Sizinlə fəxr edir, qürur duyuruq, Vətən sevdalı oğullar!!!

Ruhunuz şad olsun!!!

(Yazılar Şəhidlərimizin Sumqayıt Şəhidlər Xiyabanında dəfn olunma ardıcıllığı ilə verilib).

--------------------------

HƏSƏNZADƏ MƏHƏMMƏDƏLİ HÖRMƏT oğlu

(Əsgər)

Qısa arayış: HƏSƏNZADƏ MƏHƏMMƏDƏLİ HÖRMƏT oğlu01 may 1999-cu ildə Sumaqayıt şəhərində anadan olub. 2005-2016-cı illərdə Sumqayıt şəhərində yerləşən Qubadlı rayon Qurban Məmmədov adına Yuxarı Mollu kənd orta məktəbində oxuyub. 2016-2020-ci illərdə Azərbaycan Turizm və Menecment Universitetinin "Biznesin idarə edilməsi” fəkültəsində təhsil alıb və "Menecment” ixtisasına yiyələnib.

M.Həsənzadə təhsil illərində savadı, qabiliyyəti, universitetin ictimai həyatında fəallığı, tədbirlərdə aktiv iştirakı ilə seçilib, gözəl, insani keyfiyyətlərinə görə, pedaqoji kollektivin və tələbə yoldaşlarının hörmətini və rəğbətini qazanıb.

H.Məhəmmədəli 02.07.2020-ci il tarixdə Səfərbərlik və Hərbi Xidmətə Çağırış üzrə Dövlət Xidmətinin Qubadlı rayon bölməsi tərəfindən həqiqi hərbi xidmətə çağrılıb. Gənc əsgər xidmətinə Sumqayıt şəhər H.Z.Tağıyev qəsəbəsində yerləşən "N” saylı hərbi hissədə başlayıb. O, Andiçmə mərasimindən sonra Qusar rayonundakı "N” saylı hərbi hissədə xidmətinə davam edib.

AİLƏ:Əslən Qubadlı rayonundan olan Həsənovlar ailəsi 1993-cü ildə, I Qarabağ savaşında Qubadlı rayonu mənfur qonşularımız tərəfindən işğal olunduqdan sonra, Sumqayıt şəhərinə pənah gətirib. Hörmət bəy və Vüsalə xanım Qubadlı torpağında anadan olub, böyüyüb boya-başa çatsalar da, ayrılıqda hər ikisinin ailəsi yurd yerindən didərgin düşüb. Gənclər Sumqayıtda tanış olaraq ailə həyatı qurub. Bu evlilikdən ailənin sevinc payları olan iki oğlan uşağı dünyaya gəlib.

Hörmət Həsənöv I Qarabaş müharibəsinin iştirak edib, düşmənə qarşı ləyaqətlə, mərdliklə mübarizə aparıb. Uzun müddət polis sistemində çalışıb, əsayişin keşiyində duraraq Vətənə layaqətlə xidmət göstərib, sonradan təqaüdə çıxıb. Hörmət bəy daha sonra mülki işdə - Sumqayıt Şəhər Təmizlik Departamentində işləyərək ailəsini halal zəhməti ilə dolandırıb. Vüsalə xanım evdar xanım olaraq, ailə qayğıları ilə yanaşı, uşaqların təlim-tərbiyəsi, dərsləri ilə məşğul olub.

2002-ci il fevral ayında Sumqayıt şəhərində anadan olan evin sonbeşiyi Sahil Həsənzadə Azərbaycan Dövlət Neft Sənaye Universitetinin tələbəsidir. Və bizim qəhrəmanımız Məhəmmədəli Həsənzadə...

Məhəmmədəli Qubadlını görməsə də, ən böyük arzusu ata-baba torpaqlarına ayaq basmaq, hər qarışını addım-addım gəzmək idi...

