Şəhadəti ilə milyonların qəlbinə adını yazan İgidimizin Vətənə, bizlərə iki əmanəti qaldı. Bu əmanəti qorumaq isə bizim borcumuzdur!

---------------------------------------------------------------------------

3-cü dərəcəli "Rəşadət” ordenli

HEYDƏROV ANAR BƏHRUZ oğlu

(Kapitan)

ANAR BƏHRUZ oğluHEYDƏROV 01.06.1988-ci il tarixdə Şamaxı şəhərində anadan olub. 1990-cı ildə Heydərovlar ailəsi Sumqayıt şəhərinə köçəndə Anarın cəmi 2 yaşı olub. 1992-ci ildə o, 39 saylı körpələr evi-uşaq bağçasında tərbiyə alıb.

Dörd nəfərdən ibarət olan zəhmətkeş Heydərovlar ailəsində böyüyən Anar qayğısız uşaqlıq illərini yaşayıb. Əzizlərini həddən çox sevən balaca oğlan ailəsinə həddən çox bağlı olub. Anarın atası özəl firmaların birində sürücü, anası Nəcibə xanım isə tikiş sexində işləməklə ailə qayğıları ilə yaşayıb, uşaqların təlim-tərbiyəsinə xüsusi diqqət yetiriblər. Sakit bir həyat tərzi keçirən əməksevər bir ailədə Anar və bacısı Turanə vətənpərvər ruhda böyüyüblər.

Anar Heydərov 1995-2006-cı illərdə C.Səfərov adına Sumqayıt şəhər 10 saylı tam orta məktəbdə oxuyub. Təhsil müddətində o, davranışı, tərbiyəsi, gözəl xasiyyəti, mehribanlığı, asanlıqla ünsiyyət qurmaq qabiliyyəti, incə yumoru ilə müəllim və sinif yoldaşlarının hörmət və rəğbətini qazanıb. Hər zaman öndə olmağa, deyilən tapşırığı cəld yerinə yetirməyə can atan yeniyetmə oğlan məktəbin ictimai həyatında da fəallıq göstərib. İdmana marağı olduğundan, bir çox idman növləri ilə fərdi şəkildə məşğul olub.

Uşaqlıqdan qəlbində kök salmış Vətən eşqi ilə boya-başa çatan Anarın hərbiyə tükənməz marağı, həvəsi olub. Elə bu səbəbdən, təhsilini başa vurduqdan sonra qəti qərar verdiyi seçiminə doğru addım atıb.

Anar Heydərov orta təhsilini başa vurduqdan sonra sənədlərini Heydər Əliyev adına Azərbaycan Ali Hərbi Məktəbinə (AAHM) verib. İmtahanları uğurla verərək "İnzibati idarəetmə” fakültəsinə daxil olub. Arzusuna çatan gəncin sevincinin həddi-hüdudu olmayıb. O, dərslərinə diqqət yetirərək birincilər sırasında olub. Hətta təhsildəki uğurlarına görə bir çox təltiflərə layiq görülüb.

A.Heydərov 2010-cu ildə təhsilini əla qiymətlərlə, "Leytenant” rütbəsi ilə bitirməklə, "İdarəetmə mühəndisliyi” ixtisasına sahib olub.

Gənc zabit 27.07.2010-cu il tarixdən 25.06.2011-ci il tarixədək Azərbaycan Respublikasının Silahlı Qüvvələrinin "Təlim və Tədris Mərkəzi”ndə fəaliyyət göstərən "Motoatıcı taqım komandiri” zabit ixtisas kursunu müvəffəqiyyətlə bitirib. Daha sonra o, Ağdam rayonunda yerləşən "N” saylı hərbi hissəyə təyinat alıb. Bir neçə il cəbhə bölgəsində xidmət göstərib.

İllər ötdükcə gənc zabitin də vəzifəsi yüksəlib. 2014-cü ilin oktyabr ayında Anar Heydərov Sumqayıt şəhərində H.Z.Tağıyev qəsəbəsində yerləşən "N” saylı hərbi hissədə "Kapitan” rütbəsi ilə xidmətinə davam edib. Daha sonra Abşeron rayonunun Pirəkəşkül qəsəbəsindəki hərbi hissədə xidmət göstərib.

Bütün gənclər kimi, gənc kapitan da ailə həyatı qurmaq, külfət sahibi olmaq arzusunda olur. Ən əsası isə, bu arzuda olan valideynlərin istəyini yerinə yetirməklə, onları sevindirmək istəyir. Elə bu səbəbdən o, 2014-cü ildə Zərifə xanımla ailə həyatı qurur. 6 illik ailə hayatında onların iki övladı dünyaya gəlir: Kübra və Emil. Beləcə, qəhrəmanımız gözəl ailəsi, doğmaları ilə birlikdə, sevdiyi sənətində Vətənə ləyaqətlə xidmət edərək sakit, xoşbəxt həyatına davam edir...

