Ən yeni tariximizin unudulmaz məqamlarından biri 1992-ci il noyabrın 21-də Yeni Azərbaycan Partiyasının təsis konfransının keçirilməsi olmuşdur. Ulu öndər Heydər Əliyevin rəhbərliyi ilə yeni partiyanın yaradılması sayəsində mahiyyətcə Azərbaycanın işıqlı gələcəyinin ideya bazası təşəkkül tapmışdır.
Bildiyimiz kimi, o vaxt məşhur "91-lər” ölkədəki xaos vəziyyətini nəzərə alaraq, xalqın xilası naminə Heydər Əliyevə tarixi müraciət etmiş və ölkəni böhrandan çıxara biləcək, qurtuluş missiyasını öz üzərinə götürən yeni bir partiya yaradılması təklifini irəli sürmüşdülər. Unudulmaz dahi şəxsiyyətin razılığından sonra Yeni Azərbaycan Partiyasının təsis konfransı keçirilmiş və o, partiyaya sədr seçilmişdir. Sonrakı olaylar göstərmişdir ki, xalq Azərbaycanı çətin vəziyyətdən çıxara biləcək yeganə insana, hərtərəfli potensiallı və cəsarətli müdrik şəxsiyyətə sığınmaqda böyük uzaqgörənlik nümayiş etdirmişdir.
Bəli, xilaskar partiyanın meydana gəlməsi 1988-ci ildən başlayaraq ölkəmizdə cərəyan edən hadisələrin yekunu və mövcud olan ictimai-siyasi şəraitin məntiqi nəticəsi idi. Heydər Əliyevin rəhbərliyi ilə Yeni Azərbaycan Partiyası özünün ilk addımlarını Azərbaycanda siyasi sabitliyin bərpasına yönəltmişdir. 1993-cü ldə vəziyyət daha da kəskin xarakter alanda xalq yenə də Heydər Əliyevə üz tutmuş və onun Bakıya, siyasi hakimiyyətə qayıtmasını təkidlə tələb etmişdir. Durumun çıxılmaz olduğunu görən prezident Elçibəy də əlacsız qalıb, dünya şöhrətli siyasətçini Bakıya dəvət etmişdir. Bakıya gəldikdən sonra ilk olaraq hərbi qiyam baş vermiş Gəncəyə yollanan, orada hökumətə qarşı itaətsizlik edən polkovnik Surət Hüseynovu "ağıllandıran”, sonra deputatı olduğu Ali Sovetdə mövcud vəziyyət barədə danışan və hansı vacib addımların atılmalı olduğunu söyləyən dahi şəxsiyyət özünün böyük nüfuzu sayəsində ictimai-siyasi vəziyyətin sabitləşməsinə nail ola bilmişdir. Təsadüfi deyil ki, ondan bir neçə gün sonra –iyunun 15-də Heydər Əliyev Ali Sovetə sədr seçilmiş və tezliklə Kələkiyə qaçan Elçibəyin prezidentlik vəzifələrini də öz üzərinə götürmüşdür. Payızda demokratik seçki yolu ilə prezident seçilən Heydər Əliyevin gərgin səylərinin nəticəsi olaraq Azərbaycan sabitlik və dinc quruculuq yoluna çıxmışdır.
Həmin dönəmlərdə artıq iqtidar partiyasına çevrilən YAP-ın siyasi məfkurəsinə uyğun olaraq ölkənin dirçəldilməsini ehtiva edən inkişaf konsepsiyası ardıcıl surətdə həyata keçirilmişdir. Təzəcə formalaşan nizami Azərbaycan Ordusu Qarabağda uğurlu döyüş əməliyyatları keçirmişdir. Bunun da nəticəsi olaraq işğalçı Ermənistan müharibədə atəşkəsə getməyə məcbur olmuşdur. Bu isə ölkəmizdə iqtisadiyyatın dirçəldilməsinə, Silahlı Qüvvələrin möhkəmlənməsinə imkan yaratmışdır. 1994-cü ildə ümummilli liderin uzaqgörən siyasətinin sayəsində "Əsrin müqaviləsi” imzalanmışdır. Bu böyük iqtisadi uğur eyni zamanda Azərbaycanın dövlət müstəqilliyinin dönməz xarakter almasını təmin etmişdir.
Fəxr və qürurla vurğulamaq istəyirəm ki, hazırda YAP-ın Sədri olan Prezident, Müzəffər Ali Baş Komandan İlham Əliyevin məqsədyönlü siyasəti sayəsində partiyamızın cəmiyyət arasında nüfuzu daha da yüksəlmişdir. Azərbaycan rəhbərinin şəxsi nümunəsi hər bir partiya üzvü üçün əsl məktəbdir. Ölkəmiz özünün ictimai-siyasi sabitliyi, mədəni-iqtisadi tərəqqisi ilə regionun lider dövlətinə çevrilmişdir. Qarabağda təxminən 30 illik erməni işğalına son qoyulmasında, möhtəşəm Zəfər tarixi yazılmasında və hazirda işğaldan azad olunmuş əzəli torpaqlarımızda genişmiqyaslı bərpa-quruculuq işləri görülməsində partiya Sədrimiz olan sevimli Prezidentimizin xidmətləri danılmazdır. Bu yaxınlarda cənab İlham Əliyevin Türk Dünyasının Ali Ordeni ilə təltif edilməsi onun Azərbaycanın ərazi bütövlüyünü təmin etməklə qızıl tarix yazmasına, həmçinin də türk dünyası qarşısında misilsiz xidmətlərinə verilən yüksək qiymət kimi hər birimizi hədsiz sevindirir.
Partiyamızın sıravi üzvləri də bu inkişafa, tərəqqiyə öz töhfələrini verirlər. Bütün bunlar onu göstərir ki, həqiqətən də YAP cəmiyyətimizin ən aparıcı siyasi qüvvəsidir. Ulu öndər demişkən, həm dünənin, həm də bugünün və sabahın partiyasıdır.
Hikmət Xəlilov,
YAP fəalı, Masallı rayon sakini
Xəbərdən istifadə edərkən istinad etmək vacibdir.