Hələ uşaqlıq illərindən nurüzlü siması, mehribançılığı, şirin, duzlu danışığı ilə hər kəsin qəlbini ovsunlamışdı balaca qəhrəman. Məktəb illərində dərslərinə diqqət yetirər, hər zaman hazırlıqlı olmağa çalışardı. O, müəllimdən əlavə, artıq söz eşitməyi özünə sığışdırmazdı. Məktəbin ictimai həyatında, tətbirlərdə həvəslə iştirak edərdi.

Zəhmətkeş, qoçaq olan Məhəmmədəlini hansı işin arxasınca göndərsəydin, canla-başla yerinə yetirər, bircə dəfə də olsun nə şikayətlənməz, nə də "yoyurldum” deməzdi.

Dərslərini etdikdən sonra, asüdə vaxtlarında, özünüinkişafla bağlı, mütəmadi mütaliə etməyə üstünlük verərdi. Psixoloji və dedektiv kitabları maraqla oxuyardı. Təbiət vurğunu olan gənc oğlan tətil günlərində, istirahət vaxtlarında gəzintiyə çıxmağı, səyahət etməyi sevərdi. Sənəti turizmlə başlı olduğu üçün, bölgələrə səyahətlərin təşkilində fəallıq göstərərdi. Ən çox da dostları ilə Azərbaycanın bütün rayonlarını gəzib dolaşmaq həvəsi ilə yaşayardı.

Məhəmmədəlinin az yaşı olmasına baxmayaraq, zəngin dünyağörüşünə, insani keyfiyyətlərinə görə, əhatə dairəsi geniş ola bilərdi. Lakin o, dostluqda etibarlı, sədaqətli olsa da, dost sayının çox olmasını qəbul etmirdi. Onun dostluqla bağlı fikri fərqli idi. "Az olsun, güvənilən olsun” prinsipiylə yaşayardı.

Məhəmmədəli atasından sonra qardaşına ikinci ata olub: ağıllı məsləhət verən, yol göstərən. Qardaşının təhsilində əlindən gələn köməkliyi edər, ona hər zaman arxa-dayaq olardı.Onun öz həyat prizması vardı. Hansı sənətdə çalışırsan-çalış, o sahə üzrə savadını artırmalı, işini sevməli və məsuliyyətlə yerinə yetirməlisən! Nizami Gəncəvi demişkən;

"Mahir bir palançı olsa da insan,

Yaxşıdır yarımçıq papaqçılıqdan”.

Qayğıkeş, ailəcanlı, qohumcanlı olan gənc, hamının qayğısına qalmaqla, bacardığı köməkliyi göstərməyə hər zaman hazır olub.

----

M, Həsənzadə Hərbi xidmətə başlayan zaman hər kəsi hiddətləndirən Tovuz hadisələri baş verir. Bu hadisədən gənc əsgər də çox sarsılır. Düşmənin vəhşiliyi ilə viran qoyulan dədə-baba torpaqlarını işğaldan azad etmək, yurd həsrətinə son qoymaq, doğma ocaqda – Qubadlıda üçrəngli Azərbaycan bayrağını dalğalandırmaq, günahsıq insanların, Şəhidlərimizin qisasını almaq və nəhayət, I Qarabağ savaşında iştirak etmiş atasının yarımçıq qalmış mübarizəsini qələbə ilə tamamlamaq üçün döyüş meydanına atılacağı günü səbirsizliklə gözləyir. Nəhayət, gənc əsgərin gözlədiyi gün yetişir.

27 Sentyabr 2020-ci ildə Ali Baş Komandanın əmri ilə, Azərbaycan Ordusu təxribata əl atmış erməni silahlı qüvvələrinə qarşı əks-hücuma keçir. Həmin vaxt hərbi xidmətdə olan gənc əsgrin sevincinin həddi-hüdudu olmur. O, arzularını reallaşdırmaq üçün bu fürsəti əldən vermir. Elə həmin gün Qusar hərbi hissəsindən birbaşa döyüş bölgəsinə göndərilən əsgər evlərinə zəng edir. Əzizləri ilə sağollaşıb halallıq alan Məhəmmədəli gülə-gülə; "nəhayət, döyüşə gedirəm” deyərək, sevincini gizlətmir.

