Ermənistan, Rusiya və Azərbaycan baş nazirləri müavinlərinin sədrlik etdiyi üçtərəfli işçi qrupun fəaliyyəti ilə bağlı məsələləri çərşənbə günü İrəvanda Rusiya baş nazirinin müavini Aleksey Overçuk və onun erməni həmkarı Mher Qriqoryan müzakirə ediblər.
Xeberle.com xəbər verir ki, bu barədə Rusiya Federasiyası hökumətinin rəsmi saytında bildirilib.
Görüşdə Cənubi Qafqaz regionunda nəqliyyat kommunikasiyalarının bərpası perspektivləri nəzərdən keçirilib.
Tərəflər həmçinin Ermənistan-Rusiya münasibətlərinin aktual məsələlərini, ikitərəfli ticarət-iqtisadi əməkdaşlığın vəziyyəti və perspektivlərini müzakirə ediblər.
Qriqoryan və Overçuk Cənubi Qafqaz Dəmir Yolu Şirkətinin Ermənistan iqtisadiyyatı üçün mühüm rolunu vurğulayıblar. Konsessiya müqaviləsi çərçivəsində şirkətlə əməkdaşlığın gələcək inkişafı ilə bağlı bir sıra məsələlər də müzakirə olunub.
Xatırladaq ki, Aleksey Overçuk Ermənistan və Azərbaycan arasında nəqliyyat kommunikasiyalarının açılması üzrə üçtərəfli işçi qrupunun rusiyalı həmsədridir.
Xəbərdən istifadə edərkən istinad etmək vacibdir.
