Rəhim Möhübbət oğlu Dadaşov 07.01.2003-cü il tarixdə Sumqayıt şəhərində anadan olub. 2009-2014-cü illərdə Bakı şəhər Nizami rayonu, Ə.Mahmudov adına 220 saylı, 2014-2017-ci illərdə Sumqayıt şəhər 38 saylı və  N.Tusi adına 12 saylı tam orta məktəblərdə təhsil alıb.

R.Dadaşovun dayısı Əsədulla Fərəc oğlu Məmmədov Polşada hərbi təhsil alımış və "Artilleriya üzrə motoatıcı” ixtisasına yiyələnmişdi. I Qarabağ müharibəsinin iştirakçısı olan və döyüşlər zamanı yaralanan  dayısını Rəhim sual yağışına tutardı. Peşəkar hərbiçi də yeniyetməni maraqlandıran suallara ətraflı, aramla cavab verərdi. Hər zaman dayısı ilə qürur duyan Rəhimin qəlbində artıq hərbiçi olmaq istəyi baş qaldırırdı...

2017-ci ildə doqquzillik təhsili başa vuran R.Dadaşov sənədlərini Naxçıvanda yerləşən H.Əliyev adına Hərbi Liseyə verir və imtahanları uğurla verərək, ən yüksək balla qəbul olur.  O, 2020-ci ilin iyul ayında təhsilini müvəffəqiyyətlə başa vuraraq evə dönür. Dərslərində yüksək nəticələr əldə etdiyinə görə, liseyin rəhbərliyi tərəfindən sənədləri H.Əliyev adına Hərbi Akademiyaya göndərilir. R.Dadaşov burada da imtahanları uğurla verir və "Pilot” fakültəsinə daxil olur, "Qırıcı-sürüçü”  ixtisası üzrə təhsil almağa başlayır.

Rəhim Dadaşovun anası Yetər xanım ötən günlərlə bağlı xatirələrini danışır: "Məktəbdə oxuduğu illərdə təlim-tərbiyəsinə, savadına, düzgünlüyünə, maraq dünyasına görə fərqlənərdə. Hər bir fənnə maraq göstərərdi. Ədəbiyyata xüsusi marağı vardı. Kitab əlindən düşməzdi. Detektiv janrda yazılmış əsərləri həvəslə mütaliə edər, tarixi filmləri izləyərdi. Meyxana və rep janrında musiqiləri maraqla dinləyərdi.

Uşaqlıqdan təyyarəçi omaq istəyirdi. Yüksəklikdən əsla qorxmazdı. Bu, onun üçün bir adrenalin idi. Xoş xasiyyətinə görə hər kəs tərəfindən sevilərdi. Pozitiv enerjili, qohumcanlı, dostcanlı, istiqanlı, hər kəsə kömək etməyə can atan, hamıya tez inanan bir oğul idi Rəhimim!

Dənizi çox sevərdi, xüsusən də üzməyi. Bu səbəbdən, həvəskar kimi, üzgüçülüyə də getdi. Ona görə çox narahat olardım. Ona görə, dənizə gedəndə məndən gizlədərdi.

 Həddən çox vətənpərvər idi. Hərbiçi olmağa qərar verəndə etiraz etsəm də, qəti şəkildə dedi ki, "ana, nə olur-olsun, mən hərbiçi olacam!”. Arzusuna çatanda necə də sevinirdi balam...”.

27.09.2020-ci il tarixdə başlanan II Qarabağ savaşında iştirak etmək arzusunda olanlardan biri də gənc kursant, 18 yaşlı Rəhim olur. Lakin həmin vaxt istəyi reallaşmasa da, Ali Baş Komandan başda olmaqla, Müzəffər Azərbaycan Ordusunun ZƏFƏR tarixinə imza atması onu çox sevindirir. O, ata ocağı Qubadlını, ana ocağı Zəngilanı tezliklə görəcəyi ümidi ilə yaşayır.

R.Dadaşov 1-ci kursu bitirəndən sonra, arzusunu gerçəkləşdirmək məqsədi ilə, anasına hərbi xidmətə getmək istədiyini bildirir. 2004-cü ildə infarkt səbəbindən ailə başçısını itirən ana, o gündən oğlunu, hər cür çətinliklərə qatlaşaraq, tək boyütməli olmuşdu. Oğlunun necə vətənpərvər və sözünün üstündə duran, qərarından dönməyən olduğunu bildiyindən bu dəfə bir söz deyə bilmir...

R.Dadaşov artıq qərarını vermişdi. O, Vətən qarşısında oğul borcunu yerinə yetirmək üçün, 2021-ci ilin yanvar ayında könüllü olaraq aidiyyəti quruma ərizə ilə müraciət edir. 04.10.2021-ci il tarixdə o, 5 nəfər kursant yoldaşı ilə birlikdə hərbi xidmətə yola düşür və Laçın rayonunun ən hündür zirvələrindən biri olan, düşmənlə üzbəüz olan mövqedə - Qaragöl kəndində xidmətə başlayır. Həmin gün gəncin sevincinin həddi-hüdudu olmur...

2021-ci il dekabr ayının 22-dən 23-nə keçən gecə gənc əsgər Rəhim Dadaşov postda olur. Komandirinin tapşırığını icra etməyə gedərkən düşmən gülləsinə tuş gələn cəsur əsgər, təəssüf ki, yerindəcə həlak olaraq gözlərini əbədi yumur...

Azərbaycan Ordusunun Vətən eşqli mətin əsgəri Rəhim Möhübbət oğlu Dadaşov 24.12.2021-ci il tarixdə Sumqayıt Şəhidlər Xiyabanında dəfn olunur.

 Təlim-tərbiyəsi, savadı, bacarığı, xarakteri... ilə könüllərin sevgisini qazanan gənc hərbiçi yaşasaydı, Vətən naminə hələ nə qədər xeyirxah işlərə, uğurlara imza atacaqdı. Lakin uca Allah öz sevimli bəndəsini seçərək, 18 yaşlı Vətən sevdalı oğulu öz dərgahına – Cənnətə apardı. O Cənnət ki, hər bir insan ömrünün sonunda o məkanda olmaq arzusu ilə çırpınır...

Bu gün yaşam səbəbi, həyatının mənası... olan yeganə övladını itirən bir anaya təskinlik verməkdə söz də acizdir... Ancaq onu bilirik ki, Allahın SEÇİLMİŞi olan Rəhim kimi qeyrətli, vətənpərvər oğullar illər, əsrlər keçsə də,  unudulmayacaq, tarixdə yaşayacaqlar!