Müharibənin ilk günündən "Tank əleyhinə taqım”da olmaqla, Ağdam, Hadrut, Füzuli, uğrunda gedən döyüşlərdə fəal iştirak edən igidimiz, neçə-neçə yaralı döyüş yoldaşlarının həyatını ölümdən xilas edir.

Hadrut qəsəbəsi uğrunda gedən döyüşlər zamanı atasına zəng edərək deyir: "Ata, mən buraları görürəm, necə gözəldir, gör indi Qubadlı necədir?!”."Tezliklə Qubadlıya gedəcəyəm”kəlməsi onun dilindən düşmür.

Şəhid kimi həyata vida etmək Məhəmmədəlinin ən böyük arzusu olub. "Yaranan bir gün bu dünyanı tərk edəcəksə, onda şərəfli ölümün sahibi olmaq daha yaxşıdr”deyə düşünərdi. Müharibədə hər şeyin ola biləcəyini təxmin edən gənc əsgər, hər ehtimala qarşı sevimli ailəsini baş verə biləcək vəziyyətə hazırlayırdı: "Şəhid kimi ölmək ən böyük şərəfdir”, "Şəhidlik hər kəsə nəsin olmur”, "Şəhid olmaqdan gözəl nə ola bilər?!”...

6 Noyabr 2020-ci ildə Xocavənd rayonunda gedən qızğın döyüşlərdə iştirak edən cəsur, qorxmaz igidimiz savaş meydanında düşmənə aman vermədən vuruşur. Güllə yağışı altında yaralı yoldaşlarını döyüş meydanından çıxarmaqdan çəkinmir. Belə məqamların birində cəsur döyüşcü aldığı qəlpə yarasından dünyasını dəyişərək ən uca məqama – hər kəsə nəsib olmayan Şəhidlik Zirvəsinə ucalır.

Hər zaman atasına "ata, sənin yarımçıq qoyduğun işi mən bitirəcəm, Qubadlı torpağına üçrəngli bayrağımızı özümüz sancacağıq!”deyən mətin əsgərin, qəlbi Vətən sevgisi ilə döyünən Məhəmmədəli Həzənzadə və onun silahdaşlarının sayəsində ATAların yarımçıq qalan mübarizəsini OĞULları tamamladı, Vətən torpağı yağılardan təmizləndi, təkcə Qubadlıda deyil, bütün Qarabağ torpağında Azərbaycan bayrağı dalğalandı!

Bu gün Həsənovlar ailəsi Məhəmmədəli və bütün qəhrəman oğullarımızla fəxr edərərək, qürur duyaraq deyir: "Biz artıq "didərgin”, "qaçqın”, "köçkün” deyilik! Vətən sağ olsun!”.

Azərbaycan Ordusunun mübariz əsgəri Məhəmmədəli Həsənzadə noyabrın 8-i 2020-ci ildə Sumqayıt Şəhidlər Xiyabanında dəfn olunur.

Azərbaycanın ərazi bütövlüyünin qorunması, torpaqlarımızın işğaldan azad olunması yolunda haqq savaşında rəşadətli döyüşü ilə qəlbləri fəth edən Vətən oğlu – Azərbaycan Silahlı Qüvvələrinin igid, qorxmaz, mərd, cəngavər əsgəri Məhəmmədəli Hörmət oğlu Həsənzadə ölümündən sonra, Azərbaycan Respublikasının prezidenti İlham Əliyevin müvafiq Sərəncamları ilə, "Vətən uğrunda”, "Döyüşdə fərqlənməyə görə”, həmçinin"Xocavəndin azad olunmasına görə”, "Füzulinin azad olunmasına görə”, "Cəbrayılın azad olunmasına görə”medallarıilə təltif olunub.

Ruhun şad olsun, Cənnətməkan Şəhidimiz!!!

