Fövqəladə Hallar Nazirliyinin Sumqayıt Regional Mərkəzi Abşeron rayon Heydər Əliyev Mərkəzində Abşeron rayon İcra Hakimiyyətinin mətbuat orqanı olan "Abşeron" qəzetinin və yerli KİV-nin əməkdaşlarının iştirakı ilə "Fövqəladə hallarla bağlı əhalinin maarifləndirilməsində mətbuatın rolu” mövzusunda "dəyirmi masa” keçirmişdir. FHN Sumqayıt Regional Mərkəzinin İctimaiyyətlə əlaqə və təbliğat sektorundan Xeberle.com-a verilən məlumata görə, martın 29-da təşkil olunan tədbirin keçirilməsində məqsəd baş verə biləcək fövqəladə hadisələrin qarşısının vaxtında alınması, fövqəladə hallar zamanı insanlar arasında davranış qaydalarına əməl etmə vərdişlərinin təkmilləşdirilməsi və əhalinin mətbuat vasitəsilə mütəmadi olaraq maarifləndirilməsində yerli mətbuat ilə əməkdaşlığın müzakirə edilməsi olmuşdur.
Tədbirdə Sumqayıt Regional Mərkəzinin, I Ərazi Dövlət Yanğın Nəzarəti İdarəsinin, Abşeron rayon Dövlət Yanğından Mühafizə Hissəsinin, Abşeron rayon İcra Hakimiyyətinin, "Abşeron" qəzetinin və yerli KİV-nin əməkdaşları iştirak etmişdir.
"Dəyirmi masa”da Regional Mərkəzin fəaliyyət istiqamətləri, gördüyü işlər, yerli KİV-lərin əhalinin maarifləndirilməsində rolundan danışılmışdır. Həmçinin, bu cür tədbirlərin silsilə olaraq Regional Mərkəzin əhatə etdiyi ərazidə fəaliyyət göstərən yerli mətbuat ilə keçiriləcəyi diqqətə çatdırılmışdır.
Sonda Rayon İcra Hakimiyyətinin və yerli KİV-nin nümayəndələri ilə qarşılıqlı fikir mübadiləsi aparılmış, Mərkəzin əməkdaşları tərəfindən jurnalistləri maraqlandıran suallar cavablandırılmış və onlara maarifləndirmə xarakterli təbliğat materialları, yaddaş kitabçaları və bukletlər paylanılmışdır.
Xəbərdən istifadə edərkən istinad etmək vacibdir.
