Sumqayıtdakı Heydər Əliyev Mərkəzində Xocalı soyqırımı qurbanlarının xatirəsi anılıb.
Xeberle.com AZƏRTAC-a istinadən xəbər verir ki, soyqırımının 25-ci ildönümü ilə əlaqədar keçirilən tədbir Sumqayıt şəhər Gənclər və İdman Baş İdarəsi, şəhər Təhsil şöbəsinin nəzdində fəaliyyət göstərən Gənc Müəllimlər Şurası və Heydər Əliyev Mərkəzi ilə birgə təşkil olunub.
Gənclər təşkilatlarının nümayəndələrinin, ictimai fəal gənclərin, gənc müəllimin, tələbə və şagirdlərin iştirak etdikləri anım mərasimində əvvəlcə Uşaq və Yeniyetmələrin Yaradıcılıq Mərkəzinin şagirdlərinin əl işlərindən ibarət "Xocalıya ədalət” adlı sərgi ilə tanışlıq olub. Sərgidə fərqlənən üç əsərin müəllifinə Baş İdarənin xatirə hədiyyələri təqdim edilib.
Anım mərasimində erməni silahlı dəstələrinin Xocalıda törətdikləri soyqırımından bəhs edən videoçarx nümayiş olunub.
Tədbirdə çıxış edən Baş İdarənin gənclərlə iş sektorunun müdiri Ceyhun Hüseynov, Gənc Müəllimlər Şurasının sədri Aygün Rəhimova, Heydər Əliyev Mərkəzinin direktoru Aygün Zülfüqarlı, Gənclər Evinin əlaqələndiricisi Pəri Vəliyeva dövlətimizin Xocalı soyqırımı barədə həqiqətlərin dünya ictimaiyyətinə çatdırılması istiqamətində gördüyü məqsədyönlü işlərdən, Heydər Əliyev Fondunun başlatdığı təbliğat-təşviqat kampaniyasından, eləcə də ermənilərin işğalçı siyasətindən, müxtəlif illərdə xalqımıza qarşı törədilən vəhşiliklərdən və bu kimi faciələrə dünya ictimaiyyətinin biganəliyindən danışıblar.
Hadisələrin canlı şahidi olmuş Xocalı sakinləri Cavid Ələkbərov və Əli Əyyubov çıxışlarında həmin günün dəhşətli anlarından, ermənilərin insanları vəhşiliklə öldürməsindən, işgəncə faktlarından söz açıb, gənclərimizi tariximizdə yaşananları diqqətlə öyrənməyə, onlardan ibrət almağa və nəticə çıxarmağa, hadisələri dünya ictimaiyyətinə çatdırmağa səsləyiblər.
Sonda iştirakçılara Baş İdarənin "Xocalı faciəsi” adlı bukletləri paylanılıb.
Xəbərdən istifadə edərkən istinad etmək vacibdir.
