Azərbaycan prezidenti İlham Əliyevin Bolqarıstana martın 4-də etdiyi səfərlə eyni gündə bu ölkə hökumətində müəmmalı hadisələr baş verir.
Həmin gün ABŞ Federal Təhqiqatlar Bürosunun (FTB) rəhbəri Ceyms Komi də Sofiyaya səfər edib.
FTB direktoru Bolqarıstan baş naziri Boyko Borisovla onun Azərbaycan prezidenti ilə danışıqlarının başa çatmasından bir saat sonra görüşüb. Rəsmi məlumata əsasən görüşdə korrupsiyaya qarşı mübarizə və digər məsələlər müzakirə olunub.
Bu görüşdən az sonra heç kimin gözləmədiyi halda daxili işlər naziri Veselin Vuçkov istefa verdiyini elan edib. İstefanın səbəbləri açıqlanmayıb.
Amma mətbuatda belə xəbərlər yayılıb ki, Veselin Vuçkov Daxili İşlər Nazirliyinin baş katibi Svetlozar Lazarovun və Milli Təhlükəsizlik üzrə Dövlət Agentliyinin (DANS) sədri Vladislav Pisançevin vəzifələrindən uzaqlaşdırılmasını tələb edirmiş.
Bolqar mətbuatı daxili işlər nazirinin Azərbaycan prezidentinin və FTB direktorunun Sofiyaya səfərləri ilə eyni gündə istefa verməsini "olduqca yersiz” adlandırıb.
Bolqarıstanın hakim partiyasının sədr müavini Tsvetan Tsvetanov da parlamentin kuluarlarında daxili işlər nazirinin bu cür yüksək rütbəli xarici qonaqların səfəri ilə eyni gündə istefa verməsinin "olduqca yersiz” olduğunu deyib.
T.Tsvetanov deyib ki, baş nazirlə bu haqda söhbət edib və onlar belə qənaətə gəliblər ki, Vuçkovun istefasına görə bu mühüm səfərlər informasiya axınında "axıb getdi”.
Həmin gün axşam baş nazir Boyko Borisov parlamentdə daxili işlər naziri postuna baş nazirin müavini Rumyan Bıçvarovun namizədliyini təqdim edib. Həmçinin Lazarov və Pisançevi istefa verməyə çağırıb. Baş nazir bildirib ki, Lazarov artıq onunla telefonla danışıb və istefa verəcəyini bildirib.
Lazarov istefa ərizəsini martın 5-də baş nazirə təqdim edib. Bu gün martın 6-da isə DANS sədri Vladimir Pisançev istefa ərizəsi verib. Hər iki ərizə baş nazir tərəfindən təsdiqlənib. (Virtualaz.org)
Xəbərdən istifadə edərkən istinad etmək vacibdir.
