Sumqayıtda 42-ci məhəllədə 5 saylı yataqxana ötən əsrin 60-ci illərindən   sakinlərin istifadəsinə verilib. İstismar müddətini çoxdan bitirən, qəzalı vəziyyətdə olan binada 160-a yaxın ailə yaşayır.  Binanın sakinləri buranın  çökəcəyindən qorxurlar. Hər an uçma təhlükəsi ilə üz-üzə qalan "yaşayış” yeri onun ailə üzvlərinin sağlamlığına da təsirsiz ötüşməyib. Olduqca baxımsız, nəm,üfunət qoxan məhdud sayda otaqlara sığınan sakinlər illərdir bu şəraitdədirlər. Bütün bunlar azmış kimi, kommunal problemlər də vətəndaşları təngə gətirib. Amma buna baxmayaraq hələ də, onlara kömək əli uzadan yoxdur. Sakinlər illərdir ki, binalarının təmir olunacağı günü gözləyir. Bu müddətdə isə qəzalı binada yaşamaqdan başqa çıxış yolları yoxdur. Binanın içi də, çölü kimi bərbaddır. Mənzillərə girəndə divarların çatları, pilləkənlərin dağılmış vəziyyətdə olması  insanların gündəlik həyatında çətinliklər yaradır. Hətta Fövqəladə Hallar Nazirliyi tərəfindən binanın qəzalı olması barədə rəy verilib. Bu səbəbdən mənzillərə qazın verilişi də dayandırılıb. Vəziyyətin acınacaqlı olmasını 8 saylı Mənzil Kommunal İstismar İdarəsinin rəisi də görür.  

Sumqayıt şəhər İcra Hakimiyyəti Mənzil Kommunal Təsərrüfat İstehsalat Birliyindən isə ARB TV-yə bildiridilər ki, şəhərdə mövcud olan 63 yataqxananın əksəriyyətinin əsaslı təmirə ehtiyacı var. Deməli sakinlər hələ bir müddətdə də bu acınacaqlı vəziyyətdə yaşamaq məcburiyyətində qalacaq. 

RAMİL ZEYNALLI