Dəfələrlə Sumqayıtın müxtəlif yerlərində zibilin gec daşınması, dolub daşan zibil qutuları ilə bağlı materiallar təqdim etmişik. Bu dəfə Sumqayıt şəhər 1-ci mikrorayon, 11 saylı bağçanın ətrafında yaşayan sakinlər portalımıza şikayət ediblər. Onların sözlərinə görə bağçanın qarşısında qoyulan bu zibil qabları nəinki yay aylarında, hətta payızda da dolub daşır. Burada zibilin daşınması bir müşkülə çevrilib. Dəfələrlə şikayət etmələrinə baxmayaraq Təmizlik Departamenti əməkdaşları zibili vaxtlı-vaxtında daşımır, bu da sakinlərin haqlı narazılığına səbəb olur. Daşınmayan məişət tullantıları ətrafda pis qoxu və antisanitariya vəziyyəti yaradır. Nəzərə alsaq ki, bu əcaib mənzərə düz uşaq bağçasının yanındadır, onda durumun körpələrə nə dərəcədə zərərli olduğunu təsəvvür etmək çətin deyil. Biz bunu göstərdik. Ümidvarıq ki, problemi işıqlandırdıqdan sonra əlaqədar qurumlar insan sağlamlığına dəyən zərərin məsuliyyətini bir daha xatırlayacaqlar.