------------------------------

ALLAHVERDİZADƏ ELNUR ƏLİ oğlu

(Əsgər)

Qısa arayış: ALLAHVERDİZADƏ ELNUR ƏLİ oğlu 15 may 1995-ci ldə Sumqayıt şəhərində dünyaya göz açıb. 2012-ci ildə Sumqayıt şəhərində 41 saylı məktəbi bitirərək, ele həmin il Bakı Slavyan Universitetinin "Tərcümə” fakültəsinə daxil olub. O, 2016-cı ildə universiteti "Çex-Azərbaycan dili tərcüməçiliyi” ixtasına yiyələnərək bitirib.

E.Allahverdiyev uşaqlıqdan idmanla məşğul olub; əvvəl Cüdo, sonra Kikboksinq, daha sonra Qaydasız döyüş ilə. Məşqçi Rəhim Abbasəliyevin rəhbərliyi ilə, Paralimpiya İdman Kompleksində məşqlər edən gənc idmançı daima öz üzərində çalışıb. O, dəfələrlə şəhər və respublika yarışlarında iştirak edib, mükafatlandırılıb.

A.Elnur 2016-cı ilin iyul ayında Sumqayıt Şəhər Hərbi Komissarlığından "Çağırış” vərəqəsini alaraq, Vətən qarşısında oğul borcunu yerinə yetirmək üçün, Gəncə şəhərində yerləşən "N” saylı hərbi hissəyə yola düşüb. Andiçmədən sonra Daşkəsən şəhərindəki hərbi hissədə həqiqi hərbi xidmətinə davam edib.

E.Allahverdizadə 2017-ci ildə hərbi xidməti başa vurduqdan sonra, "səs operatoru” peşəsinin sirrlərinə yiyələnməyə çalışıb. O, dayısı oğlu Orxan Həsənli ilə birgə çalışaraq, bu sənətin incəliklərini ondan öyrənib, öz işindən zövq alıb. Bu sənətə olan marağı onun bir çox uğurlu işlərə imza atmasına səbəb olub. O, səs rejissoru kimi, bir çox film və serialların, saysız-hesabsız reklamların çəkilişində çalışıb. Sənətinin vurğunu olan gənc, yorulmaq nə olduğunu bilməyib. Öz işinin peşəkarı olduğundan, onunla çalışan hər kəs arxayın olardı ki, görülən iş yüksək səviyyədə olacaq. A.Elnur "Bozbash Pictures” və "Picmus Production”la əməkdaşlıq edib.

Azərbaycan Cümhuriyyətinin 100 illiyinə həsr olunmuş "Son iclas” sənədli filminin, o cümlədən "Barama”, "Atılmışlar” və s. teleserialların çəkilişində iştirak edən gənc rejissoru tezliklə kino və serial sahəsində hər kəs tanıyır...

----

Elnur hələ uşaq vaxtlarından istiqanlılığı, aktivliyi, gülərüzlüyü, deyib-gülməyi ilə seçilər və sevilərdi. Təbiətcə şən, mehriban, gülərüz, şirin zarafatları ilə hər kəsə müsbət enerji ötürən pozitiv insan idi qəhrəmanımız. Deyirlər, "GÜLÜŞ – bir günəşdir, o, qışı insanın üzündən qovur”. Hər kəs qarşısındakı şəxsə gülüş çələngi bəxş etməyə qadir olmur. İnsanın qəlbi nə qədər pak, təmiz olmalıdır ki, onun qəlbinin gözəlliyi, nuru üzündə tazahür etsin. Hər zaman eşitmişik ki, bir dəqiqəlik gülüş insan ömrünü 15 dəqiqə uzadır. Yumor hissi güclü olan Elnur da öz təbəssümü, yerli-yerində etdiyi zarafatları ilə hər kəsin ovqatını xoş edər, yüksək əhval-ruhiyyə ilə də hamı öz işinə davam edərdi. Həyat dolu, həyat eşqli gənc, ağlı, zəkası, uzaqgörənliyi, dərin, fəlsəfi düşüncəsi, maraqlı ideyaları, zəngin təxəyyülü və dünyagörüşü ilə seçilərdi. Çoxları deyərdi ki, "Elnur sanki filosofdur”.

