Əslində Sumqayıtı sevən hər bir sakin yaşıl örtüyün bərpasını arzulayır. Gəlin qısa da olsa, "Yaşıl bina”nın tarixinə ekskursiya edək. Sumqayıt şəhəri İcra hakimiyyəti aparatının binası 1958-ci ildə tikilib istifadəyə verilib. Sumqayıt şəhər icraiyyə komitəsinin sədri Kamal Axundovun dövründə binanın ön hissəsində perimetr boyu Kazan şəhərindən gətirilmiş xüsusi sarmaşıqlar əkilmiş, ümumi binanın fasadı tam sarmaşıqla örtülərək binanın formasına uyğunlaşdırılıb. Uzun müddət yaşıl libasa bürünmüş şəhər İcra hakimiyyətinin inzibati binası Sumqayıtın gözəl memarlıq nümunəsi kimi hətta respublikamızdan kənarda da tanınan rəmzlərdən birinə çevrilmişdir. Şəhərimizə axışan turistlər və hörmətli qonaqlar bu binaya heyran qaldıqlarını bildirirdilər. Sumqayıtla vidalaşanda onun qarşısında yadigar olaraq həmişə şəkillərini çəkdirirdilər. Hətta bu binanın şərəfinə Almaniyanın Sumqayıtla qardaşlaşmış Lüdviqshafen şəhərində bu gözəlliyi əks etdirən marka da buraxılıb. Amma təəssüf ki, bu sənət əsəri, bu estetika məhv ol(un)du.

"Yaşıl bina”nın sarmaşıqları 2010-cu ildə eks icra başçısı Vaqif Əliyevin dövründə hissə hissə saralmağa başladı və az sonra örtük binadan götürüldü. Həmin vaxt bu hadisə ictimaiyyət arasında, xüsusilə də mətbuat və sosial şəbəkələrdə geniş müzakirə obyektinə çevrildi və ciddi şəkildə qınandı. O vaxt şəhər icra hakimiyyətindən isə bildirdilər ki, sarmaşıq ömrünü başa vurduğu üçün quruyub. Dedilər ki, guya bu bitkilər 50-60 ildən sonra qurumağa başlayır. Əslində, belə binalar dünyada nadir hallarda olsa da, onlara rast gəlmək olar.

İngiltərədə, Avstriyada, Hollandiyada bu cür, hətta daha möhtəşəm tikililərə rast gəlmək mümkündür. «Sarmaşıqlar»ın təxminən 200-300 yaşı vardır. Bəs onlar niyə indiyə qədər qurumayıb? Çünki ona vaxtlı-vaxtında qulluq göstəriblər, suvarıblar. Bizimki isə sanki unuduldu, bəlkə də kiməsə ögey oldu…

Hətta icra hakimiyyətinin binası 2012-ci ildə təmir edilərkən məlumat lövhəsində onun yenidən yaşıl olacağı göstərilirdi. Sumqayıtlılar çox ümidlənmişdilər. Lakin son məqamda bu baş vermədi və bina sadəcə boz görkəmdə qaldı… Amma sumqayıtlılar yenə də ümidlərini itirmədilər.

Xeberle.com portalında bu istiqamətdə dəfələrlə yazılar, sosioloji sorğular keçirilib. Məsələn, 2015-ci ilin mart ayında Sumqayıtın icra hakimiyyətinin binasının görkəmi ilə bağlı onlayn sorğu keçirmişdik.

Sual belə idi: "Sumqayıt Şəhər İcra Hakimiyyətinin binası yenidən yaşıl olsunmu? ” Suala 3 cavab variantı təklif olunmuşdu və respondentlər "Bəli", "Xeyr" və "Fərq etməz, məni maraqlandırmır" variantlarından birini seçə bilərdilər. Sorğumuzda ümumilikdə 1229 istifadəçi (oxucu) iştirak etmişdi. Onlardan 74 faizi (910 səs) adıçəkilən binanın yenidən yaşıl olmasını istəmişdi. 14 faizi (171 səs) isə şəhər icra hakimiyyətinin binasının hazırkı vəziyyəti ilə qane olmuşdu. Və cəmi 12 faiz istifadəçi ümumiyyətlə bu məsələyə biganə qalaraq "Fərq etməz, məni maraqlandırmır” variantını seçmişdi.

Beləliklə, 1 ay ərzində keçirdiyimiz sorğunun nəticəsinə əsasən sumqayıtlıların böyük əksəriyyəti - 74 faizi Sumqayıt Şəhər İcra Hakimiyyətinin binasının əvvəlki kimi yaşıl olmasını istəmişdi. Lakin yenə də olaya ciddi reaksiya olmadı. Və budur, məhz indiki dönəmdə bu məsələ yenidən gündəmə gəlib.

Artıq binanın qarşı hissəsindən sarmaşıq kolları əkilib. Portalımız adından zəhmət çəkənlərə, təşəbbüs göstərənlərə təşəkkür edirik. Ümidvarıq ki, tezliklə o sarmaşıqlar boy atacaq və icra hakimiyyətinin binası əvvəlki – yaşıl görkəminə qayıdacaq.