(Yazı Şəhidlərimizin Sumqayıt Şəhidlər Xiyabanında dəfn olunma ardıcıllığı ilə verilib).

"Qarabağ” ordenli QULİYEV ŞƏHRİYAR NƏSİB oğlu

(Gizir)

Xüsusi Təyinatlı Qüvvələrin yenilməz, məğrur kəşfiyyatçısı ŞƏHRİYAR NƏSİB oğlu QULİYEV 25 may 1990-cı ildə Ağdam rayonunda anadan olub. Şəhriyar 2 yaşında olan zaman, Ağdam rayonunun ermənilər tərəfindən işğal olunması nəticəsində məcburi köçkün həyatı yaşayan Quliyevlər ailəsi Sumqayıt şəhərinə pənah gətirir. Yaşının üstünə yaş gəldikcə həyatı dərk etməyə başlayan azyaşlı oğlanın qəlbinin dərinliyində mənfur düşmənə qarşı yaranmış nifrət hissi də artmağa başlayır...

Q.Şəhriyar 1997-2008-ci illərdə Sumqayıt şəhər 15 və 28 saylı tam orta məktəblərdə oxuyur. Məktəbi bitirdikdən sonra, tələbə olmaq arzusu ilə, sənədlərini Azərbaycan Dövlət Universitetinə verir, lakin topladığı bal qənaətbəxş olmadığından, ali təhsil ocağına qəbul ola bilmir.

2008-ci ilin oktyabr ayında Sumqayıt Şəhər Hərbi Komissarlığından "Çağırış” vərəqəsi alan Ş.Quliyev, Vətənə olan borcunu ödəmək üçün, Xızı rayonunun Yaşma kəndində yerləşən "N” saylı hərbi hissədə həqiqi hərbi xidmətə başlayır. Vətənə olan hədsiz sevgisi, uşaqlıqdan hərb sənətinə olan böyük həvəsi, hərbiçi olmaq arzusu gənc əsgərdə hərbidə qalıb xidmət etmək istəyini artırır.

Ş.Quliyev həqiqi hərbi xidmətini başa vurduqdan sonra, Xüsusi Təyinatlı Qüvvələrin 6 aylıq kurslarına yazılır və kursu "Gizir” rütbəsi ilə bitirir. XTQ sıralarında müddətdən artıq həqiqi hərbi xidmət qulluqçusu kimi, xidmətinə davam edir. O, XTQ-nin döyüş qrupunda kəşfiyyatçı olur.

Ş.Quliyev 2016-cı ildə Şanlı Aprel döyüşlərində də iştirak edir. Ağlı, zəkası, döyüş taktikası, cəldliyi ilə seçilərək, bir çox döyüş əməliyyatlarında uğur qazanır. Şəhriyar hələ uşaq yaşlarından vətənpərvər ruhda böyümüşdü. Valıideynləri mənfur qonşularımızın xalqımızın başına gətirdikləri oyunlardan danışarkən, o, yumruqlarını sıxar, düşmənə olan kin-küdurəti daha da artardı. Hələ ailəsinin doğma dədə-baba yurdlarından qovulmasını unutmaqmı olardı? Bəlkə, elə baş verənlərin təsirindən idi ki, o, tarixi və döyüş filmlərini maraqla izləyər, tarixi və detektiv əsərləri mütaliə edərdi.

Sakit, mülayim təbiətli görünsə də, haqsızlığa, ədalətsizliyə qarşı sərt mövqedə olan gənc, fikirlərini açıq şəkildə söyləməkdən çəkinməzdi. Riyadan, pislikdən, təkəbbürdən uzaq biri idi. Əməlləri xeyirxahlıqdan yoğrulmuşdu Vətənini, xalqını canından üstün tutan igidin. Hər zaman haqqını tələb edən, sözün düzünü danışan, kimsəsizə, zəifə yardım edən idi qəhrəmanımız. Düzgün olmayan hərəkət, yalan, fitnə-fəsad olan yerdə əsəbləri tarıma çəkilərdi. O, həyata doğrucul gəlmişdi, hamını da elə görmək istəyirdi.

