Bu sözləri Xeberle.com-a açıqlamasında Milli Məclisin deputatı Müşfiq Məmmədli deyib. Deputat bildirib ki, Ermənistan rəhbərliyi 30 ilə yaxın bir müddət ərzində yalnız təxribatlarla məşğul olub: "İşğalçı dövlət açıq-aydın bildirirdi ki, bu torpaqların bizə qaytarılması mümkün deyil. Belə olan halda faktiki olaraq danışıqlar prosesinə son qoyuldu. Bütün danışıqlar dövrü – 2003-cü ildən son hadisələrə qədər Azərbaycan xalqı bütün proseslərin şahidi olub”.

M. Məmmədli vurğulayıb ki, Azərbaycanın mövqeyi bir çox hallarda vasitəçilər tərəfindən birmənalı qarşılanmırdı. Bəzi ermənipərəst qüvvələr bizi günahlandırmağa çalışırdılar: "Sanki biz aqressoruq, sanki biz işğalçıyıq. Ona görə də biz hər zaman deyirdik ki, əgər məsələ danışıqlar yolu ilə həll olunmasa, müharibə qaçılmazdır. Xüsusilə keçən ilin iyul, avqust, sentyabr aylarında Ermənistan dövlətinin bizə qarşı hərbi təxribatları nəticəsində baş vermiş hadisələr artıq müharibəni qaçılmaz etmişdi”.

Ordumuzun düzgün hərbi strategiyalar sayəsində qazanılmış qələbə və keçilmiş döyüş yolları haqqında danışan millət vəkili düşmənin necə məğlubiyyətə uğradığını, kapitulyasiya aktını imzalamağa məcbur qaldığını xatırladıb: "44 günlük müharibə şanlı tariximizdir. Bu da qürurverici haldır ki, dünyanın aparıcı ölkələrinin ali hərbi məktəblərində 44 günlük müharibə öyrənilir. Müharibəni udmağımıza texniki imkanlarımız təsir etdi, bu danılmazdır. Ancaq Böyük Qələbəyə əsas canlı qüvvənin, hərbçilərimizin şücaəti və qəhrəmanlığı, Vətən uğrunda ölümə getmək əzmi sayəsində nail olduq. Və biz bu zəfəri onlara – ölməzliyə qovuşan şəhidlərimizə, qazilərimizə borcluyuq”.

Deputat onu da vurğulayıb ki, Ermənistan tərəfi öz təxribatçı əməllərindən əl çəkmir. Lakin, Ali Baş komandanın da qeyd etdiyi kimi, əgər xalqımızın, dövlətimizin təhlükəsizliyinə zərrə qədər təhlükə olarsa, düşmən dərhal yerindəcə tərəfimizdən məhv ediləcəkdir: "Düşmənə gücümüzü göstərmişik və onlar bilir ki, hər hansı təxribatçı əməllə özlərinə məhv olma təhlükəsi yaradırlar. Son günlərdə Azərbaycan-Ermənistan sərhədində Ermənistan ordusu tərəfindən törədilmiş təxribata qarşı atılan addım da bir daha göstərdi ki, heç bir təxribat cavabsız qalmayacaq”.