Xeberle.com tərəfindən Sumqayıtda idarə rəhbərləri, şəhərin vəzifəli şəxsləri ilə də müsahibələr hazırlanır. Budəfəki həmsöhbətimiz "ASAN xidmət” mərkəzinin direktoru Ramal Sabirlidir. Ramal müəllimlə Sumqayıt regional "ASAN xidmət” mərkəzinin fəaliyyəti barəsində söhbətləşdik.
 
-      Sumqayıt regional  "ASAN xidmət”  mərkəzi nə zaman yaradılmışdır, işçi və könüllü sayı nə qədərdir?
-      Sumqayıt regional  "ASAN xidmət” mərkəzinin açılışı 3 may 2013-cü il tarixində Azərbaycan Respublikasının Prezidenti cənab İlham Əliyevin iştirakı ilə keçirilib. Fəaliyyətə başladığı ilk dövrdə Sumqayıt şəhəri ilə yanaşı 4 rayonun: Abşeron, Xızı, Siyəzən və Şabran rayonlarının sakinlərinə xidmət göstərən mərkəz 2014-cü ilin 25 mart tarixindən  Şamaxı, Qobustan, Quba, Qusar və Xaçmazın ümumi sayı 550 000-dən çox olan sakininə də xidmət göstərməyə başlayıb. Mərkəzdə dövlət orqanları və funksional yardımçı xidmətlər göstərən müəssisələr də daxil olmaqla 165 əməkdaş fəaliyyət göstərir. Hazırda Sumqayıt regional  "ASAN xidmət”də könüllü sayı 76 nəfər təşkil edir. Fəaliyyətə başladığı gündən isə Sumqayıt regional "ASAN xidmət”  mərkəzində könüllülük fəaliyyəti ilə məşğul olanların sayı 2000-i keçib.
 
-      Mərkəzdə hansı dövlət orqanları var və ümumilikdə nə qədər xidmət göstərilir ?
-         Mərkəzdə vətəndaşlar 10 dövlət orqanının göstərdiyi 25 əsas, ümumilikdə isə 200-dən çox xidmətdən yararlana bilərlər. Bu dövlət orqanlarına Daxili İşlər Nazirliyi, Ədliyyə Nazirliyi, Vergilər Nazirliyi, Dövlət Gömrük Komitəsi, Dövlət Miqrasiya Xidməti, Dövlət Sosial Müdafiə Fondu, Əmlak Məsələləri Dövlət Komitəsi, İqtisadiyyat Nazirliyi, Milli Arxiv İdarəsi və Səfərbərlik və Hərbi Xidmətə Çağırış üzrə Dövlət Xidməti daxildir. Burada həmçinin funksional yardımçı xidmətlər: tibb xidməti, fotostudiya, kafe, tərcümə, hüquqi yardım, mədəniyyət tədbirlərinə bilet satışı, bank, sığorta xidmətləri, Azərbaycan Respublikası Prezidenti tabeliyində Mənzil İnşaat Dövlət Agentliyi "MİDA” MMC , Azərişıq və Azərsu ASC fəaliyyət göstərir.
-         Asan xidmət mərkəzində vətəndaşlara xidmət müəssisənin ilk mərtəbəsində yerləşən məlumat köşkündən başlayır. Qeydiyyat prosesi avtomatlaşdırılıb, xüsusi aparatlarla həyata keçirilir. Bu işdə vətəndaşlara könüllülər kömək edir. Könüllülər vətəndaşlara  müxtəlif xidmətlərlə bağlı ərizələrin yazılmasında kömək edir, ictimai rəyin öyrənilməsi üzrə sorğuları təşkil edir və mərkəzdə sosial aksiyaların və mədəniyyət tədbirlərinin həyata keçirilməsində fəal iştirak edirlər.
 
-          İndiki dövrə qədər olan müraciət sayı nə qədərdir?
-         Yarandığı tarixdən bu günədək Sumqayıt regional "ASAN xidmət” mərkəzinə 2 milyondan çox vətəndaş müraciət edib. Məmnunluq səviyyəsi isə  99%-dən çox olub.


