Sumqayıtın əsas qəbiristanlığı 11-ci mikrorayonda yerləşir. Həmin əraziyə gedən yol  2 hissəyə bölünüb. Bir tərəfdəki yol təmirlidir, qəbiristanlığın yanındakı yol isə təmirsiz. Təbii ki, yolun təmirsiz olması ora getməyi çətinləşdirir. Həm də ki, ərazi, məişət tullantıları ilə doludur. Hətta məzarlıqların yanında belə tullantılara rast gəlmək mümkündür. Bu səbəbdən də, məzarlığın ətrafından xoşa gəlməz qoxu gəlir.

Qəbiristanlığın şəraiti ilə yaxından tanış olmaq üçün oraya daxil olduq. Məzarların əksəriyyəti hasarlarla digərlərindən ayrılıb, ancaq irəliləmək üçün olan dar keçidlərdə, tikan, ot, tullantılar var ki, bu da yolu çətinləşdirir.
 Məzarlar müxtəlifdir, insanlar kimi. Necə ki, insanlara baxdığımız zaman onlar haqqında ilk fikirlər bizdə yarana bilir, eləcə də qəbirlərə baxanda bu hal müşahidə olunur.
 Torpağın altındakı insanlar bir-birilərindən fərqlənməsə belə, torpağın üstündə hər şey fərqlidir. Elə qəbir daşları var ki, ətrafı ot və tikanlardan təmizlənmiş, güllər içindədir. Elələri də var ki, ot və tikanların əlindən qəbir daşının üzərini oxumaq mümkün deyil. Belə görünür ki, bir müddətdən sonra ya insanlar unudulur, ya da baş çəkəcək kimlərisə qalmır.
 Ot və alaqlar azmış kimi ətrafda xeyli sayda plastik butulkaya da rast gəlmək olur. Yəqin ki, qəbir daşlarını təmizləmək üçün onlar vasitəsilə sular gətirilib, sonra isə oradaca "yaddan çıxıb". Suyun hardan gətirilməsini öyrənmək üçün ətrafa diqqət yetirdik. Bulaq var, ancaq bulaqdan su gəlmir. Bulağın içi və ətrafı otlarla əhatə olunub. Qəbirləri təmizləmək üçün xeyli yol getdikdən sonra su gətirmək mümkün olur.
 Ətrafın təmiz olmamasının səbəblərindən biri də odur ki, ərazidə zibil qutuları yoxdur. İnsanlar da buranı təmiz saxlaya bilmirlər.
 Nəzərə alsaq ki, məzarlığa baş çəkənlərin əksəriyyəti orta yaşlı və yaşlı insanlardır, oturacaqlara ehtiyac var. Əslində, istəyə görə qəbirlərin ətrafına oturacaqların yerləşdirilməsi mümkündür. Ancaq, hamı bunu edə bilmir.
Ümid edirik ki, qəbiristanlıqlarda olan bu vəziyyət tezliklə öz həllini tapacaq.
Foto: Kamran Babayev
Xeberle.com

 

 

 

 

 

 

 

 

 

 

 

 

 

 

 

 

 

 

 

 

Xəbərdən istifadə edərkən istinad etmək vacibdir.