(Yazılar Şəhidlərimizin Sumqayıt Şəhidlər Xiyabanında dəfn olunma ardıcıllığı ilə verilib).

ALLAHYAROV VÜSAL ŞAKİR oğlu

(Baş çavuş)

ALLAHYAROV VÜSAL ŞAKİR oğlu 22 aprel 1988-ci ildə Sumqayıt şəhərində anadan olub. Orta təhsilini Sumqayıt şəhər 9 saylı tam orta məktəbdə alıb.

Səfərbərlik və Hərbi Xidmətə Çağırış üzrə Dövlət Xidmətinin Sumqayıt şəhər İdarəsi tərəfindən "Çağırış” vərəqəsi alan A.Vüsal çox böyük sevinc və qürur hissi ilə çağırışa səs verib. Milli Ordunun sıralarında həqiqi hərbi xidmətdə olan gənc əsgər Gədəbəy rayonunda yerləşən "N” saylı hərbi hissədə Vətən qarşısında oğul borcunu şərəf və ləyaqətlə yerinə yetirib və ehtiyata buraxılıb.

Vətənə xidmətdən qürur duyan gənc, bilirdi ki, torpaqlarımızın bir hissəsi düşmən tapdağında olan bir vaxtda Vətən gənclikdən daha böyük hünər gözləyir. İllərlə düşmənin xalqımızın başına gətirdiklərinə son verməyin zamanı çatmış, günahsız insanların, şəhidlərimizin intiqamı vaxtı yetişmişdi... Və qəhrəmanımız bütün bunları götür-qoy edərək, bir an belə tərddüd etmədən, uşaqlıq xəyal və arzularını gerçəkləşdirməyə qərar verir. Hərbiçi olmağı qətiləşdirən Vüsal Allahyarov 2011-ci ildə Daxili Qoşunların Xüsusi Təyinatlı Qüvvələrinə qəbul olur və burada fəaliyyətə başlayır.

V.Allahyarov xidməti vəzifəsini icra edərək, 5 il Quba, 4 il Lənkəran şəhərlərində yerləşən "N” saylı hərbi hissələrdə çalışır. Bu müddətdə o, Türkiyə dövlətində Komando, Dalgıc, Üzgüçülük, Paraşüt kurslarını uğurla bitirir. Ən çətin imtahanlardan olan "Qırmızı bret”, "Zolaqlı bret” imtahanlarını da müvəffəqiyyətlə verir. Fəxri Fərman və Diplomlara layiq görülən Vüsal Allahyarov qardaş Türkiyə Respublikasından alnıaçıq, üzüağ qayıdır.

Vüsal Allahyarov 10 illik (2010-2020) hərbi xidməti dövründə verilən tapşırıqları, normativləri yüksək peşəkarlıqla yerinə yetirir. Bir çox hərbi yarışlarda iştirak edərək, öz fərasət və bacarığını göstərməklə bir çox nailiyyətlərə imza atır. Bu illərdə işindəki uğurlara görə, "Qüsursuz xidmətə görə (26.06.2020)” 3-cü dərəcəli medalla təltif olunur, həmçinin komandanlıq tərəfindən müxtəlif mükafatlara layiq görülür. Rütbəsi "Baş çavuş” olan V.Allahyarov DİN-in Daxili Qoşunlarının XTD-də "Yarım qrup komandiri” vəzifəsində çalışır.

2016-cı ilin Aprel döyüşləri, 2020-ci ilin Tovuz hadisələrini diqqətlə izləyən A.Vüsal hər an müharibənin olması arzusu ilə yaşayır. O, Azərbaycanın müzəffər Ordusunun olduğuna əmin olaraq, müharibə olarsa, tez bir zamanda düşmənə layiqli cavab veriləcəyinə, torpaqlarımızın azad edilərək, illərin həsrətinə son qoyulacağına tam əmin idi. Tovuz hadisələri zamanı Azərbaycan Ordusunun qeyrətli zabitlərinin həlak olması onu çox sarsıdır. Döyüş əhval-ruhiyyəsində olan gənc zabit Ali Baş Komandanın əmrini səbirsizliklə gözləyirdi.

Ailə: Sadə, zəhmətkeş insanlardan ibarət olan Allahyarovlar ailəsi heç kəslə işləri olmayan sakit həyat yaşayıblar. Şakir Allahyarov 30 ilə yaxın müddətdə Sumqayıtın kimya müəssisələrindən birində - Alüminium zavodunda çalışıb, alın təri ilə ailəsini dolandırıb. Hazırda təqaüddədir. Nərgiz xanım uzun müddət Səhiyyə sistemində çalışıb. Uşaq xəstəxanasında kiçik tibb bacısı kimi, uşaqlarımızın sağlamlığı keşiyində durub. Evin sonbeşiyi Vüqar Allahyarov çalışmaqla ailəsinə dəstək olub.

Qəhrəmanımız Vüsal Allahyarov sevib-seçdiyi Aysel xanımla ailə həyatı qurduqdan sonra, onları ailə kimi formalaşdıran iki gözəl qız övladı dünyaya gəlir. Adlarını "Fatimə” və "Rəhimə” qoyurlar. Allahyarovlar ailəsi sevinc dolu xoşbəxt həyatını yaşayır...

-----

V.Allahyarov hələ uşaq yaşlarından sakit təbiətli, sadə, mehriban, istiqanlı bir uşaq olub. Məktəb illərindən təlim-tərbiyəsi, səliqə-səhmanlı olması, nizam-intizama riayət etməsi ilə seçilib və sevilib. Hər zaman böyüklərə hörmət və ehtiramla yanaşıb. Ağıllı, zəkalı, boş yerə ağzını açıb danışmayan, sözü qiymətli tutan Vüsalın qəlbində elə uşaqlıqdan Vətən sevgisi cücərməyə başlayıb. Zamanla bu sevgi çiçək açıb...

