ABDULLAYEV ELDAR FİRİDUN oğlu

(Hərbi feldşer, Baş gizir)

Qısa arayış:ELDAR FİRİDUN oğlu ABDULLAYEV 1981-ci il iyulun 23-də Sumqayıt şəhərində ziyalı ailəsində anadan olub. Sumqayıt şəhər 3 saylı tam orta məktəbdə təhsil alan yeniyetmə, daha sonra 35 saylı Peşə məktəbində oxuyub və 1998-ci ildə oranı "Soyuducu ustası” ixtisasına yiyələnərək uğurla bitirib.

E.Abdullayev 1999-cu ildə Azərbaycan Tibb Uni­ver­si­te­ti­nin "Hərbi Tibb” fakültəsinə daxil olub. 22 İyun 2001-ci ildə ali təhsil ocağını "Hərbi feldşer” ixtisası ilə müvəffəqiyyətlə bitirib və "Hərbi tibb işçisi” kimi fəaliyyətə başlayıb.

2001-ci ildən 701 saylı hərbi hissədə, 2003-cü ildən Ağdamın Sarıcalı hos­pi­ta­lında, Goran hərbi hissəsində, Bakıda Mərkəzi Hərbi Klinik Hospitalda və sonda, 30.10.2017-ci ildən Beyləqan kor­pusunda "Motoatıcı” taborun Tibb məntəqəsinin feldşeri, Tibb məntəqəsinin aptek rəisi - əczaçı, Tibb məntəqəsinin rəisi – feldşeri ("Avtomobil texnikası və əmlak” bazası), Hərbi Tibb Məktəbində "Tədris” bölüyünün "Feldşerlər hazırlığı üzrə” rəhbəri və s. vəzifələrdə xidmət göstərib. Həmçinin, (ATU-nun "Hərbi Tibb” fakültəsi) Bina komendantı-yataqxana rəisi, "Təminat” bölməsinin rəisi kimi məsuliyyətli vəzifələrin öhdəsindən gəlib.

Xidməti dövründə E.Abdullayevə "Motoatıcı tank tərbiyəvi iş, fiziki hazırlıq ixtisası üzrə” 2-ci məharət dərəcəsi (24.12.2007) və həmçinin 1-ci məharət dərəcəsi (25.12.2008) verilib.

Vətənin qeyrətli oğlu 2016-cı ildə baş verən Şanlı Aprel döyüşlərində iştirak edib.

Azərbaycan Silahlı Qüvvələrinin Baş giziri Eldar Abdullayev 22 illik hərbi fəaliyyəti dövründə "Qüsursuz xidmətə görə” 3-cü dərəcəli medal, "Azərbaycan Silahlı Qüvvələrinin 90 illiyi” (26.06.2008) və "Azərbaycan Silahlı Qüvvələrinin 95 illiyi” (26.06.2013), eləcə də ”Azərbaycan Ordusunun 100 illiyi” (26.06.2018) Yubiley medalları ilə təltif olunub.

---

Eldar uşaqlıqdan çox mehriban, gülərüz, ürəyiaçıq, saf qəlbli olub. Özünü ən sonda fikirləşən gənc, kimsə ona ağız açıb yardım is­tə­yibsə, heç nəyə baxmadan, həmin an köməyə yetişməyə can atıb. Cibinin axırıncı pulunu belə, tərəddüd etmədən ehtiyacı olana ve­rərək yardım əlini uzadıb. Mərdliyi, səxavətliliyi, darda olanı düşünməsi onun necə böyük ürəyə malik olmasından xəbər verib.

Eldar harada çalışıbsa, kiminlə təmasda olubsa gözəl ünsiyyət qurmaq qabiliyyətinə malik olan əsl İNSAN, qayğıkeş, diqqətcil, sədaqətli, etibarlı DOST, QARDAŞ, YOLDAŞ olub. İç dünyasının gözəlliyindəndir ki, hər kəs ona güvənib, sirrini, dərdini onunla bölüşüb. Kollektivdə qadınlara qarşı hörmətcil olmaqla yanaşı, hər birinə bir qardaş kimi dəstək olmağa ça­lışıb.

Vətənpərvər, qeyrətli, vicdanlı, dürüst insan olan Eldar Abdullayev hər zaman əsgərlərinə qarşı da diqqətcil olub. Onlara qarşı hər an ata, qardaş qay­ğısı bəsləyib.

E.Abdullayev kollektivdə sayılıb-seçilən insanlardan olub. O, doğma kollektivindən ayrılıb, öz istəyi ilə, ön cəbhəyə işləməyə getsə də, keşmiş iş yoldaşları ilə mütəmadi əlaqə sax­layıb.

Ağlı, zəkası, savadı, zəngin təxəyyülü və dünyağörüşü ilə çoxlarından fərqlənən E.Abdullayev yeri gələndə yol göstərib, düzgün, də­yərli məsləhətlər verib. O, hər zaman həkim adını, hərbiçi şərəfini uca tutub. Onun gənc kadrların, hərbi həkim və feldşerlərin üzərində əməyi danılmazdır.

