Sumqayıtlıları daha çox narahat edən məsələlərdən biri də, heç şübhəsiz ki, şəhərdaxili və şəhərlərarası (sürət qatarı istisna) nəqliyyat sisteminin müasir tələblərə cavab verə bilməməsi ilə bağlıdır. Artıq bir aydır ki, Sumqayıt və Bakı arasında ekspress avtobuslar fəaliyyətə başlayıb. Əsas məqsəd xidmətin əhatə dairəsinin genişləndirilməsi və xidmət keyfiyyətinin artırılması ilə bağlıdır. Yeni ekspres avtobus marşrut xətti bu istiqamətdə növbəti mühüm addımdır. Yeni xətt 21 yanvar tarixindən fəaliyyətə başlayıb.
Görəsən, Bakı-Sumqayıt marşrut xətti üzrə fəaliyyətə başlayan ekspress avtobuslara maraq necədir və sərnişindaşıma hansı səviyyədə gedir? Avtobuslar boş gedir ya dolu? Gün ərzində neçə avtobus yola çıxır? İlk və son avtobuslar hansı saatlarda hərəkət edir? Ekspress avtobuslar yolboyu neçə yerdə saxlayır?
Bütün bu suallarımıza aydınlıq gətirmək üçün Azərbaycan Yerüstü Nəqliyyat Agentliyinə (AYNA) üz tutduq. Qurumdan Xeberle.com-un qeyd edilən sualları cavablandırılıb. Bildirilib ki, "BakuBus”ın istismarına verilmiş ekspress marşrut xətti Bakı Beynəlxalq Avtovağzal Kompleksi ilə Sumqayıt Avtovağzalını əlaqələndirir:
"Xətdə müasir tələblərə cavab verən komfort avtobuslar işləyir. Sərnişinlərin rahat, sürətli və təhlükəsiz daşınması üçün səfərlər Neoplan markalı 48 yerlik komfortlu avtobuslarla həyata keçirilir. Ümumilikdə 14 avtobus 11 dəqiqə intervalla sərnişinlərə xidmət göstərir. Səhər Sumqayıtdan ilk çıxış vaxtı saat 5:50, Bakı şəhərindən isə saat 6:30-dadır. Axşam Bakıdan son çıxış vaxtı 23:00-da, Sumqayıtdan son çıxış vaxtı isə 22:20-dədir. Yeni ekspress xətt üzrə gediş haqqi isə 80 qəpik təşkil edir”.
AYNA-dan o da bildirilib ki, avtobusların son dayanacağa çatma müddəti təxminən 35 dəqiqədir:
"Ekspress avtobuslar Sumqayıt avtovağzalı, "Bağçalı evlər” yaşayış kompleksi, Sumqayıt dairəsi, Ceyranbatan qəsəbəsi, "Avtovağzal” metrostansiyası, Bakı Beynəlxalq Avtovağzal Kompleksi marşrutu üzrə hərəkət edir. Avtobusların son dayanacağa çatma müddəti təxminən 35 dəqiqə təşkil edib. Digər nəqliyyat vasitələri eyni məsafəni təxminən 1 saat ərzində qət edə bilir”.
Nəqliyyat eksperti Eldar Bəşirov ekspress avtobusların sərnişinlər üçün çox rahat ola biləcəyini vurğulayıb: "Mən həmin avtobuslardan hələ istifadə etməmişəm. Hər halda yaxşı olar. Rəqabət nə qədər çox olsa, bir o qədər insanların xeyrinədir. Sərnişinlər avtobusların rahatlığına xüsusi önəm verir. Qanunsuz sərnişindaşımalara imkan verilməməlidir. Ekspress avtobuslar sərnişinlər üçün rahatdır”.
Bəs, şəhər sakinləri ekspress avtobusların fəaliyyətindən razıdırlarmı?
Şəhər sakini Aydın Vəliyevin sözlərinə görə, ekspress avtobusların son dayanacağı avtovağzal olduğuna görə bu sərnişinlər üçün uyğun deyil: "Avtobus birbaşa Bakı avtovağzalına gedir. Bu biz sərnişinlər üçün heç də əlaverişli deyil. Vaxt baxımından uyğun gəlmir. Ya 1 manatlıq taksilərlə, ya da qanunsuz olaraq birbaşa 20 Yanvara gedən mini-avtobuslarla getmək məcburiyyətində qalırıq. Ekspress avtobuslar Bakı avtovağzalına deyil, birbaşa 20 Yanvar metorstansiyasına getsə, daha rahat olar. Şəhərimizdəki marşrutların işindən də heç razı deyiləm. Çünki əksəriyyəti yol-hərəkəti qayda-qanunlarından, nəqliyyat vasitəsində insanı necə daşımaq lazım olduğundan xəbərsizdir. Kim necə bacarır və necə istəyir, elə də sürür. Belə hadisələri də görəndə heç kəs cəzalandırılmır. Bu səbəbdən də onlar məsuliyyət hiss etməyərək hadisəni təkrarlayırlar”.
Digər şəhər sakini Validə Şixəliyeva isə qeyd edib ki, ekspress avtobuslardan istifadə etmək onun üçün sərfəlidir: "Mənim iş yerim Bakı avtovağzalına yaxın olduğuna görə, ekspress avtobuslardan istifadə edirəm. Həm qiymət münasibdir, həm də rahat avtobuslardır. Bəzən olur ki, tıxacda qalırıq. Amma, avtobuslar üçün yeni salınmış zolaqlar ekspress avtobusların vaxtında çatmağına köməklik edir”.
Mövzu ilə bağlı Sumqayıtın rəsmi instagram səhifəsində də sorğu apardıq. Cavablardan belə məlum oldu ki, sərnişinlərin əksəriyyəti ekspress avtobusların fəaliyyətindən razıdır, bir qisim isə narazı olduğunu bildirib.
Elşən Yəhyayev
Xəbərdən istifadə edərkən istinad etmək vacibdir.