Vüsal dilinə, dininə, torpağına bağlı insan olub. Allahın yolunu tutaraq, hər zaman xeyirxah əməl sahibi olmağa çalışıb. Əhli-beyt aşiqi olan gənc, vaxtı-vaxtında namazı qılan əxlaq sahibi idi.

Ailəcanlı, qayğıkeş, hər kəsi düşünən Vüsal uşaqlarına bağlı olub. Böyüklə böyük, kiçiklə kiçik olmağı bacaran gənc, diqqətcil oğul, vəfalı həyat yoldaşı, mehriban ata idi. Yüksək insani keyfiyyətlərinə görə, bir kimsə ondan inciməzdi. Hər zaman ətrafdakı insanlara sakit təbiəti, səbir və təmkini ilə pozitiv enerji ötürərdi. O qədər saf, təmiz qəlbli olub ki, hər söz-söhbəti ancaq xeyirliyə yozub. Əliaçıq, mərd, səxavətli olduğundan ətrafında olan imkansızlara bacardığı qədər köməklik göstərməyə çalışıb.

Vüsal sakit, rahat həyat yaşamağın tərəfdarı olub. Gedib-gəldiyi yer iş və ev olan gənc ailə başçısı ailədə xoş rəftarı ilə sevilən olub.

V.Allahyarov uşaq yaşlarından çox sevdiyi idmanla məşğul olub. O, "Polad” idman klubunda "Cüdo”, "Karate” idman növləri, daha sonra isə boksla məşğul olub. Gənc idmançı bir çox uğurlara imza ataraq, Fəxri Fərman və Diplomlara layiq görülmüş, müxtəlif dərəcələr almışdı.

"Dostunu göstər, deyim kimsən”misalı elə Vüsala aid olub. Vüsalın müsbət keyfiyyətlərinə görə, hər kəs dostluq, yoldaşlıq etmək istəyib onunla. Çünki sirr saxlamağı bacaran etbarlı, sədaqətli dost idi. Onun ən sadiq dostu isə, təbii ki, qardaşı, yoldaşı, ailəsi olub.

Beləlikllə, bir gəncin həyat yoluna kiçik bir nəzər yetirməklə, onun necə ləyaqətli, vicdanlı, əxlaqlı bir İNSAN olmasını anlayaraq, belə bir igid oğuldan, VƏTƏN, TORPAQ yolunda yalnız qəhrəmanlıq gözləmək olardı...

2020-ci il sentyabr ayının 27-də II Qarabağ müharibəsi başlayan zaman Vüsal Allahyarov xidmət göstərdiyi Lənkərandakı hərbi hissədən birbaşa döyüşlərə qatılır. Füzuli- Cəbrayıl istiqamətində gedən qızğın döyüşlərdə igidimiz şücaəti lə seçilir. Onun snayperinin dəqiq nişanı ilə neçə-neçə mənfur düşmən məhv edilir.

İgidimiz döyüşlər zamanı fürsət tapan kimi, əziz-doğmalarına zəng edir, hal-əhval tuturdu. Belə bir Ordu ilə, igid silahdaşlarla tezliklə qələbə çalınacağına inandığını söyləyirdi. Yüksək əhval-ruhiyyədə olan cəsur döyüşçü "tezliklə görüşəcəyik”deyərək, o günü səbirsizliklə gözləyirdi.

6 Noyabr 2020-ci ildə Tərtər, Ağdam, Füzuli, Cəbrayıl... uğrunda gedən döyüşlərdə cəsarət və hünər göstərmiş qəhrəmanımız Vüsal Allahyarov Qədim Şuşa diyarı uğrunda gedən qaynar döyüşlərdə aldığı mərmi yarasından şəhid olaraq, Allah dərgahında ən uca məqama yüksəlir. Ölümüylə ölümsüzlüyə qovuşan Vətən oğlu əməlləri ilə hər kəsin qəlbinin sahibinə çevrilir.

Şəhidliyi ən gözəl, şərəfli ölüm sayan igidimiz şəhidliyin ucalığından danışaraq həyat yoldaşına demişdi: "Peyğəmbərə, İmam Hüseynə qonaq olmaq istəyirəm”.Vətən sevdalı oğul sonda öz arzusuna çatdı, Allah bu gğzəl məqamını ona nəsib etdi.

"Bizim üçün atamız ən yüksək zirvədir. Azadlığımız üçün, atamın simasında, bütün qəhrəmanlarımıza borcluyuq. Atam çox qayğıkeş, vətənpərvər insan idi. Biz fəxr edirik ki, belə bir atanın övladlarıyıq. O, Qarabağımız uğrunda şəhid oldu”,- deyir şəhidimizin bizlərə əmanəti olan iki qız övladları Fatimə və Rəhimə.

Daxili İşlər Nazirliyinin Daxili Qoşunlarının Baş çavuşu, ömrünün 10 ilini Vətənin keşiyində duran, mərd, qorxmaz qəhrəmanımız, 32 yaşlı snayperçi Allahyarov Vüsal Şakir oğlu ölümündən sonra, Azərbaycan Respublikasının prezidenti İlham Əliyevin müvafiq Sərəncamlarına əsasən, "Qarabağ” ordeni,həmçinin "Vətən uğrunda”, "Füzulinin azad olunmasına görə” vəŞuşanın azad olunmasına görə” medallarıilə təltif olunub.

