Son günlər Sumqayıt şəhər 10-cu mikrorayonda 29, 30, 47 və 48 saylı binalarda yaşayan sakinlər binalarının dam örtüklərinin söküldüyünü və bununla əlaqədar çoxsaylı problem yaşadıqlarını bildirirlər. Vətəndaşların sözlərinə görə dam örtüyü söküldüyü üçün evlərində qəza vəziyyəti yaranıb. Yağış suları işıq xətlərinə dolduğuna görə qısaqapanmanın yarana biləcəyindən təşvişə düşən sakinlər bu məsələnin tezliklə həll edilməsini istəyirlər. Xeberle.com olaraq məsələ ilə bağlı Sumqayıt şəhər Mənzil Kommunal İdarəsi ilə əlaqə saxladıq. Müəssisədən bizə bildirildi ki, bu məsələ hazırda onların da diqqət mərkəzindədir və hətta bu gün onlar tərəfindən həmin əraziyə baxış da keçirilib. Taxta problemi olduğundan bir müddət dam örtüyünün düzəldilməsi dayandırılsa da, artıq bu problem həll olunub və yaxın 2-3 gün ərzində taxta çardağın tikilməsi prosesi başa çatacaq. Dam örtüyü isə 10-15 günə tam şəkildə bərpa ediləcək. Həmçinin bildirildi ki, örtük söküləndən bəri bu məsələyə onlar tərəfindən heç vaxt laqeyd yanaşılmayıb və rəhbərlik daim məsələnin həlli üçün lazımi tədbirlər görüb. Lakin iyun ayında gözlənilməz hava şəraiti bu tədbirlərin bir müddət ləngiməsi ilə nəticələnib. Ümid edirik ki, rəsmi məlumatda deyildiyi kimi, çox yaxın bir zamanda sakinlərin bu problemi birmənalı şəkildə həll olunacaq. Məsələni diqqətdə saxlayacağıq.