"Ailə kiçik cəmiyyətdir” deyirlər. Elə qəhrəmanımız da öz kiçik cəmiyyətini yaratmaq məqsədilə, 08.07.2015-ci il tarixdə sevib bəyəndiyi Pərvin xanımla ailə həyatı qurur.Və bu evlilikdən ailənin ilk sevinc payı olan Camal, daha sonra Ramal dünyaya gəlir. Beləcə, gözəl bir ailə tablosu yaranır. Bu tabloda Şəhriyar özünü dünyanın ən xoşbəxt insanı sanır və ən gözəl günlərini yaşayır...

Şəhriyar həddən artıq ailəcanlı, mehriban, qayğıkeş, diqqətcil insan olub. Əziz-doğmalarının hər zaman qayğısına qalar, hamını mehriban görmək istəyərdi. Qayda-qanuna, təmizliyə riayət edən, nizam-intizamı sevən, işi ailə ilə qarışdırmayan, hər hərəkətini, sözünü yüz ölçüb-biçən, qanacaqlı, mərifətli, vicdanlı idi. Elə bu, müsbət keyfiyyətlərinə görə də, hamı tərəfindən sevilərək, hörmət və rəğbət qazanmışdı.

Ailəsinə qarşı çox məsuliyyətli, düşüncəli idi. İşdən nə qədər yorğun gəlsə də, övladları ilə vaxt keçirəndə bütün yorğunluğunu unudardı. Birlikdə gəzməyi, təbiətin qoynunda olmağı sevərdi. Balalarını sağlam və xoşbəxt gormək istəyirdi. Hər zaman deyirdi:"Oğlanlarımın həyatı özləri kimi yaraşıqlı olsun. Heç zaman müharibə görməsinlər”.

2020-ci il sentyabrın 27-də II Qarabağ müharibəsinin başlanması zamanı igid, qorxmaz kəşfiyyatçı artıq döyüş bölgələrində ağır əməliyyatlarda iştirak edirdi. Cəsur döyüşçü Füzuli, Cəbrəyıl rayonlarının, Hadrut qəsəbəsinin alınmasında misilsiz şücaət göstərir.

Yaşmanın 1-ci tabor, 1-ci döyüş qrupunun kəşfiyyatçısı Şəhriyar Quliyev II Qarabağ müharibəsində xüsusi təyinatlılara verilən xüsusi döyüş tapşırıqlarının ən ağırlarında iştirak edir. O, topoqrafiyanı, xəritəni mükəmməl bildiyindən bir çox əməliyyatlarda bələdçilik edirdi. 10 km. hədəf normalda 40 dəqiqə gedilməli idisə, Şəhriyar şəxsi heyəti xəritəylə elə yerlərlə aparırdı ki, həmin hədəfə 20-25 dəqiqəyə çatırdılar.

Ş.Quliyev xəritəni çox yaxşı bildiyi üçün dağ təlimində birinci yerə layiq görülmüşdü.

İgidimiz Füzuli istiqamətində xüsusi, çox çətin bir tapşırığı uğurla yerinə yetirir. AKM avtomatının lüləyinə susdurucu quraşdırıb düşmənə pusqu qurur. Bu vaxt düşmənin bir "URAL”ını, şəxsi avtobilini, canlı qüvvəsini məhv edir.

Ş.Quliyev Cəbrayıl rayonu uğrunda gedən döyüşlərdə də düşmənə qarşı böyük ruh yüksəkliyi ilə vuruşur. Qorxubilməz kəşfiyyatçı azad olunmuş Çəbrayıla üçrəngli bayrağımızı şəxsən özü sancır.

