"Rusiyanın bizə münasibəti düzələn deyil”.  Bu açıqlama ilə Erkin Qədirli çıxış edib.   O, Rusiyanın "türk qurşağı” xəritəsindən qorxduğunu bildirib:   "TANAP-ın rəsmi təməl qoyuluşundan sonra xəbər yayıldı ki, Putin Ərdoğanla telefonda danışdı. Kimin kimə zəng etdiyi xəbərlərin mətnindən aydın olmadı. Sadəcə yazdılar ki, danışıq 30 dəqiqə sürdü. Açıqlamada deyilir ki, tərəflərin müzakirə etdiyi mövzular bunlar oldu: Rusiya-Türkiyə münasibətləri, Kırım tatarlarının vəziyyəti və 1915-ci il erməni məsələsi. Ola bilər, amma heç inanmağım gəlmir. Elədirsə də, həqiqətin hamısı deyil. Guman ki, telefonda danışılan mövzu elə TANAP olub. Heydər Əliyevin 90-cı illərin sonunda "Goble Planı" (ərazi mübadiləsi məsələsi) haqqında dedikləri yadıma düşdü. H.Əliyev o vaxt demişdi ki, böyük dövlətlərin birinin prezidenti ona zəng etdi və soruşdu: "Siz orada nə edirsiniz? Türk Qurşağı yaradırsınız?" Əliyev ad çəkməsə də, söhbətin Rusiya Prezidenti Boris Yeltsindən getdiyi aydın oldu. Putinin Ərdoğanla danışması da güman ki, eyni ehtiyatlanmadan doğdu. Çünki Rusiyanın bizə münasibəti düzələn deyil. Ermənistanın bir dövlət olaraq mövcudluğu və bizə təcavüzü də buna görədir. Böyük dövlətlərin ağlında "türk qurşağı" xəritəsi var. Həmin xəritənin kağızdan torpağa keçməsini əngəlləmək üçün çalışmalar davam edəsidir”.  (Axar.az)