AİLƏ:Abdullayevlər ailəsi 6 nəfərdən ibarət olub: ata, ana, evin tək qız övladı Aygün, Teymur, ekiz qardaşlar olan Eldar və ... Eldarın əkiz tayı 4 aylığında dünyasını dəyişib. Eldarın adını isə sevimli nənəsi Asya xanım qoyub. Sonradan nənəsinin onlarla birlikdə yaşamasından Eldar çox sevinib, çünki nənəsinin ona olan məhəbbəti tam başqa, fərqli idi...

Eldarın atası Firidun Abdullayev ixtisasca iqtisadçı-mühəndis olub. Ailənin bütün yükü Sumqayıtda tikinti sektorunda çalışan atanın çiyinləri üzərində idi. Telli xanım Sumqayıt şəhər 3 saylı tam orta məktəbdə gənc nəslə Coğrafiya fənnini tədris etməklə yanaşı, övladlarının təlim-tərbiyəsi, dərsləri, ev qayğıları ilə məşğul olub. Belə mehriban, ziyalı bir ailədə böyüyüb bizim Qəhrəmanımız!

2009-cu ilin oktyabr ayının 18-də Eldar Abdullayev sevib-seçdiyi Fəhimə xanımla ailə həyatı qurub və bu evlilikdən onların üç qız övladı dünyaya gəlib: Asya, Aysu və Ahu...

Eldar həddən çox ailəcanlı, istiqanlı, qayğıkeş, canıyanan olmaqla yanaşı, valideynlərinə, bacı-qar­da­şı­na, ailəsinə bağlı biri idi. Övladlarıyla nəfəs alan ata, onları o qədər çox sevərdi ki, şıltaqlıqlarından hər kəsə ağız­dolusu danışardı. Çox pozitiv, optimist insan idi Eldar. Öv­lad­larına özü lay-lay çalardı; hərbi mahnılarla və marşlarla. Qəribəsi o idi ki, qızlar da atalarının hərbi mahnıları üçün da­rıxardılar.

E.Abdullayev 2020-ci ildə ordudan tərxis olunub, ailəsinə, əzizlərinin yanına birdəfəlik qayıdacaqdı. Hər kəs o günü səbir­sizliklə gözləyirdi. Deyirdi, "nəhayət, ailəmlə, övladlarımla, anam, qardaşım, bacımla birlikdə sakit bir həyat yaşayacam”. Geniş, rahat həyət evi almaq istəyirdilər ki, hamı birlikdə mehriban, xoşbəxt yaşaya bilsin. Tükənməz arzuları, planları vardı onun...

A.Eldarın hərbiyə həsr olunan 20 illik həyatının demək olar ki, 15 ili səngərlərdə keç­mişdi. Bu müddətdə doğmaları ilə bir yerdə çox az zaman keçirmişdi. Onun ailəsi ilə olan görüşləri uzun illərin həsrətlilərinin görüşünü xa­tır­ladardı...

Azərbaycan Ordusunun Baş giziri, hərbi tibb qulluqçusu Eldar Abdullayev 2020-ci il sentyabrın 27-də, Azər­bay­can Silahlı Qüvvələri tərəfindən Ermənistanın işğalı altında olan ərazilərin azad edilməsi üçün, başlanan Vətən mü­ha­ribəsinin ilk günlərindən döyüşlərə qatılır. Füzuli, Cəbrayıl, Hadrut, Zəngilan uğrunda gedən döyüşlərdə fədakarlıq göstərərək, xeyli sayda ağır yaralı hərbiçiləri dö­yüş meydanından çıxarır, yüngül yaralılara tibbi yardım göstərir. Şəhid olanları arxaya təxliyə edən həkim, öz həyatını zərbə altına qoyur. Bu müddətdə o, xeyli sayda yaralı və şəhidlərimizi minalanmış zonadan çıxarmaqla, öz həyatını təhlükəyə atır...

E.Abdullayev döyüşlər başlayan ilk gündən etibarən öndə olur. Heç kimin cəsarəti çatıb girə bilmədiyi çətin mövqelərə sinəsini qabağa verərək daxil olan hərbiçi-hə­kimə dəfələrlə riskli yerlərə getməmək tövsiyə olunsa da, o, heç nədən qorxmaz, israr edərək, canını belə düşün­mədən lazım olan mövqeyə gedər, yaralılara yerində yardım edib, təxliyə edərdi. Qorxubilməz igidimiz, hərbiçi və həkim kimi, iki şərəfli missiyanı ləyaqətlə yerinə yetirirdi.

Həmkarları Eldara igidliyinə, qorxmazlığına, cəsarət və mərdliyinə görə, öz aralarında "terminator” deyə müraciət edir­dilər. Nə qədər mülayim, xoş xasiyyətli olsa da, cəbhədə mübariz, inadkar, əqidəsindən dönməyən, sonacan məqsədə doğru gedən möh­kəm iradəli şəxsiyyət idi.