Hadrut qəsəbəsinin azad olunması uğrunda aparılan əməliyyat zamanı Ş.Quliyev bir polkovniki və yanındakı iki zabiti izləyərək, arxalarınca 500 metr yolu qət edir, onlara pusqu qurur. Düşməndən lazımi məlumatı əldə etdikdən sonra, onları məhv edib, ərzaqla dolu hərbi çantalarını döyüş yoladaşlarına çatdırır. 3 gün ac qalan 11 nəfər hərbiçi yoldaşını, beləcə, aclıqdan xilas edir. Bu idi bizim qorxubilməz, əyilməz, mətin, məğrur, şir ürəkli İgidimiz!

Hadrut istiqamətində baş verən digər bir hadisə:Döyüşlərdə Ermənistanın XTQ-ləri ilə Şəhriyargilin XTQ-ləri üzbəüz dayanırlar. Şəhriyargilin qrupu xususi plan cızaraq, düşməni mühasirəyə alır, 70 nəfərə yaxın əsgər və zabiti əsir götürürlər.

Beləcə, XTQ-nin cəsur döyüşçüsü Şəhriyar QuliyevII Qarabağ müharibəsi başlanan gündən torpaqlarımızın azadlığı uğrunda gedən döyüşlərdə iğidlik göstərərək, 27 gün ərzində yüzlərə erməni əsgər və zabitini məhv edir, zirehli texnikasını sıradan çıxardır.

Ş.Quliyev çox savadlı və peşəkar kəşfiyyatçı idi. Heç vaxt yorulmaq bilməyən cəsur kəşfiyyatçı yoldaşlarına deyərdi: "Doğma Ağdam torpağı, Qarabağım yağı düşmənin tapdağı altındaykən, mənə rahatlıq yoxdur. Biz düşməni məhv etdikcə, torpaqları azad etdikcə mənə güc gəlir. O vaxt rahat olub istirahət edəcəm ki, bütün torpaqlarımız işğaldan azad olunsun. Şuşayacan gedəcəyik!”.

Sonuncu dəfə oktyabrın 23-də Qubadlının azadlığı uğrunda gedən döyüşlərə qatılır kəşfiyyatçımız. Düşmən qüvvəsi 3 dəfə çox olsa da, Azərbaycan Ordusunun mübariz əsgər və zabitləri ölümün gözünə dik baxaraq sonacan rəşadətlə mübarizə aparırlar. Döyüş get-gedə qızışır, atılmış topların, mərmilərin tüstüsündən göz-gözü görmür. Şəhriyar döyüş meydanından növbəti yaralını çıxarmaq istəyəndə düşmənin snayperdən açdığı gülləyə tuş gəlir. Bir igidin ömrü arzuları ilə birlikdə məhv olsa da, hər kəsə nəsib olmayan ŞƏHİDliyin şərbətini dadaraq ən uc məqama ucalır qəhrəman Vətən oğlu!

O, Qarabağlı olması ilə fəxr edərdi. Son nəfəsinə qədər Qarabağlı kimi də döyüşdü. Bu gün Şəhriyarı tanıyan hər kəs bircə kəlmə deyir: "Onun kimi oğullar bir daha dünyaya gəlməyəcəklər!”.

Onun şəhid olacağına heç kim inanmırdı. Hamının beyninə cəsur, qorxmaz, gülləbatmaz insan kimi həkk olunmuşdu Şəhriyar! Xidməti dövründə hər zaman seçilmişdi: nizam-intizamda, təlimlərdə, idmanda... Döyüş tapşırıqlarında aktiv olmuşdu. Əsl kəşfiyyatçı idi Şəhriyar! Savadından hər kəs bəhrələnər, peşəkarlığı, işində dəqiq olması ilə hər kəsə örnək olardı.

