Azərbaycanda məcburi köçkünlərin məskunlaşdığı sosial və digər obyektlərin əksəriyyəti sanitar norma və tələblərə cavab vermir. Elə Sumqayıtda da belə binalara rast gəlinir. 25 ildir 15-ci məhəllədəki yataqxanaların birində məskunlaşan Cəmaləddin Rüstəmov binanın qəzalı vəziyyətdə olmasından gileylənir. O, 9 nəfərdən ibarət ailəsinin 1 otaqlı mənzildə, çətin şəraitdə qaldığını bildirir. İndiyədək bu şəhərdə qaçqın və məcburi köçkünlər üçün yaşayış binaları inşa olunmayıb. Ona görə də onlar müvəqqəti olaraq bu yataxanalara yerləşdirilib. Amma artıq pis günlər geridə qaldı desək yanılmarıq. Çünki Bakı və Sumqayıt şəhərlərinin yataqxanalarında müvəqqəti məskunlaşan qaçqın və məcburi köçkün ailələrinin yeni mənzillərə köçürülməsi ilə bağlı layihə hazırlanılır. Sumqayıtda qaçqınlar üçün çoxmənzilli, çoxmərtəbəli binalar tikiləcək. Bunun üçün konkret bir ərazi də ayrılıb. Orada müasir qəsəbə salınacaq. İlkin mərhələdə qəzalı binalarda yaşayanların sayı dəqiqləşdirilərək siyahı hazırlanıb. Sumqayıt şəhərində ümumilikdə 52 min məcburi köçkün müvəqqəti olaraq məskunlaşıb. Onlardan 4 min 688 nəfəri yataqxanalarda yaşayır. İlkin mərhələdə qəzalı yataqxanada məskunlaşan 15 ailə mənzillə təmin olunacaq. Bundan sonra isə uşaq bağçalarında, məktəblərdə və vətəndaşlara məxsus mənzillərdə yaşayan məcburi köçkünlər yeni evlərə köçürüləcək.

Xəbərdən istifadə edərkən istinad etmək vacibdir.