Bu gün 74 yaşını qeyd edən Amerikada mühacir həyatı yaşayan Milli Məclisin sabiq spikeri Rəsul Quliyev Azərbaycana gəlmək istəyir. Məlumat üçün bildirək ki, Rəsul Quliyev 10 dekabr 1947-ci ildə Culfa rayonunun Qazançı kəndində anadan olub. O nə vaxt istəsə, Azərbaycana gələ biləcəyini söyləyib:
"Hələ fikirləşirəm. Tutaq ki, Azərbaycana gəlmişəm, nə işlə məşğul olacağam?! Elə adam deyiləm ki, boş-boş danışam, yalançı şüarlar səsləndirəm. Belə adamlardan da zəhləm gedir. Nə vaxt mənə ehtiyac olarsa, gələcəyəm. Ola bilər, 15 günlük gəlim. Vətəni sevməyin vətəndə olmaqla heç bir əlaqəsi yoxdur. Mən burada ola-ola vətəni vətəndə olanların 90 faizindən daha çox sevirəm”.
R. Quliyev 1996-cı ildə parlamentin spikerliyindən istefa verib, ABŞ-a köçdükdən sonra barəsində cinayət işi açılıb. O, 1998-ci ildən İnterpolun axtarışındadır. Bu səbəbdən Rəsul Quliyevin ölkəyə qayıtmaq istəyi ciddi müzakirələrə səbəb olub və birmənalı qarşılanmayıb.
Bununla bağlı Modern.az-a danışan Yeni Azərbaycan Partiyasının Veteranlar Şurasının üzvü, Milli Məclisin Aqrar siyasət komitəsinin sədri Tahir Rzayev düşünür ki, axtarışda olan sabiq spikerin Azərbaycana qayıda bilməsi üçün bir sıra şərtlərə əməl etməyi lazımdır:
"Azərbaycan prezidenti bütün insanlara humanist mövqedən yanaşır. Bunun ən bariz nümunəsi vaxtaşırı verilən əfv və amnistiyadır ki, müxtəlif cinayətlərdə əli olan şəxslər cəzasının müəyyən qismini çəkdikdən sonra cəmiyyət üçün təhlükə törətmədiyi təsdiqlənib və bu şəkildə azadlığa çıxıb.
Rəsul Quliyev uzun müddət Azərbaycana əks mövqedə olub, ölkə rəhbəri ilə bağlı fikirləri birmənalı qarşılanmayıb, Azərbaycan həqiqətlərini danıb, nailiyyətlərimizə kölgə salmaq istəyib. Amerikada oturaraq, müəyyən qüvvələri pisləməklə məşğul olub. Lakin düşmən üzərində tarixi qələbədən sonra mövqeyini dəyişdiyi görünür. O çıxışlarında Azərbaycanın gücünü, prezidentimizin uzaqgörən siyasətini qismən etiraf edir, xalq-prezident birliyinin qarşısında heç bir müxalif qüvvənin dayana bilməyəcəyini anlayır. Rəsul Quliyev artıq öz yoluna qayıtmağa başlayıb. Əgər bir azərbaycanlı kimi o dövlətimizin qayda-qanunlarına riayət etsə, ölkəyə qayıtdıqdan sonra reallıqları qiymətləndirib, düzgün istiqamətdə fəaliyyət göstərə bilsə, onun qayıtmasına maneə olmayacaq”.
Sabiq prezident Ayaz Mütəllibovun da eyni şəkildə bağışlandığını xatırladan Tahir Rzayev Rəsul Quliyevin sabiq prezidentdən nümunə götürəcəyini istisna etməyib:
"Ayaz Mütəllibov uzun müddət Azərbaycanı tərk edib, Moskvada yaşadı, lakin sonralar səhvlərini etiraf etdi, Bakıya qayıtmasına icazə verildi. Hətta sabiq prezident kimi bir sıra statusları, güzəştləri yenidən qazana bildi. Bu gün də o, öz çıxışlarında ölkə başçısının yürütdüyü siyasəti dəstəkləyir.
Rəsul Quliyev də azərbaycanlıdır və hesab edirəm ki, öz səhvlərini etiraf etməli, Azərbaycan xalqının nailiyyətlərini dərk etməlidir. Bir azərbaycanlı kimi bundan sonra öz fəaliyyətində dönüş yaratmalıdır. Onun ölkəmizə qayıtması, burada siyasi fəaliyyətlə məşğul olması nailiyyətlərimizə kölgə sala bilməz. Ancaq o, həqiqətin, ədalətin yolunda olmalı, prezidentimizin siyasətini, xalqımızın nailiyyətlərini düzgün qiymətləndirməyi bacarmalı, yeri gələrsə, buna obyektiv münasibətini ifadə etməlidir".
Xəbərdən istifadə edərkən istinad etmək vacibdir.
