimi, vahid bir qüvvə kimi fəaliyyəti on
illiklər ərzində dayandırılmışdır.
Vətən müharibəsində qələbəmizin ən mühüm nəticələrindən biri də ölkə
başçısının 12 il öncə Zirvə görüşündə vurğuladığı və bu gün ən çox
müzakirə mövzusu olan Zəngəzur dəhlizidir. Prezident İlham Əliyevin qeyd
etdiyi kimi, Zəngəzur dəhlizi tarixi nailiyyətdir. Əlbəttə ki, 2020-ci
il noyabrın 10-da Azərbaycan və Rusiya prezidentlərinin, habelə,
Ermənistanın baş nazirinin imzaladığı üçtərəfli bəyanatda Zəngəzur
dəhlizi məsələsinin əks olunması bizim böyük siyasi qələbəmizdir.
Ölkə başçısı bu günlərdə Azərbaycan Televiziyasına müsahibəsində bir
daha bəyan etdi ki, Zəngəzur dəhlizinin yaradılması Azərbaycanın milli,
tarixi və gələcək maraqlarına tam cavab verir: "Biz Zəngəzur dəhlizini
icra edəcəyik, Ermənistan bunu istəsə də, istəməsə də. İstəsə, daha asan
həll edəcəyik, istəməsə də zorla həll edəcəyik. Necə ki, mən
müharibədən əvvəl və müharibə dövründə demişdim ki, bizim torpağımızdan
öz xoşunuzla rədd olun, yoxsa sizi zorla çıxaracağıq. Belə də oldu.
Zəngəzur dəhlizinin taleyi də eyni olacaq.Bizim əsas rəqibimiz zamandır.
Çünki dəmir yolunun, avtomobil yolunun çəkilişi vaxt tələb edir. Ona
görə bütün güclər səfərbər olunub ki, bu layihə icra edilsin. Beləliklə,
Azərbaycan xalqı 101 il bundan əvvəl bizim əlimizdən alınmış Zəngəzura
qayıdacaqdır”.
Azərbaycanın qələbəsi ilə başa çatmış 44 günlük Vətən müharibəsi
regionunda yeni reallıqlar yaratdı. Bu gün həmin reallıq ölkəmiz, eləcə
də bir çox ölkələr üçün geniş imkanlar açır. Zəngəzur dəhlizinin
regional və beynəlxalq əhəmiyyətinin göstəricilərindən biri də məhz bu
məsələnin media tərəfindən diqqətdə saxlanılmasıdır. Bu gün istər
regional, istərsə də regionda marağı olan Qərb, ərəb dövlətləri və hətta
Çin kütləvi informasiya vasitələrində Zəngəzur dəhlizi ilə bağlı
məlumat və analitik materiallara rast gəlirik.
Azərbaycanın tarixi ərazisi olan Zəngəzurdan keçərək ölkəmizin əsas
hissəsini onun bir parçası olan Naxçıvan Muxtar Respublikası ilə
birləşdirəcək nəqliyyat dəhlizi regionda olduqca böyük imkanlar
yaradacaq.
- Zəngəzurdan keçən nəqliyyat, kommunikasiya, infrastruktur layihələri bütün türk dünyasını birləşdirəcək;
- Dəhliz türk dünyasını birləşdirən yeni körpü rolunu oynayacaq;
- Zəngəzur dəhlizinin reallaşması regional nəqliyyat şəbəkələrinin
genişlənməsinə şərait yaradacaq və region ölkələri arasında qarşılıqlı
iqtisadi əlaqələri daha da stimullaşdıracaq;
-
Bu marşrutun yaradılması Türkiyədən Azərbaycana və əks istiqamətdə yükdaşımaları asanlaşdıracaq;
Ölkəmizin Türkiyə ilə, eləcə də digər ölkələrlə ticarət dövriyyəsini daha da artıracaq;
- Zəngəzur dəhlizinin yaradılması Avrasiyanın nəqliyyat şəbəkəsinin
imkanlarını daha da genişləndirəcək, bölgə ölkələri arasında
iqtisadi-ticari əlaqələrə müsbət təsir göstərəcək;
- Şərq-Qərb dəhlizinin tərkib hissəsi olaraq Asiyanı Avropa ilə birləşdirəcək;
- Layihə eyni zamanda xalqlar arasında mədəni əlaqələrin daha da dərinləşməsinə öz töhfəsini verəcək;
Beləliklə, Prezident İlham Əliyevin düşünülmüş və uzaqgörən siyasəti
nəticəsində qədim Azərbaycan torpağı olan Zəngəzur indi türk dünyasını
birləşdirən körpü rolunu oynayacaq. Bütövlükdə region üçün mühüm
əhəmiyyətə malik olan Zəngəzur dəhlizinin açılması sosial-iqtisadi
faydalılığı ilə yanaşı eyni zamanda regionda sülhün və təhlükəsizliyin
təmin olunmasına öz töhfəsini verəcək.
Vüsalə Qurbanova,
Sumqayıt şəhər Heydər Əliyev Mərkəzinin direktoru
Xəbərdən istifadə edərkən istinad etmək vacibdir.