Eldar Abdullayev Vətən torpaqlarının azadlığı uğrunda gedən ağır döyüşlərin birində yaralanır. Buna baxmayaraq, arxada qalıb dincəlmək istəmir.

Oktyabrın 18-i 2020-ci ildə Eldarın evliliyinin 11 illiyi idi. Səhər tezdən həyat yoldaşına zəng edir. Onu təbrik etdikdən sonra, gün ərzində əla­qə saxlayacağını bidirir. Lakin döyüşə gedəcəyi haqqında bir kəlmə də demir...

Hadrut rayonunun mərkəzində qızğın döyüşlər başlayır. Hərbi həkim döyüş bölgəsində yaralılara koməklik göstərir, onları ərazidən təxliyyə edirdi. 20-dən çox yaralını ölümün pən­cəsindən xilas edən həkim düşmənlə üzbəüz dayanmalı olur və qəfildən düşmənin gülləsinə tuş gəlir. Cəsur hərbi həkim yaxın məsafədən ürəyindən vurularaq hə­yatını itirir. Vətən sevdalı İgidimiz əbədi olaraq gözlərini yumaraq, hər kəsə nəsib olmayan ən ali məqama - Şəhidlik Zirvəsinə ucalır...

Bu gün Eldar Abdullayevin iş yoldaşları belə bir insanı itirdiklərinə görə, təəəsüflənərək qeyd edirlər ki, "Şəhidlərimizin canı bahasına bu Qələbəni qazandıq. Qürurvericidir. Lakin nə qədər fəxredici olsa belə, Eldar kimi gözəl qəlbli insanların yoxluğunu qəbul etmək bir o qədər əzablıdır”.

Eldar Abdullayev döyüşə gedəndə həyat yoldaşı Fəhimə xanıma demişdi: "Sən məni Cənnəti sağlığında qazanan ata etdin. Qızım dünyaya gələndə adını "Ahu” qoyarıq”. Cəfakeş ata qız öv­ladlarını sevdiyindən, hələ dünyaya göz açmayan qızına ad da fikirləşmişdi... Təəssüf ki, o günü görmək ona nəsib olmur... Qəhrəmanımızın Şəhidliyindən sonra 3-cü qız övladı dünyaya və atanın arzusunu həyata keçirərək, körpənin adını "Ahu” qoyurlar.

Bu gün Abdullayevlər ailəsində körpə qığıltısı eşidilir. Bu, dünyaya yeni gəlmiş, atası tərəfindən adı verilmiş Ahunun sə­si­dir. Eldar Abdullayev və onun Şəhid yoldaşları gül balaların xoşbəxt gələcəyi naminə, düşməni birdəfəlik məhv edib, tor­paqlarımızdan qovdular. İllər, əsrlər keçəcək, zaman, insanlar dəyişsə də, Tarix və onu yazan Qəhrəmanların adları nə­sil­dən nəsilə ötürüləcək. İnanırıq ki, Eldar Abdullayevin bizlərə qalan əmanəti -övladları onun adını uca tutmaqla bu tarixi qoruyacaq və ya­şa­dacaqlar...

Soruşsalar ki, "Vətən haradan başlanır?”, hər bir Şəhid ailəsi kimi, Abdullayevlər ailəsinin də hər bir üzvü dillənərək cavab verər: "Vətən bi­zim evimizdən başlanır. O evdən ki, orada Vətənin hər qarış torpağı uğrunda candan keçməyə hazır olan vətənpərvər oğul böyüyüb, boya-başa çatıb. O evdən ki, orada bir ata doğmalarını, ailəsini, yavrularını gözüyaşlı, yalqız qoy­maq­dan çəkinməyərək, Haqq yolu uğrunda mübarizəyə qoşularaq, ölümün gözünə dik baxdı, Allah dərgahına yolunu sal­dı... O evdən ki, orada bir Şəhid ruhu dolaşır!!!”...

Azərbaycanın qeyrətli, ccəsur, qorxmaz, igid oğlu Eldar Abdullayev oktyabr ayının 19-u 2020-ci ildə Sumqayıt Şəhidlər Xiyabanında dəfn olunur.

Azərbaycan Silahlı Qüvvələrinin Baş giziri və Hərbi tibb qulluqçusu, qəlbi hər zaman Vətən sevgisi ilə çırpınan 39 yaşlı Eldar Firidun oğlu Abdullayev ölümündən sonra, Azər­baycan Respublikasının prezidenti İlham Əliyevin müvafiq Sərəncamlarına əsasən, "Vətən uğrunda” və "Xocavəndin azad olunmasına görə” medalları ilə təltif olunub.

Ruhun şad olsun, Cənnətməkan Şəhidimiz!!!

Aygün Hacıyeva,

AJB, AYB, AAB-nin üzvü