Xəbər verdiyimiz kimi, Sumqayıtın nəqliyyat sistemi şəhər İcra Hakimiyyətinin tabeliyindən alınaraq Azərbaycan Yerüstü Nəqliyyat Agentliyinin (AYNA) tabeliyinə verilib. Xeberle.com olaraq şəhər sakinlərinin nəqliyyatla bağlı şikayətlərini işıqlandırmağa davam edirik.
Davamlı olaraq aldığımız şikayətlərdən biri yay və qış aylarında avtobusların kondisionerlərin işlədilməməsi ilə bağlıdır. Sakinlər bildirirlər ki, yayda, xüsusən nəqliyyatın hərəkətinin pik saatlarında, sıxlıq yarananda avtobusda istidən dayanmaq mümkün olmur, dəfələrlə sürücülərə bildirilməsinə baxmayaraq, onlar kondisionerləri işə salmırlar.
Bəs sakinlərin haqlı narazılıqlarının aradan qaldırılması üçün hansı tədbirlər həyata keçiriləcək?
Məsələ ilə bağlı AYNA-nın mətbuat katibi Tural Orucov Xeberle.com-a açıqlama verib. Mətbuat katibi qeyd edib ki, avtobusların müasir havalandırma, sərinləndirmə və isitmə sistemləri ilə təchiz olunması Nazirlər Kabinetinin 73 saylı qərarı ilə təsdiq olunmuş tələblərdə əksini tapıb. T.Orucov bildirib ki, müntəzəm sərnişindaşıma fəaliyyəti ilə məşğul olan daşıyıcılar da həmin qərarda əskini tapan tələblərə əməl etməlidir, daşıyıcılarla iş çərçivəsində bu tələb hər zaman onlar qarşısında qoyulur.
Onun sözlərinə görə, hazırda köhnə avtobusların bu cür sistemlərlə təchiz edilmiş nəqliyyat vasitələrlə əvəz edilməsi və bu sistemlərin işlək vəziyyətdə saxlanılması ilə bağlı tapşırıqlar verilir.
"Sərnişindaşıma sahəsində göstərilən xidmətin keyfiyyəti, təhlükəsizliyi və rahatlığının artırılması, həmçinin avtobu marşrutlarının təhkim edilməsində şəffaflığın qorunması məqsədilə marşrut xətləri müvafiq qanunvericiliyin tələblərinə uyğun olaraq, mərhələli qaydada müsabiqəyə təqdim edilir. Müsabiqənin şərtlərindən biri də avtobusların daha yeni olması və müasir standartlara cavab verməsidir", - deyə Tural Orucov vurğulayıb.
Aygün İsmayılova
Xəbərdən istifadə edərkən istinad etmək vacibdir.