Ruhun şad olsun, Cənnətməkan Şəhidimiz!

HƏSƏNQULİYEV SƏBUHİ ƏLİXAN oğlu

(Əsgər)

SƏBUHİ ƏLİXAN oğlu HƏSƏNQULİYEV11 aprel 2002-ci ildə Sumqayıt şəhərində anadan olub. 2008-2017-ci illərdə Sumqayıt şəhərinin Kimyaçılar qəsəbəsində yeləşən Cəbrayıl rayon 5 saylı tam orta məktəbdə oxuyub. 2017-2020-ci illərdə10 saylı Sumqayıt Peşə Liseyində təhsil alaraq "Dülgər” ixtisasına yiyələnib.

S.Həsənquliyev 2020-cil ilin iyul ayında Sumqayıt Şəhər Hərbi Komissarlığı tərəfindən həqiqi hərbi xidmətə çağrılıb. O, Vətən qarşısında borcunu yerinə yetimək üçün, Ağcabədi rayonunun Taxta Körpü qəsəbəsində 3 aylıq təlimlərdə olub. Andiçmə mərasimindən sonra Beyləqandakı "N”saylı hərbi hissəyə göndərilib.

Ailə:Əslən Ucar rayonundan olan Həsənquliyevlər ailəsi dörd nəfərdən ibarət olub. Ata 20 yaşında olanda taleyini Gənclik şəhəri Sumqayıtla bağlayıb. Burada gənc kadr kimi, Sumqayıtdakı kimya zavodlarından birində əmək fəaliyyətinə başlayıb. Bu şəhərdə könlünün seçib-bəyəndiyi Mayisə xanımla ailə həyatı qurub. 1998-ci ildə evin ilk övladı dünyaya gəlib, adını "Nurlan” qoyublar. Nurlanın ailəyə gəlişi evin yanan çırağını daha da nurlandırıb. İkinci körpənin dünyaya gəlişini gözləyən ailə yaz fəslində bir neçə günlüyə Ucar rayonuna gedib. Elə qəhrəmanımız da məhz burada – Ucar rayonunun Boyat kəndində dünyaya göz açıb. Kiçik əminin istəyi ilə uşağa "Səbuhi” adı qoyulub.

Beləliklə, dörd nəfərlik ailə öz acılı-şirinli həyatını yaşayıb. Ata gecə-gündüz çalışıb, ailənin təlabatlarını ödəyib, ana evdar xanım kimi ailə qayğıları ilə məşğul olub. Həsənquliyevlər ailəsində Vətənə layiqli iki əxlaqlı, vicdanlı, vətənpərvər oğul böyüyüb. Sonradan böyük oğul "Polis patrulu” vəzifəsində çalışıb, kiçik oğul Səbuhi isə Vətənə xidmət məqamını gözləyib...

Uşaqlıqdan mehribanlığı, şirinliyi ilə seçilən Səbuhi, təlim-tərbiyəsi, nəzakətli davranışı, incə yumoru ilə hər kəsin sevimlisi olub. İdmana hədsiz maraq göstərən yeniyetmə 6-7-ci siniflərdə oxuyanda "Təhsil” UİGM-in üzvü kimi, futbolla məşğul olub. 2014-2017-ci illərdə bir cox uğurlara imza ataraq müxtəlif təltif və medallara layiq görülüb. Məşqçisi Pərviz Bağırovun başını uca etməyə çalışan Səbuhi, onun bütün tapşırıqlarına diqqətlə qulaq asıb, düzgün, dəqiq yerinə yetirməyə səy göstərib.

Səbuhinin çox müəmmalı, aldadıcı, qəribə bir qıyqacı gülümsəməyi olub. Bu gülümsəmənin hanssı məna kəsb etməsi bilinməyib. Səbuhi ağır təbiətli, çox zarafat etməyi sevməyən, hər adamla deyib-gülməyən, hər şeyin yerini bilən düşüncəli bir gənc olub.

H.Səbuhi bir müddət Qaydasız döyüş idman növü ilə də məşğul olub. O, məşqçisi Rövşən Veysəlovun öyrətdiyi bütün fəndləri bacarıqla və cəld yerinə yeririb. İdmanla məşğul olmasına, qabiliyyətinə baxmayaraq, o, yarışa çıxmağa çox meyilli olmayıb. Hər zaman deyib: "Kişinin ən azından gərək gücü olsun, ailəsini qoruya bilsin”.İdmanı onun hobbisi hesab etmək olardı.

Səbuhinin öz sehirli dünyası olub. Evə gələn kimi telefonu əlinə alıb çəkilib bir kənara. Sakitliyi sevib, kimsə ilə işi olmayıb. Belə vaxtlarda musiqi dinləməkdən həzz alıb. Müasir gənc olduğundan, dəblə və zövqlə geyinməyə üstünlük verib və hər zaman dəblə ayaqlaşmağa çalışıb.

Dostcanlı olan gənc oğlan, çox vaxt özündən böyüklərlə dostluq edib. Sirrini, sözünü ancaq qardaşına deyib. İki qardaş mehriban olmaqla yanaşı, bir-birinə arxa-dayaq olublar.

Səbuhi təbiət vurğunu idi. Saatlarla dağları, meşələri, dənizi, gül-çiçəkləri seyr etsəydi doymazdı. Ev heyvanlarını, quşları sevib. Ən əsas da göyərçinləri. 61 göyərçin saxlayıb, doğma ata ocağı Ucar rayonunu maşın seriyası "61” olduğuna görə.

