"Ömürlük sevgi yaram” adlı ədəbi-bədii gecədə Sumqayıt şəhər Təhsil Şöbəsinin metodisti Gülnar Əzimzadə, 9 nömrəli məktəbin direktoru Bəhruz Səlimxanov, 38 nömrəli məktəbin direktoru Nadir Atakişiyev, "Əməkdar müəllim” Bəsirə Ağayeva, şairlərdən Elbrus Qayalı, Asif Asiman, eləcə də məktəbin müəllim və şagird kollektivi iştirak ediblər.

Tədbiri giriş sözü ilə açan 9 nömrəli məktəbin direktoru Bəhruz Səlimxanov Zahir Abbasın həyat və yaradıcılığı barədə geniş məlumat verdi. B. Səlimxanov bildirdi ki, özünəməxsus yaradıcılıq yolu olan və müasir Azərbaycan poeziyasının tanınan simalarından biri sayılan Zahir Abbas zəngin mənəvi dünyaya malik bir şairdir. Qeyd etdi ki, maraqlı yaradıcılıq yolu, gərgin sənət axtarışları şairin qələmini gündən-günə püxtələşdirmiş, onu şeirin keşməkeşli yollarında öz yeri, öz çəkisi olan şairlərdən biri edib.

Tədbirdə çıxış edən digər ziyalılar Zahir Abbasın yaradıcılığı haqqında bəzi məqamlara toxundular. Vurğulandı ki, şair gözəl şeirləri ilə milyonların könlünü fəth edib.

Sonra Zahir Abbas məktəb rəhbərliyinə göstərdikləri diqqət və qayğıya görə təşəkkür edərək bir-birindən mənalı şeirləri ifa edərək tədbir iştirakçılarının könlünü oxşadı.

Sonda məktəbin şagirdləri şairin yadadıcılığından şeirlər səsləndiriblər. Qeyd edək ki, müntəzəm olaraq dövri mətbuatda çıxış edən Zahir Abbas 1978-ci il yanvar ayının 1-də Laçın rayonunun Güləbird kəndində müəllim ailəsində anadan olub. 1995-ci ildə orta məktəbi, 2000-ci ildə Azərbaycan Kooperasiya Universitetini bitirib. 2000-2002-ci illərdə həmin universitetdə magistr pilləsində təhsil alıb. 2002-ci ildən müxtəlif maliyyə qurumlarında çalışıb. Azərbaycan Yazıçılar Birliyinin üzvüdür. Zahir Abbas bir neçə mahnının, o cümlədən "Sarışınım" (Nazpəri Dostəliyeva), "Bu gecə yurduma qayıdacağam" (Məhəbbət Kazımov), "Əllərin əlimə dəymir nə vaxtdır" (Baloğlan Əşrəfov), "Yuxuma gəl" (Zülfiyyə Xanbabayeva), "Quzu kəsərəm" (Rəhim Rəhimli), "Tələsmə hələ" (Zeynəb Xanlarova), "Unuda bilmədim" (Qədir Qızılsəs), "Ömrümüzün bu çağında" (Brilyant Dadaşova), "Əzizim" (İlhamə Quliyeva), "Getmisən" (Nadir Qafarzadə), "Bacara bilmirəm" (İlkin Fərhadoğlu), "Hansını sevim görən" (Elçin Hüseynov) və başqa mahnıların sözlərinin müəllifidir.