Xəbər verdiyimiz kimi, Sumqayıt şəhərində kanalizasiya sistemi tutulub, ərazi su altında qalıb.
Söhbət Sülh küçəsi, 76-cı məhəllə ərazisindən gedir. Burada yaşayan sakinlər Xeberle.com-a müraciət edərək bildiriblər ki, ümumi kanalizasiya xəttinin tutulması səbəbindən ərazi su altında qalıb.
Sözügedən yerin su ilə dolması səbəbindən hətta evindən çölə çıxmağa çətinlik çəkən Miranov Orxan Həsənağa oğlu saytımıza bildirib ki, bu küçənin sakinləri buradan keçən kanalizasiya axıntılarının yaratdığı problemlərdən uzun müddətdir əziyyət çəkirlər. Hər yer su içində olduğundan sakinlərin gediş-gəlişi üçün ciddi maneə yaranıb. Çirkab suları küçə boyunca axır. Ərazini üfunət qoxusu bürüyüb və sakinlər borunun təcili şəkildə təmir olunmasını istəyirlər.
Yaşayışçılar epidemioloji-gigiyenik qaydaların pozularaq, müxtəlif xəstəliklərin yaranmasından narahatdırlar.
Məsələylə bağlı Sumqayıt Sukanal İdarəsinin rəisi Xalid Quliyevlə əlaqə saxladıq. İdarə rəisi Xeberle.com-a bildirib ki, sözügedən ərazidə idarəyə məxsus heç bir kanalizasiya şəbəkəsinin olmamasına baxmayaraq, vətəndaşların müraciəti əsasında əraziyə texnika veriləcək və ərazidə yaşayan insanlara köməklik göstəriləcək:
"Əvvəlcə onu deyim ki, bizim orda heç bir kanalizasiya şəbəkəmiz yoxdur. "Acı dərə” açıq kanaldır və biz ora xidmət göstərmirik. Buna baxmayaraq, məlumat daxil olan kimi biz yerində baxış keçirmişik. Məlum olub ki, maşın bazarının arxasında olan tikinti şirkəti tərəfindən orda olan göl beton borular vasitəsilə "Acı dərə” kanalına istiqamət verilib. Nəticədə də kanal daşıb. Bu da əhalinin narazılığına səbəb olub. Bizim əməkdaşlar şirkətin nümayəndələri ilə görüşüblər. Bildiriblər ki, su kanala axıdılmasın. Vətəndaşların müraciəti əsasında əraziyə texnika veriləcək və ərazidə yaşayan insanlara köməklik göstəriləcək”.
Sumqayıt Sukanal İdarəsinin baş mühəndisi Mahir İmanov isə açıqlamasında deyib ki, "Acı dərə” kanalında suyun səviyyəsinin artması nəticəsində kanalın ətrafında yaşayan bir neçə sakinin evə gediş-gəlişində problem yaranıb:
"76-cı məhəllə ərazisindən keçən "Acı dərə” kanalına maşın bazarının arxasında yığılmış böyük gölməçə hissəsi kanala axıdılıb. Nəticədə suyun səviyyəsi qalxaraq artmağa başlayır. Qabaqda isə su lal axını ilə gedir. Su arxadan çoxaldıqca, "Acı dərə” kanalının ətrafında yaşayan bir neçə sakininin evə gediş-gəlişində problem yaranıb”.
Mövzunu davam etdirəcəyik.
Elşən Yəhyayev
Xəbərdən istifadə edərkən istinad etmək vacibdir.