Səbuhinin nənəsi hər zaman danışardı ki, "Səbuhi anadan olanda 2 ağ göyərçin gəlib qonur pəncərəyə”.Bəlkə bu hadisənin özündə də bizim bilmədiyimiz bir hikmət var imiş. Kim bilir... Ancaq reallıq o di ki, Sabuhi quşları ilə rahatlıq tapar, onlara qulluq etməkdən yorulmazdı...

Sentyabrın 27-də II Qarabağ savaşı başlayan zaman Səbuhi cəmi 5 ayın əsgəri idi. Uşaqlıqdan döyüş, müharibəyə həsr olunmuş filmlərə baxan gənc əsgər, indi özünün döyüş meydanında olması, düşmənlə üz-üzə durmasını yuxu kimi qəbul edirdi. Bu, ona Vətənə olan böyük sevgisini sübut etmək üçün bir fürsət idi. O, Vətənini, Torpağını sözlə ifadə edilməyəcək qədər çox sevirdi. İllərlə uzanan Torpaq həsrətinə son qoymağa, günahsız insanların, şəhidlərimizin intiqamını almağa can atırdı. Və Səbuhi əlinə düşən fürsətdən istifadə edib, mənfur düşmənin cavabını verməyə hazır idi. O, elə bu əzmlə döyüşlərə qatılır.

Oktyabrın 28-29-u olardı, Səbuhi xalasına zəng edir. "Xala, mən Füzuliyə gedirəm, ancaq anamgilə demə!”. O, anasının narahat olmasını istəmirdi. Anasıgilə isə deyir ki, "narahat olmayın, mən Beyləqandayam, sakitlikdir. Burada da göyərçinlər var, onlara dən verirəm”.Heç vaxt dilinə yalan söz gəlməyən gənc, doğmalarına yalan danışmalı olur... Bir də sirr dostu, qardaşı olan Nurlandan heç nə gizlətmir...

Oktyabrın 31-i 2020-ci il tarixdə Səbuhinin ailə üzvləri ilə son danışığı olur. Qardaşının doğum gününü təbrik etməyə tələsmişdi. Sanki hiss etmişdi ki, sonrakı günlər bunu edə biməyəcək...

İgidimiz Cəbrayıl, Füzuli, Qubadlı, Hadrut, Şuşa istiqamətində gedən döyüşlərdə misilsiz şücaət göstərir. Şuşa istiqamətində qızğın döyüşlər başlayanda Azərbaycan Ordusunun mübariz, qoçaq döyüşçüləri düşmən üzərinə cangavər tək hücuma keçir. 20 yaşlı gənc əsgər, "Şuşa Fatehləri”ndən biri olaraq, silahdaşlarının arasında olur. Döyüş zamanı dostunun düşmən tərəfindən vurulduğunu görən mətin əsgər güllə yağışı altında onu çıxarmağa çalışan zaman namərd gülləsindən yerə yıxılır. Döyüş yoldaşları Səbuhiyə çatanda onun şəhid olduğunu görürlər...

Azərbaycan Ordusunun cəsur döyüşçüsü Səbuhi Həsənquliyev 12 noyabr 2020-ci il tarixdə Sumqayıt Şəhidlər Xiyabanında dəfn olunur.

Bu gün Həsənquliyevlər ailəsi Səbuhi ilə qürur duyur, fəxr edirlər. Doğma diyarın Azadlığı və Bütövlüyü uğrunda canından, qanından keçməyə bir an belə tərəddüd etməyən gənc qəhrəmanın sayəsində Qarabağ torpağı düşməndən təmizləndi, hər qarış torpaqda üçrəngli bayrağımız dalğalandı!

Azərbaycan Silahlı Qüvvələrinin 20 yaşlı igid əsgəri Səbuhi Əlixan oğlu Həsənquliyev ölümündən sonra, Azərbaycan Respublikasının prezidenti İlham Əliyevin müvafiq Sərəncamlarına əsasən, 3-cü dərəcəli "Vətənə xidmətə görə” ordeni,"Vətən uğrunda”, "İgidliyə görə”, "Füzulinin azad olunmasına görə”, "Cəbrayılın azad olunmasına görə” və "Şuşanın azad olunmasına görə” medallarıilə təltif olunub.

Ruhun şad olsun, Cənnətməkan Şəhidimiz!!!

---------------------------------

KƏRİMOV TALEH ADİL oğlu

(Mayor)

Qısa arayış: TALEH ADİL oğluKƏRİMOV6 mart 1985-ci ildə Sumqayıt şəhərində dünyaya göz açıb. 1992-1995-ci illərdə Sumqayıt şəhərinin Corat qəsəbəsində 7 saylı tam orta məкtəbdə, 1995-2003-cü illərdə M.Füzuli adına Tibb, Humanitar və Texniкi Təmayüllü "İSTEDAD" Liseyində təhsil alıb. Liseyi əla qiymətlərlə bitirən gənc, 2003-cü ildəH.Əliyev adına Azərbaycan Ali Hərbi Məktəbinə daxil olub.O, 2007-ci ildə ali təhsilini "Kəşfiyyatçı” ixtisası üzrə, "Leytenant” rütbəsi ilə uğurla başa vurub.

T.Kərimov 2007-ci ilin iyun ayından 2008-ci ilin iyun ayına qədər ASQ-nin "Təlim və Tədris Mərкəzi”ndə "Zabit” ixtisas kursunun dinləyicisi olub.