Şəhriyar Quliyevin demək olar, bir çox qabiliyyətləri vardı. Şeir yazmaq, ov ovlamaq... O, Gürcüstanda dağ təlimlərində göstərdiyi yüksək normativə görə I yerə çıxmışdı. 12 illik xidməti dövründə bir çox beynəlxalq hərbi təlimlərdə iştirak etmişdi, saysız-hesabsız Fəxri Fərman, Diplom və Sertifikatlarla təltif olunmuşdu. 26.03.2013-cü ildə "Azərbaycan Silahlı Qüvvələrinin 95 illiyi” Yubiley medalına layiq görülmüşdü.

Azərbaycan Ordusunun XTQ-nin yenilməz, cəsur kəşfiyyatçısı Şəhriyar Quliyev 23 oktyabr 2020-ci il tarixdə Sumqayıt Şəhidlər Xiyabanında dəfn olunur.

Bu gün qəhrəmanımızın iki oğul övladı bizlərə - Azərbaycan xalqına əmanətdir! Şəhriyar Quliyev və onun Şəhid olmuş silahdaşları məsum, gül balalarımızın parlaq sabahları naminə canlarından, qanlarından keçməyə hazır oldular! İnanırıq ki, tarixin yaddaşına həkk olunan Şəhidlərimizin həyat və şərəfli döyüş yolları hər bir gənc üçün "Böyük Məktəb” olacaq!

Azərbaycanın qeyrətli, namuslu, vicdanlı, ləyaqətli oğlu, XTQ-nin 30 yaşlı kəşfiyyatçısı, gizir Şəhriyar Nəsib oğlu Quliyev ölümündən sonra, Azərbaycan Respublikasının prezidenti İlham Əliyevin müvafiq Sərəncamlarına əsasən, "Qarabağ” ordeni,"Vətən uğrunda”, "Cəbrayılın azad olunmasına görə”, "Füzulinin azad olunmasına görə” və"Xocavəndin azad olunmasına görə”medallarıilə təltif olunub.

Ruhun şad olsun, Cənnətməkan Şəhidimiz!!!

------------------

"Vətən müharibəsi Qəhrəmanı”medallı

CƏBRAYILOV SÜBHAN RAHİM oğlu

(Baş gizir)

Doğum günündə Şəhadətə qovuşan, "Şir” ləqəbli, "Şir ürəkli cəngavər”adlı kəşfiyyatçı SÜBHAN RAHİM oğluCƏBRAYILOV23 oktyabr 1983-cü ildə Salyan rayon Marışlı kəndində sadə, zəhmətkeş bir ailədə dünyaya göz açıb. 1990-2001-ci illərdə R.Qafarov adına Marışlı kənd tam orta məktəbində təhsil alıb.

Hələ məktəbdə oxuduğu illərdə dərs hazırlığı, davamiyyəti, təlim-tərbiyəsi, əxlaqı, davranışı ilə seçilən, xoş xasiyyəti və ciddi xarakteri ilə sinif yoldaşlarının və müəllim kollektivinin rəğbətini qazanan Sübhan Cəbrayılov idmana da xüsusi maraq göstərir. "Boks”, "Əlbəyaxa döyüş” (MMA) idman növü ilə ciddi məşğul olur. Dəfələrlə yarışlara çıxır, yüksək nailiyyətlər qazanır, bir çox Fəxri Fərman, Diplom və meddallarla təltif olunur.

2 Aprel 2002-ci ildə Salyan rayon Hərbi Komissarlığı tərəfindən həqiqi hərbi xidmətə çağrılan gənc oğlan, ASQ-nin Bakıdakı "N” saylı hərbi hissəsində xidmətə başlayır. Elə xidmətdə olduğu illərdə hərbiçi olmağa qərar verir. Xidməti dövründə XTQ-nin "Gizir” kursunu müvəffəqiyyətlə bitirdikdən sonra, Xızı rayonundakı "N” saylı hərbi hissənin Xüsusi Təyinatlı Qrupunda kəşfiyyatçı (sanitar) kimi xidmət etməyə başlayır.

