Günümüzdə "Bakı Bulvarında sadə çay 2 manat, mürəbbəli çay 3 manatdır" xəbəri sosial şəbəkələrdə və insanlar arasında ən çox müzakirə olunan mövzuya çevrildi.

Doğrudanmı mürəbbəli çay, özü də bulvarda, 3 manata ola bilər? Heç kənddə mürəbbəli çayı 3 manata verməzlər, o ki qaldı Bulvar olsun...
Bizim isə üz tutacağımız məkan Bakı deyil, Sumqayıtın dənizkənarı - Nəsimi adına Mədəniyyət və İstirahət parkı oldu. Görəsən, Sumqayıtın bulvarında qiymətlər necədir?

"Armudu stəkanda çay, ürəyimiz yananda çay..." deyib üz tutduq Nəsimi adına Mədəniyyət və İstirahət Parkına. Burada həm çayın dadına baxdıq həm də qiyməti ilə maraqlandıq. İlk gəldiyimiz yer "Panorama" ailəvi istirahət mərkəzi oldu. Hava isti olduğundan mərkəzdə o qədər müştəri yox idi. Kafenin inzibatçısına yaxınlaşdıq. O, sadə çayın 1 manat, mürəbbələrin isə çeşidinə görə qiymətlərinin dəyişdiyini bildirdi.

Burada çay içən müştərilər də çayın qiymətinin ciblərinə münasib olduqlarını dedilər.

Bu kafedən çıxıb üz tutduq "Qala” istirahət mərkəzinə. Mərkəzin inzibatçısı gəlişimizin məqsədini öyrənib deyir ki, burada sadə çay müştəriyə 2 manat, mürəbbə ilə isə 5 manata təklif olunur. İnzibatçı şirniyyatlarla təklif olunan çayın qiymətindən də danışdı. 

Demək olar ki, Sumqayıt Bulvarında olan bütün çay verilən məkanları gəzdik. Deyəsən, burada dəyişən heç bir şey yoxdur və sadə çayı 2 manata sifariş edə bilərsiniz. Amma... Bəlkə də obyekt sahibləri kamera və mikrafonumuzu görüb "endirim" etdi...

Xeberle.com