Tanınmış jurnalist və PR menecer İlham Məmmədzadə öz facebook profilində bu gün baş vermiş dəhşətli avtoqəza ilə bağlı fikirlərini bölüşüb:

Yenə Sumqayıt-Bakı yolunda avtomobil qəzası, yenə günahsız qurbanlar. Valideyinin min bir əzab-əziyyətlə böyüdərək, ali təhsil alması üçün yola saldığı bu tələbələrin ölümünə görə məsuliyyəti bu səfər kimin ayağına yazaq? Yük daşınması üçün nəzərdə tutulmuş avtomobili sərnişin daşınması üçün rekonstruksiya edərək, heç bir etik qaydaları, sürücülük mədəniyyətini gözləmədən, yalnız radarlarda sürəti azaldan, damağı siqaretli, ağzı söyüşlü, bir əli mobil telefonlu olan məsuliyyətsiz sürücülərin, yoxsa bütün bunlara nəzarət etməli olan, lakin nəyəsə görə göz yuman səlahiyyət sahiblərinin? Bizdə avtobus, mikroavtobus və taksi sürücülərinə qanunun tətbiqi sanki kampaniya xarakteri daşıyır. Hansısa bədbəxt hadisə və ya müvafiq qanunun tətbiqi zamanı nəzarət bir neçə gün davam edir, vəssəlam. Yenə köhnə hamam, köhnə dəyirman. Qanunları deyil, bu qanunların icrasına nəzarət edənləri dəyişmək lazımdır.Yoxsa bu bədbəxt hadisələrin sabah bizlərin qapısını döyməsindən heç kim sığortalanmayıb.