Sübhan Cəbrayılov uşaq yaşlarından doğma Ana dilinin vurğunu idi. Onu daha dərindən və mükəmməl bilməyə çalışırdı. Milli sərvətimiz olan Dilimizin tarixi köklərini öyrəndikcə zənginliyinə heyran qalırdı. Ümimiyyətlə, müxtəlif xalqların tarixi, dili, mədəniyyəti, adət-ənənəsi onun üçün maraqlı olduğundan, zamanla özü də bir neçə dili mükəmməl mənimsəyir. Rus, türk dillərində sərbəst danışmağı bacarırdı. O, hətta mənfur düşmənin - ermənilərin də dilini öyrənmişdi. Necə deyiblər: "Düşməninə qalib gəlmək üçün ilk öncə onun dilini və mədəniyyətini öyrənməlisən”.Kəşfiyyat zamanı düşmənin dilini mükəmməl bilməsi bir çox taktiki vəziyyətlərdə kəşfiyyatçımıza kömək olmuşdu.

Sübhan Cəbrayılov işlədiyi dövrlərdə savadı, bacarığı, qabiliyyəti, zəkası, yüksək potensialı, həyata açıq-aydın baxışı, zəngin dünyağörüşü ilə seçilmiş, rəhbərliyin və yoldaşlarının rəğbətini qazanmışdı.

AİLƏ:Cəbrayılovlar ailəsi ata, ana və dörd uşaqdan ibarət olub. Sübhan ailənin sonbeşiyi idi. Valideynlərin hər ikisi ali təhsilli olub. Ata uzun illər kənddə briqadir işləyib, torpaq, əkin-biçin işləri ilə məşğul olmaqla ailəsini dolandırıb. Ləzifə xanım evdar qadın olmaqla, ailə qayğıları ilə yaşayıb. Rahim bəy 2003-cü ildə rəhmətə gedəndən sonra evin bütün ağırlığı ananın çiyinləri üzərinə düşüb...

Sübhan Cəbrayılov hərbi xidməti başa vurduqdan sonra, sevib bəyəndiyi Sevda xanımla ailə həyatı qurur. Bu evlilikdən onların iki övladı dünyaya gəlir. Rahimin, Fidanın həyata gəlişi ailəyə sözə sığmayan sevinc bəxş edir. İxtisasca İbtidai sinif müəllimi olan Sevda xanım, yoldaşı hərbiçi həyatı yaşadığından, bütün diqqətini uşaqların təlim-tərbiyəsinə, ev qayğılarına yönəldir və bütün işlərlə özü məşğul olur...

S.Cəbrayılov 2016-cı ildə Şanlı Aprel döyüşlərində iştirak edərək misilsiz şücaət göstərənlərdən biri olur. Ermənistan Ordusunun "yenilməz Ohanyan xətti” kimi tanınan müdafiə xəttinin 40 dəqiqə ərzində darmadağın edilməsində onun da böyük rolu olur. İgid Vətən oğlu bu döyüşlərdə İlk Zəfər Qələbəsini yazanlardan biri sayılır.

Aprel döyüşlərindən sonra hərbi hissəyə gələn Ölkə Prezidenti, Ali Baş Komandan İlham Əliyevin görüşdüyü hərbiçilərin arasında XTQ-nin Baş giziri Sübhan Cəbrayılov da olur. Xidmətdə fərqləndiyinə görə, o da Rəhbərlik tərəfindən təltif olunur.

2020-ci il sentyabr ayının 27-də Ali Baş Komandan İlham Əliyevin əks-hücum əmri ilə, II Qarabağ müharibəsi başlandığı andan S.Cəbrayılov Füzuli rayonunun, Hadrut qəsəbəsinin, Ərgünəş yüksəkliyinin, həmçinin Cəbrayıl, Zəngilan, Qubadlı rayonlarının düşməndən azad edilməsində yaxından iştirak edir. Düşmənlə qanlı döyüşlərdə şücaət göstərən igidin adı dillər əzbəri olur.