Elnur, cəmi 25 yaşı olmasına baxmayaraq, kişi kimi "KİŞİ” olub. Güclü xarakterə malik, ağzında söz saxlayan, "sirr dağarcığı” idi. Elnurun daima işlətdiyi bir söz olardı: "Kişinin hulqumu olar”.Hər kəs rahatlıqla öz dərd-sərini ona danışa, məsləhət ala bilərdi. Çox ağıllı tovsiyələri, məsləhətləri olardı. Mülayim xasiyyətli, təmkinli, səbirli Elnur çox zaman sözünü zarafatla çatdırardı.

Lirik, klassik musuqulərdən zövq alan Elnur, yorğunluğunu musiqi dinləməklə çıxarardı. Xobbisi maşın sürmək olan gənc oğlan "BMV” "xəstəsi” idi.

Təbiət sevməyən varmı? Təbii ki, bizim qəhrəmanımız da təbiət vurğunu idi. İşləri ilə bağlı, demək olar ki, Azərbaycanın bir çox bölgələrində olmuşdu, Dağlara, dərələrə, meşələrə, göy çəmənlərə heyranlığını gizlətməzdi. Hər dəfə gedib-gələndən sonra,"necə gözəl yerlərimiz var... kaş, siz də görəydiz”deyərdi.

Gözəl keyfiyyətlərinə görə, Elnurun əhətsində dost-tanışları çox olardı. Hər kəs ona rəğbət bəsləyər, onunla ünsiyyətdə olmağa can atardı. Elnur olmayanda sanki hər yanı bir sükut bürüyər, gözlər onu axtarardı...

Elnur həm də ailəcanlı, qohumcanlı, xeyirxah biri idi. Bacardığı qədər hər kəsə kömək etmək, yardım əlini uzatmaq istəyərdi. Ailəsinə bağlı olaraq, valideynlərinə dəyər verər, qayğılarına qalar, bacardığı qədər ailə problrmlərinin həllinə yardımçı olmağa çalışardı. Nə qədər etibarlı, sədaqətli dostları olsa da, onun əsl dostu, sirdaşı qardaşı idi. Qardaşlar hər zaman bir-birilərinə arxa-dayaq olardılar. Mehriban qardaşlara, yaxşı mənada, çoxları həsəd aparardı. Elnur qardaşı Səbuhini həddən artıq çox istəyərdi. Döyüşdə olan zamanlarda zəng edəndə, qardışını valideynlərinə dönə-dönə tapşırardı.

Elnurun bütün müsbət keyfiyyətlərinin başında isə onun vətənpərvərliyi dururdu. Bu da ona ailəsindən keçmişdi.

AİLƏ:Dörd nəfərdən - ata, ana, iki qardaşdan ibarət olan ailədə hər zaman qarşılıqlı hörmət, ehtiram, mehribançılıq, qayğıkeşlik, diqqət, doğruçuluq... kimi dəyərlər gözlənilib, qorunub saxlanılıb. Ata uzun müddət sürücü işləyərək ailəsini halal zəhmətiylə dolandırıb. Süsən müəllimə Sumqayıt şəhəri 41 saylı, daha sonra 9 saylı tam orta məktəblərdə Fizika fənnini tədris edib. Evin sonbeşiyi Səbuhi valideynlərinə dayaq, dəstək olmağa çalışıb...

Əslən Zəngilan rayonundan olan ailəsində Elnur hər zaman valideynlərinin torpaq həsrətli söhbətlərini eşidər, "müharibə olarsa, mən birincilərdən olacam! Yurd həsrətinizə son qoyacam!” deyərdi. Düşmənə nifrət hissi ilə yaşayan gənc, Tarixin qanlı səhifələrinə həkk olunmuş ləkəni silməyə hər zaman hazır olub. Ən böyük arzusu Şəhidlərimizin intiqamını almaq, Zəngilanda Azərbaycan bayrağını dalğalandırmaq və ailəsi ilə bir gün o səfalı yerləri gəzib-dolaşmaq idi...

