"Rusiya Türkiyənin BOTAŞ şirkəti ilə bağladığı müqaviləyə əsasən, 660 km-lik boru xəttini Avropadan yox, Qara dənizin dibi ilə Türkiyəyə çatdırmağı və bütün bu xərcləri öz üzərinə götürməyi planlaşdırır. Ancaq Türkiyədən keçəcək 250 km-lik hissənin xərclərini Türkiyə özü ödəyəcək”. Bu sözləri ermənişünas ekspert İsmayıl Tanrıverdi deyib. O, hazırda Ermənistanın bu layihədən çox narahat olduğunu diqqətə çatdırıb: "Yunanıstanla sərhəddə elə bir mərkəz tikiləcək ki, Rusiya öz qazını Yunanıstan vasitəsilə Avropaya ötürəcək. Rusiyanın planına əsasən, boru kəməri Bolqarıstan, Macarıstan, Avstriya və İtaliyadan keçməli idi. Ancaq Putin Türkiyəyə getdikdən sonra fikri dəyişdi və layihə dayandırıldı. Daha sonra isə Qara dənizin sualtı hissəsi ilə Türkiyə vasitəsilə qazını Avropaya çıxartmaq niyyətinə düşdü. İndi layihəyə görə Yunanıstan sərhədində yaradılacaq qaz mərkəzi ilə Avropanın 28 ölkəsinə qaz paylamaq mümkün olacaq. Yanvarın 1-dən Türkiyəyə 6 faiz güzəşt tətbiq edildi. Daha sonra Türkiyənin Enerji və Təbii Sərvətlər naziri Tanər Yıldız Moskvaya səfər edərək daha çox 10,25 faizədək güzəşt əldə edə bildi. 2014-cü ildə Türkiyə Rusiyadan 27.4 milyard kubmetr qaz alıb. Bu il qazın həcmi daha da artırılacaq. Ermənistan tərəfi isə hazırda bu vəziyyətdən olduqca narahatdır”. Onun sözlərinə görə, ermənilər Türkiyəyə edilən bu jestə görə qısqanclıq keçirir və hazırda da qaz ala bilmək üçün döymədikləri qapı qalmayıb: "Onlar Rusiyaya müraciət etsələr də, istədiyi vəsaiti ala bilməyiblər. İndi də hansı dövlətə üz tuturlar, heç kim qəbul etmir. Ermənistan yenidən kommunikasiya xətti çəkmək və pul tapmaq üçün dəridən-qabıqdan çıxır. İrəvanın vəsaiti olmadığına görə İran daha işə qarışmır. Hazırda buna görə Köçəryanı günahkar görürlər ki, onun vaxtında daha dayanıqlı və keçiricilik qabiliyyəti güclü olan boru xətləri çəkilsəydi, təkcə İrəvan yox, indi bütün Ermənistan qazla təmin edilə bilərdi. İran paralel olaraq həmin boru kəmərinə yeni xəttin çəkilməsinə razılıq versə də, ancaq Ermənistanın buna gücü çatmır. O da bəllidir ki, İran da bütün xərcləri üzərinə götürə bilməz. Buna görə də ermənilər Rusiyanın türklərə etdiyi güzəşt jestindən dolayı böyük narahatçılıq keçirirlər. Çünki heç nəyi olmayan Ermənistanın bu dəfə də qazsız qalmasının nə ilə nəticələnəcəyini təsəvvür etmək o qədər də çətin deyil”. (axar.az)
Xəbərdən istifadə edərkən istinad etmək vacibdir.