Gənc zabit Azərbaycanın bir çox bölgələrində yerləşən hərbi hissələrdə xidmət göstərərək vəzifə borcunu şərəf və ləyaqətlə yerinə yetirib. O, 2008-2014-cü illərdə ASQ-ninMurovdağ silsiləsində yerləşən"N” saylı hərbi hissələrdə Motoatıcı Taborun Qərargah rəisinin Kəşfiyyat üzrə müavini və Kəşfiyyat taqım komandiri vəzifəsində çalışıb. Xidməti dövründə hərbi taktikası, döyüş qabiliyyəti və hərbi savadı ilə rəhbərliyin xüsusi rəğbətini qazanaraq müxtəlif təltiflərə layiq görülüb.

T.Kərimov 26.10.2009-cu il tarixindən 26.11.2009-cu il tarixədək "Orbiter” markalı pilotsuz kəşfiyyat aparatının istifadəsinin öyrənilməsi məqsədilə, İzrail Respublikasında olub. Doğma ana dili və türk dilindən əlavə, ingilis, rus dillərində sərbəst danışıb yazmağı, fars dilində oxuyub yazmağı bacarıb.

T.Kərimov 2014-2016-cı illərdə Daşkəsəndə yerləşən hərbi hissədə Kəşfiyyat bölməsində "Məlumatların toplanması” üzrə rəis müavini vəzifəsində çalışıb.

2016-cı ilin yanvar ayında Naftalan şəhərində yeləşən "N” sayı hərbi hissəyə Kəşfiyyat bölməsinin rəisi vəzifəsinə göndərilən Taleh Kərimov, elə həmin ilin aprel ayında baş verən Şanlı Aprel döyüşlərində iştirak edib. Generalımız Polad Həşimov onun komandiri olub. Hətta Taleh Kərimov ən ağır əməliyyata tək girmək istəyəndə, Polad Həşimov etiraz edərək acıqlanıb da ona. Gənc zabitə nəsə olar deyə, general narahat olub.

T.Kərimov Tərtər, Lələtəpə istiqamətində gedən döyüşlərdə kəşfiyyat rəisi kimi xidmət göstərib. Bu döyüşlərdə 3 gün mühasirədə qalmış, lakin düşmənin əlinə keçməmişdi. Ermənilərə danışıqlara girərək, döyüş meydanında həlak olmuş əsgərlərimizin meyidlərini çox böyük çətinliklə onlardan ala bilmişdi. Həmçinin igidimiz postlardan birini öz dəstəsi ilə birlikdə almışdı.

Taleh Kərimov Aprel döyüşlərindən sonra yenidən xidmət etdiyi hərbi hissəyə qayıdır.

--------

Uşaqlıq illərindən vətənpərvər ruhda böyüyən Taleh dərslərinə maraq göstərər, yaxşı oxumaqla yanaşı, məktəbin ictimai həyatında fəal iştirak edərdi. Sadəliyi, səmimiliyi, mehribanlığı, xoş xasiyyəti, təlim-tərbiyəsi ilə müəllim kollektivinin və yoldaşlarının hörmət və rəğbətini qazanmışdı.

Taleh asudə vaxtlarında tarixi, döyüş və detektiv filmləri izləyər, mütaliə edərdi. Çox zaman baxdığı filmlərin təsirindən onda vətən sevgisi daha da alovlanar, bəzən özünü filmlərin qəhrəmanının yerində hiss edərdi. Hərbiçi olmaq arzusunu reallaşdıran gənc oğlan, hərb sənətinin sirrlərinə tam yiyələnmək üçün, dərslərində hər zaman hazırlıqlı olardı.

Dinə-imana bağlı olan, vaxtlı-vaxtında namazını qılan Taleh, hələ uşaq vaxtlarında tez-tez Corat məscidinə gedib-gələr, Quran dərslərində iştirak edərdi. Bacarıqlı, iti yaddaşa malik olduğundan, ən əsası tənbəl olmadığından daima öz üzərində çalışaraq, bütün fənnləri, elmləri dərindən bilməyə can atardı. Bu səbəbdən, hər sahədən başı çıxan savadlı gənc olub.

"Dil ən böyük mədəniyyətdir” deyiblər. Taleh də öz doğma ana dilini sevmək və gözəl bilməklə yanaşı, fransız, ingilis, rus, fars dillərini də mənimsəyib, bu dillərdə sərbəst danışıb.

Böyük arzu və xəyallarla yaşayan uşaqdan soruşduqda "böyüyəndə nəçi olasan?”, tərəddüd etmədən cavab verib: "Prezident olacam”.Elə uşaqlıqdan LİDER olmağa, hər zaman birincilərin cərgəsində öndə durmağa can atıb və məqsədinə doğru da addımlayıb.

Taleh 6-cı sinifdə oxuyan zaman "Karate” idman növü ilə ciddi məşğul olsa da, digər idman növləri ilə də - ağırlıq qaldırma, güləş, boksla fərdi şəkildə, formada qalmaq, sağlamıq və hobbi kimi məşğul olub. Bütün bunlardan əvvəl, Taleh futbol azarkeşi idi. Futbol oynamağı çox sevib və bir oyunu belə gözdən qaçırmayıb. Uşaqlıqdan 45 yaşınacan müntəzəm olaraq dostları, yoldaşları, iş yoldaşları ilə hər şənbə günü stadionda futbol oynamağa gedib, həmişə də qapıçı olub. Futbolda sevdiyi qapıçı Klaudio Taffarel (Braziliya), komanda isə "Qalatasaray” (Türkiyə) və "Spartak” (Rusiya, Moskva) olub.

İşini həddən çox bağlı olan igidimiz 17 illik qüsursuz xidməti dövründə Murovda, Daşkəsən və Naftalanda, Tərtər və Beyləqanda çalışaraq, rəhbərliyin, əsgər və zabitlərin sevgisini qazana bilmişdi, öz gözəl xasiyyəti, savad və bacarığına görə!

