"Şəhərimizdə xalça sənətinin ən gözəl nümunələrinin yaradıldığı Oğuz, Şəki, İsmayıllı, Qəbələ, Şuşa, Laçın, Ordubad, Quba, Qusar, Xaçmaz, Şabran və digər rayonlardan olan yüzlərlə ailə yaşayır. Və həmin ailələrdə xalça sənətini mükəmməl bilən yaşlı qadınlar, qız-gəlinlər az deyil. Məncə Sumqayıtda da Azərbaycanın bu qədim tətbiqi sənət nümunəsini yaşatmaq, qadınlar üçün yeni iş yerləri yaratmaq, həm də Sumqayıtın iqtisadi potensialının müəyyən qədər artımına nail olmaq üçün şəhərimizdə böyük bir xalça müəssisəsi yaratmaq yaxşı olardı. Sumqayıtda toxunmuş xalçaların satıldığı xarici turistlər və ya hədiyyə edildiyi qonaqlar vasitəsilə şəhərimizin adının bütün dünyada təbliğ edilməsi məqsədilə isə toxunan milli ornamentli xalçaların hər birinin ortasında (ayağında olmaz – o məqsədlə ki, həmin xalçalar ermənilərin əlinə düşsə, o hissəni kəsib, xalçaları öz adlarına çıxmasınlar) Sumqayıtın adı da yazılmalı, onun simvollarının ("Göyərçin” abidəsinin və şəhərin girəcəyindəki "Göylərə qanad açan göyərçin”in) təsvirləri də olmalıdır."

Bu sözləri Xeberle.com-un "Sizcə, Sumqayıtın potensialına uyğun olaraq hansı istehsal və xidmət sahələri yaradaraq yeni iş yerləri açmaq olar?”sualını cavablandırarkən Azərbaycan Jurnalistlər Birliyinin üzvü, Osman Mirzəyev adına Respublika mükafatı laureatı Rəhman ORXAN deyib.

R. Orxan həmçinin bildirib ki, Sumqayıtda gəlir gətirəcək digər bir sahə spirtli içkilərin istehsalı ola bilər: "Spirtli içkilərin qəti əleyhinə olsam da, şəhərimizdə spirtli içkilər istehsal edən özünəməxsusluğu ilə seçilən bir müəssisənin də inşası yaxşı olardı. Söhbət müalicəvi əhəmiyyəti olan tut arağından gedir. Digər ölkələrdəki spirtli məhsullardan fərqli olaraq həmin müəssisədə yalnız tut, üzüm və hətta əncir arağı da istehsal etmək olardı ki, onları yeni Azərbaycan brendi səviyyəsinə də qaldırmaq mümkündür. Tut arağının müalicəvi əhəmiyyətli olması onu həm respublikamızda, həm də bütün dünyada Azərbaycan məhsulu kimi məşhurlaşdırar, populyar edər. Xammal isə Sumqayıt regionunda – Sarıqaya, Novxanı ərazisində, bütün Abşeron ərazisində kifayət qədərdir. Bağlarında bu meyvələrdən olanlar da onları həmin müəssisəyə təhvil verməklə kifayət qədər gəlir əldə edər, məhsulları ağaclarda qalıb (xüsusilə - tut) zay olmaz. O da məlumdur ki, üzüm və əncir hər yerdə yığılıb istifadə edilsə də, tut nəinki bir çox fərdi bağlarda və həyətlərdə, hətta şəhərimizin küçələri boyunca, bağlarda və parklarda çox zaman yerə tökülərək, xarab olur, çürüyüb-əzilir. Şəhərimizdə müvafiq müəssisə olarsa, nəinki böyüklər, hətta uşaqlar da tutun baxımsız qalmış ağaclardan da yığılıb təhvil verilməsinə maraq göstərərlər.

Sumqayıtın spirtli içkilərinin xarici alıcıları daha çox cəlb edilməsi məqsədi ilə isə onlara xüsusi maraq doğuran "Sumqayıt və fransız Düma”, "A.Dümanın Qafqaza səyahəti”, "A.Düma Sumqayıtda”, "A.Dümanın Sumqayıta səyahəti”, "Sumqayıt və ingilis H.Berou” və s. kimi adlar da vermək olar (etiketlərin üzərində A.Dümanın və H.Berounun şəkillərini də verməklə qeyd etmək olar ki, Sumqayıt haqqında ilk yazılı məlumatı ingilis səyyahı H.Berou hələ 1580-ci ildə vermiş, fransız yazıçısı A.Düma isə 1858-ci ildə "Qafqaza səyahət” kitabında Sumqayıt adlı poçt stansiyasından söz açmışdır).

Xüsusilə tut arağını keyfiyyətli və orijinal dizayna malik şüşə qablarda buraxmaqla, erməniləri qabaqlayaraq (hələ gecikməmişiksə), onun bütün dünyada YUNESKO tərəfindən rəsmi şəkildə Azərbaycan məhsulu kimi tanınmasına nail olmaq qürur doğurardı!"