Sumqayıtda piyadaların rahat hərəkəti üçün keçid və zebraların vəziyyəti qənaətbəxş deyil. Bir çox küçə və prospektlərdə piyadalar üçün çəkilən zolaqların ya rəngi solub, ya da ümumiyyətlə xətlər silinib. Yaranmış vəziyyət piyadalar və sürücülərdə çaşqınlıq yaradır və təhlükələrə səbəb olur. Nəticədə sakinlər yolu çətinliklə keçir, sürücülər isə bəzi piyada zolaqlarından xəbərsiz qalırlar. Bu zaman piyada nişanları da onların köməyinə çatmır. Nəticədə isə yol qəzaların sayı artır.
Xeberle.com-un əməkdaşının Sumqayıtda hərəkətin intensiv olduğu 43-cü məhəllə, Ş.Bədəlbəyli küçəsindən hazırladığı fotoreportajdan aydın olur ki, yolların bir çoxunda qeyd olunan problem qalmaqdadır. Sakinlər haradan necə keçəcəyini bilmirlər. Belə olan halda sürücülərlə piyadalar arasında problem yaşanır. Ərazidə təhsil kursunun olması isə hər an faciəvi sonluğa gətirib çıxara bilər. Buradan gün ərzində yüzlərlə insan keçir, əsasən də şagird, abituriyent və müəllimlər.
Ərazidə yaşayan sakinlərin bildirdiyinə görə, adıçəkilən küçədə əsas yol nişanlarının bəziləri rənglənsə də, nədənsə piyada zolaqları ubudulur. Heç şübhəsiz bu da, yol-nəqliyyat hadisələrinin baş verməsini qaçılmaz edir; bu yaxınlarda ərazidə bir piyadanın vurulması ilə nəticələnən ağır yol-nəqliyyat hadisəsi kimi.
Elşən Yəhyayev
Xeberle.com
P.S. Mövzu ilə bağlı müvafiq qurumların açıqlamalarını dərc edəcəyik.
Xəbərdən istifadə edərkən istinad etmək vacibdir.