Azərbaycan Ordusunun zabiti Taleh Kərimov 2016- 2019-cu illərdə hərbidə bir çox vəzifələrdə çalışmış, işinə məsuliyyətlə yanaşmışdı.

T.Kərimov 27.09.2019-cu il tarixdən Vətən müharibəsinə gedənədək MN-də Kəşfiyyat Baş İdarəsində "Planlaşdırma və əlaqələndirmə” şöbəsinin "Qoşun kəşfiyyatı” bölməsinin Baş zabiti vəzifəsində xidmət göstərib. O, 17 illik xidməti dövründə "Qüsursuz xidmətə görə” 3-cü, 2-ci və 1-ci dərəcəli medallarla, həmçinin "Azərbaycan Silahlı Qüvvələrinin 90 illiyi”, "Azərbaycan Silahlı Qüvvələrinin 95 illiyi”, "Azərbaycan Ordusunun 100 illiyi” Yubiley medalları, həmçinin saysız-hesabsız Fəxri Fərman və Diplomlarla təltif olunub.

2020-ci ilin iyul ayında baş verən Tovuz hadisələri zamanı sevdiyi insanın – general-mayor Polad Həşimovun itkisi gənc zabiti çox üzür. Xasiyyəti və xarakteri ilə insaniyyətliyin ən uca zirvəsində duran komandiri üçün o, hətta hönkür-hönkür ağlayıb göz yaşı tökür...

Hər zaman qəlbi Vətən eşqi ilə çırpınan və bu səbəbdən hərb sənətini seçən mərd oğul qisas hissi ilə yaşayırdı.

T.Kərimov Vətən müharibəsi zamanı Füzuli, Hadrut, Cəbrayıl, Zəngilan, Horadiz istiqamətində gedən döyüşlərə qrupu ilə birlikdə qatılır.O, peşəkar kəşfiyyatçı kimi, müxtəlif dilləri bilsə də, döyüş sahələrini xəritədə çəkmək üzrə gözəl mütəxəssis idi. Bu da döyüş əməliyyatlarında vacib olan faktorlardan biri sayılırdı.

T.Kərimov 22 oktyabr tarixində Qubadlı döyüşlərində, kəşfiyyat rəisinin yaralanması səbəbindən, onu əvəz etməli olur. Oktyabrın 30-da mətin zabit 12 nəfərlik qrupu ilə Qubadlı döyüşlərində xüsusi tapşırığın icrasında iştirak edir. Təəssüf ki, qrupun bütün üzvləri bu Haqq savaşında şücaətləri ilə Yeni Tarix yazaraq, ən uca nəqama – Şəhidlik Zirvəsinə yüksəlirlər.

Vətənin dar günündə onun harayına yetişən, vəzifə borcunu şərəf və ləyaqətlə yerin yetirən, ölümün gözünə dik baxan, Vətən yolunda gözünü qırpmadan belə, qanını, canını verməyə hazır olan mayor Taleh Kərimov 12 noyabr 2020-ci ildə Sumqayıt Şəhidlər Xiyabanında dəfn olunur.

Uşaqlıqdan Vətən eşqi ilə böyüyən VƏTƏN sevdalı igid, qorxmaz çəngavər, düşmənin gözünə dik baxaraq, rəşadəti ilə mənfur düşmənin saysız-hesabsız canlı qüvvəsini, texnikasını məhv edən QƏHRƏMAN oğul - Taleh Kərimov HƏRB tarixində şücaəti ilə adını Qızıl hərflərlə yazdı!

Azərbaycan Silahlı Qüvvələrinin yenilməz qəhrəmanı, qeyrətli Vətən oğlu, 45 yaşlı mayor Taleh Kərimov ölümündən sonra, Ölkə rəhbəri İlham Əliyevin müvafiq Sərəncamlarına əsasən, "Qarabağ” ordeni, "Vətən uğrunda”, "Füzulinin azad olunmasına görə”, "Cəbrayılın azad olunmasına görə” və"Qubadlının azad olunmasına görə” medallarıilə təltif edilib.

Ruhun şad olsun, Cənnətməkan Şəhidimiz!!!

------------------------------------

İSGƏNDƏROV EMİL VAQİF oğlu

(Gizir)

EMİL VAQİF oğluİSGƏNDƏROV5 avqust 1990-cı ildə Sumqayıt şəhərində hərbiçi ailəsində anadan olub. Əslən Qubadlının Çardaxlı kəndindən olan Emil tam orta təhsilini 1996-2007-ci illərdə Sumqayıt şəhər Cəlil Səfərov adına 10 saylı tam orta məktəbdə alıb. Məktəb illərində respublikanın "Əməkdar məşqçi”si Firdovsi Ömərovun başçılığı altında idmanın "Sərbəst güləş” növü ilə məşğul olub. Bir çox şəhər və respublika yarışlarında uğur qazanaraq müxtəlif mükafatlara, medal və təltiflərə layiq görülüb.

E.İsgəndərov 2008-ci ildə təhsilini uğurla başa vurduqdan sonra, Sumqayıt Şəhər Hərbi Komissarlığı tərəfindən həqiqi hərbi xidmətə çağrılıb. Gəncə şəhərində yerləşən "N” saylı hərbi hissədə xidmət göstərən gənc əsgər 2010-cu ildə xidmətini ləyaqətlə başa vurub.

E.İsgəndərov xidmətdən sonra Sumqayıt Texnologiyalar Parkında ilk əmək fəaliyyətinə başlayıb.