27 Sentyabr 2020-ci il II Qarabağ savaşının başlanması Elnurun səbirsizliklə gözlədiyi gün oldu. Sentyabrın 29-u Səfərbərlik və Hərbi Xidmətə Çağırış üzrə Dövlət Xidmətinin Sumqayıt İdarəsi tərəfindən "Çağırış” vərəqəsi gələn gün Elnur çəkilişdə olur. İşdən evə döndükdə xəbər tutur. Ata desə də, "qal, sabah gedərsən”,Elnurun cavabı "yox, mən artıq işimi qurtarmışam”olur. Və həmin gün Vətən sevdalı oğul müharibəyə yola düşür.

Azərbaycan Ordusunun cəsur əsgəri oktyabrın 4-dən döyüşlərdə iştirak edir, Xocavənd, Ağdam, Ağcabədi rayonları istiqamətində gedə savaşda misilsiz şücaət göstərir. Düşməndən zərrə qədər də olsa, qorxusu olmayan, bütün döyüşlərdə yoladaşlarına ürək-dirək verən, onları möhkəm olmağa çağıran Elnur, yeri gələndə burada da zarafatlarından qalmırdı.

Topçu olan Elnur, idarə etdiyi topun arxasında cəngavər tək dayanırdı. Onun işlətdiyi top ermənidən qənimət kimi götürülən top idi. Elnur deyirdi ki, "onu yalnız mən işlədəcəm”.

Noyabrın 5-i 2020-ci ildə ana oğlunu yuxusunda görür. Narahatçılıq onu tərk etmir...

7 Noyabr 2020-ci ildə, səhər saatlarında Ağcabədi rayonunun Qiyaməddinli kəndi uğrunda qızğın döyüşlər gedir. Elnur topun arxasında yenə də düşmənə ağır zədbələr endirir. Lakin... 25 yaşlı topçu elə top mərmisindən qopan bir parçanın boğazına dəyməsi, nəticədə şah damarını kəsməsi ilə qanaxmadan gözlərini əbədi yumaraq dünyasını dəyişir. Vətən sevdalı qəhrəman oğul ən uca məqama – Şəhidlik Zirvəsinə yüksəməklə Allah dərgahının qapıları onun üzünə açılır.

Azərbaycanın Zəfər Tarixinə adını Qızıl mürəkkəblə yazan igid, cəsur, vətənpərvər oğul – Elnur Allahverdizadə 8 noyabr 2020-ci ildə Sumqayıt Şəhidlər Xiyabanında dəfn olunur.

Bu dünyaya bir igid gəldi... Bu dünyadan bir igid getdi... Arzuları, xəyalları yarımçıq qalmış bir igid... Ən böyük arzusuna çatdı şücaəti, qəhrəmanlığı ilə!Ancaq yarım qalmış arzuların gerçəkləşməsini çox istəyirdi... nişanlı qardaşının toyunu görmək... qardaş Türkiyə dövlətində işi ilə bağlı təhsilini artırmaq, kinomotoqrafiyanı mükəmməl bilmək, daha da savadlı və bacarıqlı olmaq... Arzular gözəl olsa da, ŞƏHİDliyin yanında çox cılızdır. Elnur dədə-baba ocaqlalarını yağı düşməndən azad etməklə ən ümdə arzusuna catdı, milyonları arzularına qovuşdurmaqla onlara əvəzolunmaz bir SEVİNC yaşatdı... Ən əsası budur!

44 günlük Vətən müharibəsində ölkəmizin ərazi bütövlüyünün təmin edilməsində iştirak etmiş və qarşıya qoyulmuş tapşırıqların icrası zamanı vəzifə borcunu şərəflə yerinə yetimiş Azərbaycan Silahlı Qüvvələrinin mübariz, igid əsgəri, 25 yaşlı topçu Allahverdizadə Elnur Əli oğlu ölümündən sonra, Azərbaycan Respublikasının prezidenti İlham Əliyevin müvafiq Sərəncamları ilə, "Vətən uğrunda”, "Cəsur döyüşçü” və"Xocavəndin azad medallarıilə təltif edilib.

Ruhun şad olsun, Cənnətməkan Şəhidimiz!!!

Aygün Hacıyeva,

AJB, AYB, AAB-nin üzvü