A.Heydərov 2016-cı ildə baş verən Şanlı Aprel döyüşlərində iştirak edir və bu döyüşlərdə şücaəti ilə seçilir. Bu mübarizədə Azərbaycan Silahlı Qüvvələrinin qazandığı qələbədə gənc kapitanın da imzası yer alır.

A.Heydərov 2020-ci ilin yanvar ayında Goranboy rayonunda yerləşən hərbi hissətə təyinat alır və Vətən müharibəsinə qatılanacan burada xidmət edir.

A.Heydərov Vətənə xidməti dövründə döyüş və içtimai-siyasi hazırlığına, qarşıya qoyulan tapşırıqların yerinə yetirilməsində və nizam-intizamda fərqləndiyinə, Vətənə şərəf və ləyaqətlə xidmət göstərdiyinə görə, "Azəbaycan Silahlı Qüvvələrinin 95 illiyi (1918-2013)” və "Azərbaycan Ordusunun 100 illiyi (1918-2018)” Yubiley medalları, "Qüsursuz xidmətə görə” 3-cü dərəcəli medalla təltif olunur.

2020-ci ildin İyul ayında baş verən Tovuz hadisələri zamanı gənc zabit yerində qərar tuta bilmir. General-mayor Polad Həşimovun və silahdaşlarının şəhid olması onu çox sarsıdır, düşmənə qarşı olan nifrəti min qat artır. Bu itkidən ciddi xarakterli, ağır təbiətli zabitin də gözləri dolur və o, nə olursa-olsun, Şəhidlərin qanını yerdə qoymayacağına söz verir.

2020-ci il sentyabr ayının 27-si II Qarabağ savaşının - Vətən müharibəsinin başlanması hər kəs kimi, Azərbaycan Ordusunun mübariz kapitanı Anar Heydərovu da sevindirir. Artıq azğın düşmənin cavabını vermək zamanı yetişmişdi...

Sevincini gizlədə bilməyən Anar elə həmin gün - müharibə başlayan gün göz yaşları içərisində evlərinə zəng edir və valideynlərinə qəti şəkildə, inamla;"torpaqları tezliklə alacağıq və mənimlə bütün xalqım fəxr edəcək!”, -deyir.

Ağdərə, Tərtər, Suqovuşan istiqamətində gedən döyüşlərdə kapitanın şücaəti gənc əsgərlər üçün əsl mərdlik, qəhrəmanlıq nümunəsi idi. O, düşmənə göz açmağa imkan verməyərək neçə-neçə canlı qüvvəsini, texnikasını məhv edir, neçə-neçə yaralı yoldaşını döyüş ərazisindən kənarlaşdırır...

Hər zaman əsgərlərini qoruyan, onlara qardaş, ata, dost sevgisi göstərən zabit, döyüş meydanında da hər biri üçün narahat olur.

A.Heydərovun düşmənin iki postunun alınmasında əvəzsiz xidməti olur.

Sentyabrın 30-u axşam saatlarında Anar ailəsi ilə əlaqə saxlayır. Hər zamankı kimi, "hər şey yaxşıdır, narahat olmayın, özünüzdən, uşaqlardan muğayat olun”söyləyir.

Oktyabrın 1-i Suqovuşan istiqamətində, Murovdağ silsiləsində əməliyyat başlanır. Anargilin dəstəsi bu döyüşə qatılır. Döyüş zamanı kapitan ayağından güllə yarası alsa da, dəstəsinin önündə duraraq, "İrəli!” qışqırır və özünü qabağa atır. Komandirin ruh yüksəkliyini, Qələbə əzmini görən əsgərlər də irəli atılırlar. Qızğın döyüşlər gedir. Əsgərlər yerə uzanaraq, irəli sürünə-sürünə düşmənə cavab atəş açırlar. Bu zaman komandiri yolun ortasında ayaq üstə, güllə yağışın altında, heç nədən, heç kəsdən çəkinməyərək, qorxmayaraq, mərd-mərdanə düşmən postuna tərəf irəliləyən görürlər. Kapitanın bu igidliyi, cəsarəti bir dastana dönür. Sonradan dəstə pusquya düşərək, düşmən tərəfindən mühasirəyə alınır. Lakin yenilməz ordunun mübariz əsgərləri bu səddi yara bilir. Təəssüf ki, cəsur kapitan bu savaşda ağır yaralanır, qanaxmadan həlak olaraq gözlərini əbədi yumur. Bir qəhrəmanın da həyat hekayəsinin son akkordları da burada çalınır...