Uşaqlıqdan hərbiçi olmaq arzusu ilə yaşayan Emil, arzusunu gerçəkləşdirmək üçün, Müdafiə Nazirliyinə müraciət edib. Müraciəti müsbət qarşılanan gənc, 2011-ci ildə Quba rayonundakı "N” saylı hərbi hissədə, Daxili İşlər Nazirliyinin Daxili Qoşunlarının "Xüsusi Vasitələrin Tətbiqi Dəstələri”ndə (XVTD) MAHHXHQ kimi faəliyyətə başlayıb.

Hərbidə 9 illik fəaliyyəti dövründə qüsursuz xidmətinə, bacarıq və qabiliyyətinə, tapşırıqları düzgün və vaxtında yerinə yetirərək fərqləndiyinə görə, E.İsgəndərov "Gizir” kurslarına göndərilib. O, 2015-ci ildə "Gizir” rütbəsi alaraq xidmətinə davam edib, Yarım-qrup, Qrup komandiri vəzifələrinə qədər yüksəlib. Xidməti dövrü ərzində hərbiçilər arasında keçirilən idman yarışlarında dəfələrlə çıxış edərək mükafatlara layiq görülüb.

E.İsgəndərov xidməti dövründə "Qüsursuz xidmətə görə” 3-cü dərəcəli medalla, bir çox Fəxri Fərman və Diplomlarla təltif olunub. O, 2018-ci ildən Xüsusi Təyinatlı Dəstədə xidmətini davam etdirib. 2020-ci ilin mart ayında isə Hacıqabul rayonunun "N” saylı hərbi hissəsinə keçid edib.

Ailə:Əslən Qarabağdan – Qubadlı rayonundandır İsgəndərovlar ailəsi. Emilin babası 1956-cı ildən taleyini Sumqayıtla bağlayıb. Burada dünyaya gələn övladlar ev-eşik sahibi olublar.

Vaqif İsgəndərov Tənzilə xanımla ailə həyatı qurduqdan sonra, onların üç oğlu Sumqayıtda dünyaya göz açıb. Beş nəfərlik ailədə hər zaman mehribanlıq, qarşılıqlı hörmət və ehtiram olub. Ata halal qazancla ailəsini dolandırıb, ana ailə qayğıları ilə məşğul olaraq övladlarının təlim-tərbiyəsi və təhsilləri ilə maraqlanıb. Ailədəki sağlam mühitdə sağlam, tərbiyəli, vətənpərvər övladlar böyüyüb...

Evin böyük oğlu, ailənin ilk sevinc payı olan qəhrəmanımız xoş siması, təlim-tərbiyəsi, böyüklərə hörmətlə yanaşması ilə hər zaman seçilib, sevilib. Xasiyyət baxımından hər zaman şən, zarafatcıl, mehriban, istiqanlı bir insan olub Emil. Şit zarafatları, yersiz gülüşü, düşünülməmiş ağızdan çıxan söz-söhbətləri sevməyib. Ağır təbiətli olan gənc, ciddiliyi sevən, nizam-intizama, qayda-qanuna riayət edən idi. Hər zaman savad və bacarığına, yüksək təşkilatçılıq qabiliyyətinə görə seçilib. Təbiət vurğunu olduğundan, ölkədaxili səyahəti sevib. Demək olar ki, bütün bölgələri həvəslə gəzib. Bu onun ən sevdiyi məşğuliyyətlərindən biri olaraq, hobbisinə çevrilmişdi.

Emil müntəzəm olaraq idmanla məşğul olub. Hələ məktəbdə oxuduğu zamanlarda sərbəst güləşlə məşğül olmaqla bir çox uğurlara imza atıb. Hərbi xidmətdən qayıtdıqdan sonra da idmanla məşğul olmağa davam edib.

2016-cı ildə, bütün gənclər kimi, Emil də ailə sahibi olmaq arzusunu reallaşdıraraq, könlünün sevib-seçdiyi, əslən Qusar rayonundan olan Aygün Şıxmətova ilə ailə hayatı qurur. Bu evlilikdən onların 2 övladı dünyaya gəlir: İbrahim və Nicat. Gənc ata, uşaqların yaşlarının az olmasına baxmayraq, onları vətənpərvər ruhda böyütməyə çalışıb. Azyaşlılar Vətən, Torpaq, Bayraq haqqında özlərinin dərk edəcəyi səviyyədə nəsə bilərək, qürurla Azərbaycan bayrağını sinələrinə sıxıb əzizləyiblər. Atanın bir arzusu da övladlarını ali təhsilli, savadlı görmək olub.

İsgəndərovlar ailəsinin də qismətində dədə-baba torpaqlarının həsrəti ilə yaşamaq varmış. Ailənin hər bir üzvü düşmənin tezliklə cavabının verilməsi gününü səbirsizliklə gözləyib. Doğmaların uyuduğu torpaq düşmən tapdağı altında inləyirdi...

Vaqif İsgəndərov hələ SSRİ dönəmində hərbiçi olub. I Qarabağ müharibəsi başlayanda Rusiyadan geri dönüb və mənfur qonşularımıza qarşı savaşa qoşulub. "Bakı korpusu” adlanan, topçulardan ibarət artilleriya bölümündə qərargah rəisi olub. Korpusun idarəetməsində xüsusi rolu olmuş hərbiçi, hərbidən tərxis olunduqdan sonra, Sumqayıt şəhər 10 saylı məktəbdə İdman müəllimi kimi fəaliyyət göstərib.