S.Cəbrayılov 19 oktyabr 2020-ci ildə Qubadlı istiqamətində gedən döyüşlərə qatılır. O, rayonun azad olunması uğrunda gedən siddətli döyüşlərdə qəhrəmanlıq göstərərək, neçə-neçə yaralı yoldaşlarının həyatını xilas edir, düşmənin xeyli sayda canlı qüvvəsini, zirehli texnikasını sıradan çıxarır. Qızğın döyüşlər zamanı düşmənin snayperdən açdığı atəş nəticəsində Vətənin qeyrətli oğlu qəhrəməncasına həlak olaraq, Allah dərgahında ən uca məqama yüksəlir – Şəhidlik Zirvəsinə!

Hər bir gəncə örnək olacaq şərəfli döyüş yolu keçir 37 yaşlı igidimiz Sübhan Cəbrayılov! İgidimizin sayəsində bu gün neçə-neçə əsgərimiz həyata qayıdıb. Bu gün təkcə qəhrəmanımızızn həyatını xilas etdiyi silahdaşları deyil, qəlbi Vətən eşqilə çırpınan hər bir azərbaycanlı azad olunmuş torpaqlarımıza ayaq basanda, canı, qanı ilə Qələbə sevincini yaşadanlardan, Zəfər tarixini yazanlardan biri olan Sübhan Cəbrayılovu xoş xatirələrlə anır, ruhuna dualar oxuyur!

Vətən sevdalı Sübhan Cəbrayılov varlığıyla bütün dəstəyə stimul verirdi. Hər kəs arxasında vüqarlı bir dağın durduğunu hiss edirdi. Qorxu, hürkü nə olduğunu bilməyən mətin döyüşçü silahına sarılaraq, Qələbə əzmi ilə yalnız irəli atılırdı. Silahdaşları da onun arxasınca gedirdilər. Çünki bilirdilər ki, Sübhan onlarladısa, deməli hər şey yaxşı olacaq!

S.Cəbrayılov insani keyfiyyətlərinə, gözəl xüsusiyyətlərinə görə, hərbi fəaliyyəti dövründə ətrafındakı insanların hər birinin sevgi və rəğbətini qazanmışdı. Təkcə yaşına görə deyil, ağlına, fərqli düşüncəsinə, gözəl məsləhətlərinə görə ona "bizim ağsaqqalmız” da deyirdilər. Silahdaşları qeyd edirlər ki, "o yanımızda olanda biz döyüşə gözüyumulu girirdik, bilirdik ki, Sübhan bizimlədirsə, Qələbə də bizimlədir”.

Qəhrəmanımızın ən dəyərli keyfiyyətlərindən biri qarşısındakını səbrlə dinləmək, fikrini aydın şəkildə, aramla başa salmaq qabiliyyəti idi. Bəlkə, elə buna görə idi ki, əksər əsgərlər təkcə işlə bağlı deyil, ailə məsələlərini də ona etibar edib söyləyər, lazımi məsləhət alardılar. O, hər kəsə ata, qardaş, dost qayğısı ilə yanaşardı. Bu gün hər kəs "Sübhanı itirməklə biz çox şey itirmişik” deyir...

Baş gizir döyüş yoldaşlarının, həmyaşıdlarının arasında "Cəbi”ləqəbi ilə də tanınmışdı. Ciddi görünüşü ilə, qıyqacı baxışlarıyla, gözaltı gülümsəməsi ilə, az danışıb çox iş görməsi ilə... – belə qaldı hər kəsin yaddaşında ŞƏHİDİMİZ!