01.10.2020-ci il tarixdə Şəhidlik Zirvəsinə yüksələn Anar Heydərov 30 dekabr 2020-ci il tarixdə Sumqayıt Şəhidlər Xiyabanında dəfn olunur.

Ağır təbiətli, sözünün və əməlinin yerini bilən, güclü xarakterli, haqq carçısı, ədalət savaşçısı, yeri gələndə isə, uşaq kimi kövrək qəlbli, hər kəsə kömək etməyə can atan bir insan idi İgidimiz. Elə bu keyfiyyətlərinə görə əhatə dairəsi geniş olub. Hər kəs də onu sevib, hörmət bəsləyib.

Gənc zabit hərbidə o qədər ciddi, sərt idi ki, övladları ilə də hərbi dildə danışardı. Anası da çox zaman söhbətə müdaxilə edib deyərdi ki, "a bala, bura sənin üçün hərbi hissə deyil a... uşaqların əsgərlərin deyillər ki...”.Anar da cavab verərdi ki, "ay ana, öyrəşmişəm o həyata, çətin ki, bundan sonra dəyişəm...”. O, övladlarını vətənpərvər ruhda böyüdərək, "oğlumu idmana qoyacam, idmançı olsun”deyər, Kübranın isə həkim olmasını arzulayardı.

Bəhruz bəy (ata):"Oğlumla fəxr edirəm. Çox vətənpərvər idi. Hər zaman torpağın alınmasını düşünürdü, illərin torpaq həsrətinə son qoyulmasını istəyirdi. "Erməni kimdir ki, bizim torpaqda at oynatsın?!” deyərdi. Arzusuna da çatdı, qəhrəmanlığı ilə!”.

Nəcibə xanım (ana):"Çox arzuları vardı uşaqlıqdan... Ən böyük arzusuna qovuşdu balam... Vətən sağ olsun!”.

Turanə xanım (bacı):"Qardaşımla qürur duyuram. Uca Allah onu seçilmişlərdən etdi. Ən uca zirvədədir. Düzdür, yanımızda deyil deyə, kədərlənirik, ancaq hər bacıya nəsib olmur bu şərəf. Adı, ruhu hər zaman bizimlədir. Qardaşımın çox xasiyyətini, hərəkətlərini oğlumda görürəm, ona da çox oxşayır. Bu mənə qürur verir ki, oğlum dayısına oxşayır”.

Zərifə xanım (həyat yoldaşı):"Həyatda yaşamağa çox həvəsli idi, tükənməz arzuları vardı. Övladlarını oxutdurmaq, savadlı görmək, Vətəni özü kimi sevdirmək istəyirdi. Müharibəyə də gedəndə, hər şeyi gözə alaraq, mənə çox şeyi başa saldı. "Başınızı dik tutun, uşaqlar mənimlə fəxr edəcək, torpaqları alıb qayıdacağıq, almayınca döndü yoxdur!”. Evdən çıxanda son sözü bu olmuşdu”.

Bu gün kapitan Anar Heydərov haqqında onu tanıyan hər kəs ağızdolusu danışır. Onun qəhrəmanlıq yolu gənc nəsil üçün bir örnəkdir. Hələ neçə-neçə kitablar yazılacaq, əfsanələr, rəfayətlər qoşulacaq qəhrəmanımız haqqında. Ancaq bu günün həqiqəti odur ki, Azərbaycan Ordusunun kapitanı Anar Heydərov ən uca məqam olan Şəhidlik Zirvəsini fəth edərək, 44 günlük Vətən müharibəsinin ZƏFƏR tarixinə adını silinməz mürəkkəblə həkk etməyi bacardı! Belə İGİD oğulları olan Vətən heç bir zaman basılmaz, bölünməz!

Azərbaycan Silahlı Qüvvələrinin mərd, igid, qorxmaz zabiti, 32 yaşlı kapitan Anar Bəhruz oğlu Heydərov ölümündən sonra, Azərbaycan Respublikasının prezidenti İlham Əliyevin müvafiq Sərəncamlarına əsasən, 3-cü dərəcəli "Rəşadət” ordeni,həmçinin "İgidliyə görə”, "Vətən uğrunda”və "Suqovuşanın azad olmasına görə”medallarıilə təltif olunub.

Ruhun şad olsun, Cənnətməkan Şəhidimiz!!!

Aygün Hacıyeva,

AJB, AYB və AAB-nin üzvü