Sentyabrın 5-də Dini Qurumlarla İş üzrə Dövlət Komitəsinin (DQİDK) Sumqayıt bölgəsi üzrə şöbəsinin təşkilatçılığı ilə Sumqayıt şəhərində respublikamızda elan edilmiş "Sülh aylığı” çərçivəsində "Bəşəri sülhə aparan yol – millətlərarası və dinlərarası etimad” mövzusunda "dəyirmi masa” təşkil olunub.
Tədbirdə DQİDK-nın Sumqayıt bölgəsi üzrə şöbəsinin müdiri vəzifəsini icra edən Şirin Cəfərov, şöbənin əməkdaşları, eləcə də Kotec qəsəbəsi "İmam Sadiq” məscidi dini icmasının sədri Mirfəyyaz Fəttayev, Sumqayıt stansiyası yaşayış massivində yerləşən "İmam Hüseyn” məscidi dini icmasının sədri Eldar Ömərov, Corat qəsəbə məscidi dini icmasının sədri Sahib Məmmədov, Xızı rayonu Sitalçay məscidində dini ayinləri icra edən Füzuli Bayramov və başqaları iştirak ediblər.
"Dəyirmi masa”nı giriş sözü ilə açan DQİDK-nın Sumqayıt bölgəsi üzrə şöbəsinin müdiri vəzifəsini icra edən Şirin Cəfərov müasir dünyada bəşəri sülhdən danışmağa, bu mövzu ətrafında müzakirələrin aparılmasına böyük ehtiyac olduğunu bildirib. Qeyd edib ki, "Sülh aylığı” çərçivəsində keçirilən tədbirlər, sosial layihələr də məhz bu ehtiyacdan irəli gəlir.
Tədbirdə qloballaşma prosesi, elm, texnologiyanın sürətlə inkişafı, bütün bunların fonunda sülh və müharibənin mahiyyəti dini, fəlsəfi aspektlərdən şərh edilib. Bildirilib ki, "Bəşəri sülhə necə nail olmaq mümkündür?” sualı filosofları, politoloqları, sosioloqları, ilahiyyatçıları daim düşündürüb və belə qənaət hasil olunub ki, dayanıqlı sülhə aparan yol millətlərarası, mədəniyyətlərarası, dinlərarası münasibətlərdə etimaddan keçir.
Bu baxımdan Azərbaycan xalqının ictimai-fəlsəfi, tarixi dünyagörüşü, sahib olduğu multikulturalizm və tolerantlıq dəyərləri dialoqun, etimadın əldə olunması, inkişaf etdirilməsi istiqamətində nümunə götürülə bilər.
Xəbərdən istifadə edərkən istinad etmək vacibdir.