Bu gün Şəhidimizin iki övladı bizə əmanətdir. Qəhrəmanımız hər zaman övladlarının milli vətənpərvərlik ruhunda böyümələrini, savadlı, öz işlərində peşəkar olmalarını istəyirdi. Qəhrəmanımızın övladları onunla qürur duyaraq deyirlər: "Biz hər zaman atamızla fəxr etmişik! Təlimə, döyüşə gedəndə belə, bilirdik ki, o, sağ-salamat qayıdacaq. Amma bu dəfə belə olmadı... Çox üzülürük, onunçün çox darıxırıq... Amma ən uca zirvədə olması ilə fəxr edirik!”.

Azərbaycan Ordusunun məğrur döyüşçüsü, mətin zabit Sübhan Cəbrayılov məhz doğulduğu gün - 23 oktyabr 2020-ci ildə Sumqayıt Şəhidlər Xiyabanında dəfn olunur.

Sübhan Cəbrayılov əsl Allah adamı idi. Vaxtlı-vaxtınada namaz qılar, oruc tutar, Quran oxuyardı. Quran kitabı hər zaman əlinin altında olub, gedib-gəlib o kitabı vərəqləyib. Sanki bununla rahatlıq tapıb. Son gününə, son dəqiqəsinə qədər imkan tapıb namazını qılıb, ibadətini edibdir.

S.Cəbrayılov kitablarda, internetdə şəhidlikə bağlı araşdırmalar aparırdı. Hətta həyat yoldaşına da bu barədə danışar, bəzi məqamları başa salardı. Sevda xanım vurğulayır ki, "o, özünü sanki Şəhidlik Zirvəsinə hazırlayırdı”.

Bəli, qəhrəmanımız hər ehtimala artıq özünü bu müqəddəs yola hazırlayırmış. Son döyüşə, axırıncı təlimə getməmişdən əvvəl ömür-gün yoldaşına hər şeyi başa salıb, öyrədib.

Uca Allah sevimli bəndəsinin - ailəsinə son vəsiyyətini edib, özünü arzuladığı məqama hazırlayan Sübhan Cəbrayılovun səsini eşidərək onu arzusuna qovuşdurdu. Vətən aşiqi olan igidimiz elə arzuladığı Şəhidliyi doğum günündə özünə hədiyyə elədi!

23 Oktyabr – şəhidimizin dunyaya gəldiyi və dünyadan köç etdiyi tarix! Ailənin bir gündə qeyd edəcəyi sevinc və kədərin qovuşduğu bir tarix! Əslində görünən dünyaya gəliş tarixini sevincli gün kimi qəbul etsək də, ikinci – "ölüm” adlandırdığımız tarix Şəhidlikdirsə, insanın Allah dərgahında olan Cənnnətdəki yeri ən önəmli "Doğum” tarixidir. Budur vacib olan!

Sübhan Cəbrayılov 19 illik xidməti dövründə bir çox mükafatlara layiq görülürb: "Azərbaycan Respublikasının Silahlı Qüvvələrinin 90 illiyi” (1918-2008) və 95 illik (1918-2013) Yubiley medalları; "Qüsursuz xidmətə görə” 3-cü (26.06.2012) və 2-ci dərəcəli (26.06.2017) medallar və "Azərbaycan Ordusunun 100 illiyi” (1918-2018) Yubiley medalı ilə.

Azərbaycanın ərazi bütövlüyü uğrunda Haqq savaşında canından, qanından keçən "Şir ürəkli” İgidimiz, XTQ-nin 37 yaşlı Baş giziri SübhanRahim oğlu Cəbrayılov ölümündən sonra, Azərbaycan Respublikasının prezidenti İlahm Əliyev müvafiq Sərəncamlarına əsasən, "Vətən Müharibəsi Qəhrəmanı” medalına,həmçinin"Vətən uğrunda”, "Cəbrayılın azad olunmasına görə”, "Füzulinin azad olunmasına görə” və"Xocavəndin azad olunmasına görə” medallarıilə təltif olunub.

Ruhun şad olsun, Cənnətməkan Şəhidimiz!!!

Aygün Hacıyeva,

jurnalist, yazıçı-publisist