"Şuşadakı kilsənin təmiri ilə yanaşı,
işğaldan azad edilmiş ərazilərimizdə aparılan bərpa işləri 30 il
müddətində torpaqlarımızı işğal altında saxlayan mənfur düşmənə və onun
havadarlarına layiqli dərs oldu”.
Xeberle.com xəbər verir ki, bu sözləri Milli Məclisin deputatı Müşfiq Məmmədli "İki sahil”ə açıqlamasında bildirib.
M.Məmmədli
vurğulayıb ki, işğaldan azad edilmiş ərazilərimizdə tarixi-mədəni
abidələrimizin bərpası Azərbaycanın bir dövlət kimi, öz mədəni irsinə və
dünya mədəniyyətinə, memarlığına böyük hörmətin təzahürüdür:
"Bildiyimiz kimi, Azərbaycan multikultural bir dövlət olaraq bütün
dinlərə, onların tarixi-mədəni abidələrinə qarşı hər zaman hörmətlə
yanaşır. Təsadüfi deyil ki, bu gün ölkəmizdə 2200-dən artıq məscid
mövcuddur, 14 kilsə, 7 sinaqoq fəaliyyət göstərir. Bununla yanaşı, ölkə
ərazisində 700-dən artıq pir və ziyarətgah fəaliyyət göstərir. Hətta
Bakı şəhərinin mərkəzində erməni kilsəsi də dövlət tərəfindən qorunan
abidələr siyahısına salınıb. Eyni zamanda, Azərbaycanda bütün dinlərin
nümayəndələri qarşılıqlı hörmət və anlaşma, sülh şəraitində birgə
yaşayır və Milli Məclisdə təmsil olunurlar. Sözsüz ki, bütün bunlar
dünyaya bir örnəkdir”.
Deputat onu da
qeyd etdi ki, biz işğaldan azad edilmiş ərazilərimizdə bir çox tarixi,
dini abidələrimizin dağıntılara və təhqirə məruz qaldığını gördük:
"Ümumiyyətlə, ermənilər 30 ilə yaxın müddətdə işğal altında saxladıqları
ərazilərimizdə əsl vəhşilik nümayiş etdiriblər. Bu vəhşiliyin də bir
səbəbi odur ki, Ermənistan monoetnik ölkədir və özlərindən başqa heç bir
dövlətin, xalqın tarixini, mədəniyyətini qəbul edib yaşatmaq onların
xislətlərində mövcud deyil. Bunun nəticəsidir ki, Ermənistan işğal
etdiyi torpaqlarda qurub-yaratmaq əvəzinə yalnız dağıdıb-sökməyə, məhv
etməyə çalışıb. Azərbaycan isə tarixin hər bir dövründə öz etnik
müxtəlifliyi ilə fəxr edib. Prezident İlham Əliyevin işğaldan azad
edilmiş ərazilərimizə səfərləri çərçivəsində ziyarət etdiyi hər məkanda
bunun bir daha şahidi olduq. Belə ki, əsrlərlə tarixi olan Pənahəli
xanın sarayından qalan qalıntılarda, dağıdılan Karvansaray kompleksində,
dahi sənətkarlarımız Bülbülün, Üzeyir Hacıbəylinin dağıdılan evlərində,
məscidlərimizə qarşı edilən təhqirlərdə erməni barbarlığının izləri
açıq aydın gördük. Sözsüz ki, bütün bunlar misli görünməmiş vandallıq,
barbarlıqdır”.
M.Məmmədli onu da
diqqətə çatdırdı ki, Şuşaya səfəri zamanı bu cənnət məkanın dünyanın ən
gözəl şəhərlərindən birinə çevriləcəyini bildirən dövlətimizin başçısı
cənab İlham Əliyev burada ilk növbədə tarixi və dini abidələrin
bərpasına önəm verildiyini açıqlamışdır: "Artıq bu istiqamətdə işlər
sürətli şəkildə davam edir. Bərpa prosesində dövlətimizin müvafiq
strukturları ilə yanaşı, Heydər Əliyev Fondu da danılmaz xidmətlər
göstərir. Onu da qeyd edim ki, Heydər Əliyev Fondu tərəfindən nəinki
ölkəmizdə, həm də ölkə hüdudlarından kənarda dini konfessiyalara
ayrı-seçkilik qoyulmadan bütün dinlərin tarixi-memarlıq abidələri,
məscid, kilsə və sinaqoqlar, ziyarətgahlar təmir və ya bərpa olunur. Bu
məsələ bu gün tolerantlıq ənənələrinin qorunmasına xüsusi əhəmiyyət
verən Prezident İlham Əliyevin və Birinci vitse-prezident Mehriban xanım
Əliyevanın diqqət mərkəzindədir. Bu günlərdə isə Azərbaycan tərəfindən
Şuşadakı Qazançı kilsəsinin təmirinə başlanılıb. Şuşadakı bu kilsənin
təmiri ermənilərin dağıtdığı və təhqir etdiyi məscidlərimizin fonunda
Azərbaycanın tolerantlığının növbəti göstəricisidir”.
"Şuşadakı
kilsənin təmiri ilə yanaşı, işğaldan azad edilmiş ərazilərimizdə
aparılan bərpa işləri 30 il müddətində torpaqlarımızı işğal altında
saxlayan mənfur düşmənə və onun havadarlarına layiqli dərs oldu”, deyə
deputat qeyd etdi.
Xəbərdən istifadə edərkən istinad etmək vacibdir.
