Azərbaycan qədim tarixə və zəngin multikultural ənənələrə malik olan bir xalqdır. Tarix boyu müdrik xalqımız digər etnik toplumların nümayəndələri ilə dinc, yanaşı yaşamış, qonşularla mehriban münasibətlər saxlamışdır. Azərbaycanlılar hətta ən çətin və dar məqamlarda son tikəsini belə qonşuları ilə bölməyə hazır olmuşlar. Lakin bir məsələdə bəxtimizin gətirmədiyini əminliklə deyə bilərik. Bəlkə də Tanrı bizə qonşuların ən pisini, ən riyakarını qismət edib.
Tarixin müxtəlif mərhələlərində torpaqlarımıza xain hücumlar edən ermənilər işğalçılıq siyasəti yürütməklə bərabər, həm də dünyanın müxtəlif yerlərində qanlı terror aktları törətmişlər. Müasir dövrümüz də bu baxımdan istisna deyil. Erməni vəhşiliyinin iç üzünün açılmasında Azərbaycan dövləti və onun Müzəffər Ali Baş Komandanı Cənab İlham Əliyev əlindən gələn hər şeyi edir. 14 oktyabr 2022-ci il tarixində Astanada Müstəqil Dövlətlər Birliyi Dövlət Başçıları Şurasının iclasında da Cənab İlham Əliyev erməni vandalizmini ifşa edən tutarlı faktlar səsləndirdi.
Ermənistan 30 illik müddətdə işğal etdiyi ərazilərimizdə misilsiz dağıntılar törətmişdir. Böyük və abad şəhərlərimiz, yaşayış məntəqələrimiz demək olar ki, yer üzündən silinmişdir. 44 günlük Vətən müharibəsində Azərbaycan parlaq zəfər qazanaraq öz ərazi bütövlüyünü, tarixi ədaləti, BMT qətnamələrinin icrasını təmin etsə də vandal ermənilər öz miskin xislətlərindən əl çəkmir, həm sərhədboyu ərazilərdə yaşayış məntəqələrimizi mütəmadi atəşə tutur, həm də dünyünın müxtəlif ölkələrində səfirliklərimizə, mədəniyyət mərkəzlərimizə quldur hücumları təşkil edirlər. Belə ki, Ermənistan tərəfindən Azərbaycanın Livandakı və ABŞ-dakı səfirliklərinə qarşı təxribatlar törədilib. ABŞ-dakı səfirliyimizin avtomobilinə odlu silahdan atəş açılıb. Azərbaycan Respublikasının diplomatik missiyalarının mövcud olduğu ABŞ, Fransa, Livan və digər ölkələr belə halların qarşısını qətiyyətlə almalı və beynəlxalq hüquqa hörmətlə yanaşmalıdırlar.
2020-ci il 10 noyabrda Rusiya Federasiyasının vasitəçiliyi ilə üçtərəfli Bəyanat qəbul edilib. Azərbaycan bu Bəyanatdan irəli gələn öhdəliklərə sadiqlik nümayiş etdirir. O cümlədən, Azərbaycan Qarabağ iqtisadi zonasına Ermənistandan sərbəst giriş-çıxışı təmin edir. Lakin təəssüflər olsun ki, Ermənistan öz öhdəliklərini yerinə yetirmək istəmir və ya sadəcə vaxt uzatmaqla nəyəsə nail olmaq istəyir. Ermənistana məxsus silahlı birləşmələr Qarabağ iqtisadi zonasından çıxarılmayıb, Azərbaycanın Naxçıvan Muxtar Respublikasına girişi Ermənistan tərəfindən təmin edilməyib. Bütün bunlar Ermənistanın 2020-ci il 10 noyabr razılaşmasından irəli gələn hüquqi öhdəliklərin icrasından yayınmağa çalışdığını göstərir. Amma bütün hallarda 10 noyabr Bəyannaməsinin şərtləri yerinə yetirilməlidir.
Azərbaycan multikultural dəyərlərin daşıyıçısı kimi bütün millətlərin nümayəndələrinə hörmətlə yanaşır. Azərbaycan vətəndaşlığını qəbul edib, qanunlarımıza hörmətlə yanaşan erməni vətəndaşlar da ölkəmizdə qalıb yaşaya bilərlər. Qarabağın erməni əhalisinin hüquqları və təhlükəsizliyi Azərbaycan Konstitusiyasına uyğun olaraq təmin ediləcək.
Cavid Məmiyev
YAP Sumqayıt şəhər təşkilatının sədr müavini
Xəbərdən istifadə edərkən istinad etmək vacibdir.
