Ölkə mətbuatının inkişafında vacib məqamlardan biri regional mətbuatın mövcudluğu, onun inkişafıdır. Yerli, regional mətbuat cəhətdən axsayır milli mətbuatımız. Bütün media orqanları və media-holdinqlər paytaxtda cəmləşib. Regional medianın inkişafı milli mətbuatın inkişafının əsas stimullaşdırıcılarındandır. Yaşadığımız Sumqayıt şəhərində isə bu sahədə nisbətən normal durum var, 168 saat regional nəşr kimi 2005-ci ildən Sumqayıtda fəaliyyət göstərir. 2009-cu ildən isə Sumqayitxeber.com onlayn qəzet oxucularını xəbərlə təmin edir. Əsasən regional portal kimi fəaliyyət göstərən "Xəbərlə” isə (Xeberle.com) 2012-ci ilin iyun ayının 28-də Sumqayıtda Elnur Ağayev, Kamal Almuradlı və Ramil Zeynallı tərəfindən təsis edilib. Bu portal Xəbərlə MMC-nin balansındadır. Sevindirici haldır ki, hazırda xeberle.com saytlar içində ən çox oxucusu olan regional portaldır. Portalın əsas məqsədi, əsasən, Sumqayıt şəhərinin ictimai-siyasi, sosial-mədəni həyatında baş verən olayları: yenilik, dəyişiklik və problemləri ictimaiyyətin diqqətinə çatdırmaq, şəhərin tarixi şəxsləri, istedadlı, uğur qazanan gəncləri haqda məlumatlar verməkdir. Növbəti vəzifə isə Sumqayıtla bağlı dolğun, ən son, eksklüziv xəbərlərin əsas yayıcısına çevrilməkdir. Eyni zamanda, portal ümumən ölkədə və dünyada baş verən ən mühüm xəbərləri də təqdim etməyi əsas vəzifələrindən hesab edir. Portal ilk öncə xəbəri dolğun və tərəfsiz çatdırmağı qarşısına məqsəd qoyub. Bu illər ərzində yüzlərlə xəbər, müsahibə, reportaj və digər məqalələr təqdim etmiş, SUmqayıtda onlarla problemin həllində vasitəçi olmuşuq. Çox istərdik ki, hər bir şəhər və rayonumuzun yerli media orqanları olsun. Bu, ilk növbədə XXI əsrdə orada yaşayan hər bir sakinin şəhərində, rayonunda hansı hadisələrin baş verməsindən xəbərdar olması, yeri gəldikdə oradan öz fikrini bildirməsi, problem və şikayətlərinin çatdırılması üçün azad bir tribuna deməkdir. Hədəflərimiz və ideyalarımız çoxdur. Allahın və siz oxucuların sayəsində daha böyük uğurlara imza atmağa iddialıyıq.

Xəbərdən istifadə edərkən istinad etmək vacibdir.