2016-cı ilin aprel döyüşlərində Azərbaycan Ordusunun göstərdiyi şücaət, əsgər və zabitlərimizin qəhrəmanlığı haqqında yəqin ki, hələ çox kitablar yazılacaq, filmlər çəkiləcək. Çünki şəhid Vətən övladlarının şərəfli və ibrətamiz həyat hekayələrinin xalqımızın yeni nəsillərinin hərbi-vətənpərvərlik tərbiyəsində təsirli rol oynayacağı şəksizdir.
Xeberle.com AZƏRTAC-a istiandən xəbər verir ki, şəhər icra hakimiyyətinin təşəbbüsü ilə Hüseyn Ərəblinski adına Sumqayıt Dövlət Dram Teatrında 2016-cı ilin aprel döyüşlərində erməni təxribatçılarının hücumunun qarşının alarkən şəhid olan əfsanəvi kəşfiyyatçı-komandir, polkovnik-leytenant Raquf Orucovdan bəhs edən filmin və "Murov qartalı” kitabının təqdimat mərasimi keçirilib. Şəhər rəhbərliyi, Milli Məclisin deputatları, əfsanəvi kəşfiyyatçının döyüş yoldaşları, ailə üzvləri və hərbiçilərin iştirak etdiyi tədbirdə əvvəlcə Azərbaycan torpaqlarının bütövlüyü uğrunda canından keçmiş bütün şəhidlərimizin xatirəsi bir dəqiqəlik sükutla yad edilib.
Daha sonra şəhid polkovnik-leytenant Raquf Orucovun keçdiyi şərəfli ömür yolundan bəhs edən film nümayiş olunub. Şəhid qəhrəmanın kəşfiyyat tapşırıqlarını uğurla yerinə yetirməsini əks etdirən video-çəkilişlər əsasında hazırlanan film tədbir iştirakçılarına dərin təsir bağışlayıb. 1972-ci ildə Ağdam rayonunun Çilli kəndində döğulan Raquf İbrahim oğlu Orucovun kəşfiyyatçı bioqrafiyasında mühüm yer tutan hadisələrdən biri də on bir nəfərlik qrupla düşmən arxasına keçərək, 3 ermənini əsir götürüb sağ salamat geri qayıtması olub.
Sumqayıt Şəhər İcra Hakimiyyəti başçısının birinci müavini Faiq Kərimov qeyd edib ki, kəşfiyyatçı Vətənini, torpağını, xalqını hədsiz dərəcədə sevən, hər cür fədakarlığa hazır olan qəhrəmandır. Bu xüsusiyyətlər məhz Raquf Orucovda cəmlənmişdi. Vətən belə oğulları ilə daim fəxr edib.
Milli Məclisin deputatı Tahir Mirkişili bildirib ki, aprel döyüşləri Prezident, Silahlı Qüvvələrin Ali Baş Komandanı İlham Əliyevin dediyi kimi, Azərbaycanın güclü dövlət olduğunu, onun güclü Ordu qurduğunu təsdiqlədi. Silahlı Qüvvələrimiz müasir texnika, hərbi sursatla təchiz olunub və regionun ən güclü ordusuna çevrilib. Xalqımız əmindir ki, Azərbaycan Ordusu işğal altındakı bütün torpaqlarımızı düşməndən təmizləyəcək, apreldə qazanılmış qələbələri davam etdirərək üçrəngli bayrağımızı Qarabağın hər guşəsində dalğalandıracaq.
Digər çıxış edənlər də şəhid polkovnikin keçdiyi şərəfli döyüş yolundan, uğurlu kəşfiyyat əməliyyatlarından, göstərdiyi qəhrəmanlıqdan söz açdılar, onunla bağlı xatirələrini söyləyiblər. Qəhrəmanın yaxınları şəhid ailələrinə göstərilən diqqət və qayğıya görə dövlətimizin başçısı İlham Əliyevə minnətdarlıq hisslərini ifadə ediblər.
Tədbir vətənpərvərlik mövzusunda şerlərin və musiqi nömrələrinin səsləndirilməsi, ədəbi-bədii kompozisiyanın nümayişı ilə davam edib.
Xatırladaq ki, Raquf Orucov Sumqayıt şəhərindəki şəhidlər xiyabanında dəfn olunub.
Xəbərdən istifadə edərkən istinad etmək vacibdir.