Evin kiçik oğlu Əli Vaqif oğlu İsgəndərovun həqiqi hərbi xidməti dövrü Vətən müharibəsi zamanı ilə üst-üstə düşür. Əli, ehtiyatda olan əsgər kimi, hər an döyüş bölgəsində düşmənə qarşı mübarizəyə hazır olur. Oktyabrın 2-si 2020-ci ildə o, müharibəyə çağrılır, sonradan Przidentin Sərancamı ilə, şəhid qardaşı olaraq, ordudan tərxis olunur. O da Füzuli rayonunun Alaxanlı kəndindən Cəbrayılacan şərəfli döyüş yolu keçir, sonradan evə göndərilir. Evin ortancıl oğlu, hər zaman döyüşə hazır olan İsgəndər İsgəndərov əmək fəaliyyəti ilə məşğul olaraq ailəsinə dəstək olur.

Beləcə, Emilin də ailəsi daxil olmaqla, İsgəndərovlar ailəsi bir yerdə sevincli-kədərli günlərini yaşayırlar...

----

27 Sentyabr 2020-ci ildə Ali Baş Komandanın əmri ilə, düşmənə qarşı əks-hücüm əməliyyatına başlanan zaman – II Qarabağ savaşına bütün Azərbaycan ayağa qalxır. Nəhayət, düşmənə layiq olduğu cavabın verilıməsi anı yetişir. Torpaq həsrətlilərinin sevincinin həddi-hüdudu olmur. Hər kəs tezliklə QƏLƏBƏ çalınacağı ümidi ilə yaşayır və döyüşür!

Vaqif İsgəndərov da "Öncə Vətən, torpaqlarımız” deyib, 3 oğluna xeyir-dua verərək cəbhəyə yola salmağa hazır olur.

Müharibə başlayan gündən ön cəbhədə iştirak edən İgidimiz Füzuli, Cəbrayıl, Xocavənd uğrunda gedən döyüşlərdə fəal iştirak edir. Ağlı, zəkası, bacarığı sayəsində, döyüş texnikasını dəqiq bildiyindən, hərbidəki təcrübəsinə və peşakarlığına güvənərək mənfur düşmənin saysız-hesabsız canlı qüvvəsini məhv edir, silah-sursatın, zirehli texnikanın qənmət kimi əldə olunmasında xüsusi rolu olur.

İgidimiz bir çox əməliyyatlarda uğurları ilə dillər dastanı olur. Cəbrayılda düşmənin hərbi hissəsinə daxil olaraq xeyli sayda canlı qüvvəsini məhv edir. Daha sonra Hadrut və Qubadlı uğrunda gedən döyüşlərdə iştirak edərək düşmənə qarşı rəşadətlə savaşır.

Emil imkan tapan kimi ailəsinə zəng edirdi. Çox ailəcanlı, qayğıkeş övlad, ailə başçısı idi. Hər dəfə zəng edəndə uşaqlarını xəbər alar, onları validenlərinə tapşırardı. Bu uşaqlar onun əmanəti idilər.Sonuncu danışıq oktyabrın 30-da olur...

Qəhrəmanımızın iştirak etdiyi əməliyyat noyabrın 4-dən 5-nə keçən gecə olur. Yaım-qrup komandiri olan Emil İsgəndərov 11 nəfərə görə cavabdehlik daşıyırdı. Şuşaya Daşaltı tərəfdən qalxmalı olurlar. Qolundan iki güllə yarası almasına baxmayaraq, üç əsgərinə kömək edir, onların yarasını sarıyır, təxliyə edir. Ona nə qədər təxliyə olunmasını söyləsələr də, o, etiraz edir. "Mənim dəstəmin yarısı yuxarıdadır, orada olmalıyam”söyləyərək, yenidən dağa qalxır. Əsgərləri üçün hər an narahat olan, onları qoruyaraq özünü ölümün pəncəsinə atan Azərbaycanın mübariz oğlu düşmənlə mübarizədə son damla qanınadək savaşır, sonda qəhrəmancasına həlak olaraq Şəhidlik Zirvəsinə ucalır.

Emil İsgəndərov kimi Vətən oğullarının sayəsində barlı-bərəkətli, Gülüstan torpaqlarımız düşmən tapdağından azad olunur. Qəhrəmanımız I Qarabağ savaşında iştirak etmiş atası Vaqif İsgəndərovun və onun silahdaşlarının yarımçıq qalmış işini tamamlayaraq, QƏLƏBƏ Tarixinə adını Qızıl hərflərlə yazır! Bu gün artıq dədə-baba ocağında üçrəngli Azərbaycan bayrağı dalğalanır, Emil kimi qəhrəman oğulların sayəsində!!!

Qeyrətli Vətən oğlu Emil İsgəndərov 12.11.2020-ci il tarixində Sumqayıt Şəhidlər Xiyabanında dəfn olunur.

2011-2020-ci illərdə Daxili İşlər Nazirliyinin Daxili Qoşunlarının Xüsusi Təyinatlı Dəstəsində xidmət edən, Vətən müharibəsində qəhrəmanlığı ilə dillərdə dastana dönən 30 yaşlı mərd, cəsur igidimiz, gizir Emil Vaqif oğlu İsgəndərov ölümündən sonra, Azərbaycan Respublikasının prezidenti İlham Əliyevin müvafiq Sərəncamlarına əsasən, "Vətən uğrunda” və"Şuşanın azad olunmasına görə” medalları,həmçinin "Hərbi xidmətdə fərqlənməyə görə” 3cü dərəcəli medallatəltif edilib.

Ruhun şad olsun, Cənnətməkan Şəhidimiz!!!

Aygün Hacıyeva,

AJB, AYB, AAB-nin üzvü