Prezidentin rəsmi saytında yerləşdirilmiş məktublarda Prezident İlham Əliyevin Sumqayıta olan diqqət və qayğısından, şəhərimizin gündən-günə gözəlləşməsindən, şəhərdə həyata keçirilən abadlıq-quruculuq işlərindən razılıq ifadə olunur.

Prezidentin rəsmi saytında yerləşdirilmiş məktublardan bir neçəsinin mətnini təqdim edirik:

Möhtərəm cənab Prezident.

Sumqayıt şəhəri M. Quliyev adına 3 nömrəli tam orta məktəbin müəllim, şagird, valideyn kollektivi doğma şəhərimizdə aparılan quruculuq işlərindən çox böyük fərəh hissi keçirir. Analoqu olmayan istirahət parkının salınması, binaların dam örtüklərinin dəyişdirilməsi, yeni möhtəşəm Heydər Əliyev Mərkəzinin tikilməsi, musiqi, şahmat məktəblərinin inşa olunması və şəhərimizdə aparılan abadlıq işlərinə böyük dəstək verdiyiniz üçün Sizə dərin minnətdarlığımızı bildiririk.

Möhtərəm Prezident, Siz xalqın dayağı, ölkəmizdə inkişafın, tərəqqinin qarantısınız. Ulu Tanrıdan Sizə uzun ömür, möhkəm cansağlığı və Azərbaycanımız naminə böyük uğurlar arzulayırıq.

Sumqayıt şəhəri M.Quliyev adına 3 nömrəli tam orta məktəbin müəllim, valideyn və şagird kollektivi adından dərin hörmətlə

Qurbanova Tirmə Rza qızı, direktor.

Azərbaycan Respublikası, Sumqayıt şəhəri.

______________________________________________________________________________________________________________________________

Möhtərəm Prezident,

Sizin apardığınız uğurlu daxili və xarici siyasətiniz, çoxşaxəli quruculuq və abadlıq işləriniz bizləri çox sevindirir və bununla qürur hissi keçiririk.

Cənab Prezident, Sizin diqqət və qayğınız nəticəsində respublikamızın hər yerində olduğu kimi, Sumqayıt şəhərində də son vaxtlar aparılan quruculuq və abadlıq işlərinə görə öz adımdan və Sumqayıt şəhər 25 nömrəli tam orta məktəbin pedaqoji kollektivi adından minnətdarlığımı bildirir, Sizə əzəmətli işlərinizdə yeni-yeni uğurlar arzulayıram. Biz Sizinləyik əziz Prezidentimiz!

Hörmətlə,

Əlirzayeva Ruhiyyə Filman qızı

Sumqayıt şəhər 25 nömrəli tam orta məktəbin direktoru

Azərbaycan Respublikası, Sumqayıt şəhəri.

________________________________________________________________________________________________________________

Hörmətli cənab Prezident.

Son aylarda Sumqayıt şəhərində aparılan abadlıq-quruculuq işləri sakinlər tərəfindən çox böyük ehtiramla qarşılanır. Dənizkənarı bulvarın yenidən qurulması, Heydər Əliyev Mərkəzinin, musiqi və şahmat məktəblərinin tikintisi, binaların dam örtüklərinin və liftlərin yenilənməsi, istilik sisteminin çəkilməsi sakinlərin rifahı naminə görülən işlərin davamıdır.

Qısa zamanda 6 saylı körpələr evi-uşaq bağçasında əsaslı təmir-tikinti işləri görüldü, körpə fidanlarımız üçün hər cür şərait yaradıldı.

Cənab Prezident, körpələr evi-uşaq bağçasının kollektivi adından Sizə dərin minnətdarlığımızı bildirir, möhkəm cansağlığı, uzun ömür, işlərinizdə uğurlar arzu edirik. Biz sumqayıtlılar Sizin daxili və xarici siyasətinizi bəyənir və Sizi dəstəkləyirik.

Hörmətlə,

Babayeva Gülnarə Sarı qızı, 6 saylı körpələr evi-uşaq bağçasının müdiri.

______________________________________________________________________________________________________________________________

Hörmətli cənab Prezident,
Son vaxtlar Sumqayıt şəhərində və onun qəsəbələrində genişmiqyaslı işlər həyata keçirilməkdədir. Yollara yeni asfalt örtüyü döşənmiş, su və elektrik xətləri çəkilmiş, parklar və yaşıllıqlar salınmışdır.
Bütün bunları, həmçinin sumqayıtlıların ən sevimli məkanlarından olan dənizkənarı bulvarda və ulu öndərimiz Heydər Əliyevin adını daşıyan parkda aparılan yenidənqurma işlərini şəhər sakinlərinə göstərilən böyük qayğı hesab edirik. Sumqayıt şəhəri tamamilə yeni görkəm almışdır.
Möhtərəm Prezident, Corat qəsəbəsində görülən işlər də yerli sakinlərin ürəyincədir. Biz Sizə inanır, dəstəyimizi ifadə edir və minnətdarlığımızı bildiririk.
Hörmətlə,
Kərimov Məhərrəm Fərrux oğlu
Azərbaycan Respublikası, Sumqayıt şəhəri, Corat qəsəbəsi.