-         Müraciətlər əsasən hansı xidmətlərlə bağlı olur?
-         Gün ərzində mərkəzə 3000-ə yaxın vətəndaş müraciəti olur. Onların əksəriyyəti şəxsiyyət vəsiqələrinin verilməsi və dəyişdirilməsi, ümumvətəndaş pasportlarının verilməsi və dəyişdirilməsi, notariat fəaliyyəti, vətəndaşlıq vəziyyəti aktlarının dövlət qeydiyyatına alınması, eləcə də funksional yardımçı xidmətlərin payına düşür.
 
-         Mobil Səyyar xidmət haqqında danışardınız. İndiyədək təxminən nə qədər vətəndaşımız bu xidmətdən yararlanıb?
-         2013-cü il iyunun 1-dən etibarən "ASAN xidmət” mərkəzlərinin olmadığı regionlarda vətəndaşların dövlət xidmətləri ilə təmin edilməsi üçün zəruri müasir texnoloji avadanlıqlarla təchiz olunmuş səyyar avtobuslardan istifadə olunur. Səyyar avtobuslar hər bölgədə təxminən 1 aya qədər fəaliyyət göstərir.  Mobil Səyyar xidmətdən bu günədək 900 000-dən çox vətəndaş yararlanıb. Bütün mərkəzlərdə olduğu kimi, Sumqayıt regional "ASAN xidmət” mərkəzinə məxsus mobil avtobus il ərzində mərkəzin əhatə etdiyi ərazilərdə vətəndaşlara "Asan xidmət”i daha əlçatan edir.
 
-         Səyyar xidmət haqqında məlumat verərdiniz.
-         "ASAN xidmət"in təklif etdiyi xidmətlərdən istifadə etmək üçün mərkəzlərə gələ bilməyən vətəndaşlara üçün səyyar formada xidmətlər həyata keçirilir. Səyyar xidmətlər dedikdə qanunla nəzərdə tutulan qaydada əlavə ödəniş aparılmaqla şəxsin iş və ya yaşayış yerini, habelə olduğu yeri tərk etmədən xidmətlərdən yararlanması nəzərdə tutulur. Yəni, xidmətin həyata keçirilməsi üçün tələb edilən sənədlər və xidmətin nəticəsi olaraq şəxsə verilməli olan sənədlər onun yaşayış və ya iş yerində, habelə olduğu yerdə təhvil götürülə və təhvil verilə bilər
    Sosial həmrəyliyin təmin edilməsi məqsədi ilə səyyar xidmətlər kənardan qulluğa və yardıma ehtiyacı olan 1-ci qrup əlillər (tibbi-sosial ekspertiza komissiyasının arayışında göstərilməklə) və sağlamlıq imkanları məhdud uşaqlar  (Azərbaycan Respublikasının Nazirlər Kabinetinin 21 Aprel 2009-cü il tarixli 67 nömrəli qərarı ilə təsdiq edilmiş "Uşaqların sağlamlıq imkanları məhdudluğunun müəyyən olunması meyarlarına” əsasən)  üçün əlavə səyyar xidmət haqqı ödənilmədən həyata keçirilir. Bu günə qədər Sumqayıt regional "ASAN xidmət” mərkəzinin səyyar xidmətindən 1500-dən yuxarı  vətəndaş yararlanıb.
 
-         "ASAN xidmət” mərkəzində hansı sosial-mədəni tədbirlər və aksiyalar həyata keçirilir?
-         Sumqayıt regional "ASAN xidmət” mərkəzi yarandığı tarixdən bu günədək müxtəlif tədbirlər və sosial aksiyaların keçirilməsi ilə fəal məşğul olur. Bu işdə mərkəzdə fəaliyyət göstərən könüllülər fəal iştirak edirlər. Əlamətdar günlər, bayram günləri mərkəzin əməkdaşları və könüllüləri tərəfindən müxtəlif şəkildə qeyd olunur. Fəaliyyətdə olduğu 4 il ərzində Mərkəz tərəfindən bir sıra xeyriyyə tədbiri keçirilib. Eləcə də "Yaşıl ASAN” layihəsi çərçivəsində "Yaşıl Dağ” və "Hər vərəqi bir yarpağa dəyişək” sosial aksiyaları, "Sənədsiz məktəbli qalmasın” layihəsi, "Multikulturalizm” ilinə həsr olunan konsert-tədbiri, yazıçı-ədəbiyyatşünas Mir Cəlal Paşayevin həyat və yaradıcılığına həsr olunmuş tamaşa, "Teatr və onun tarixi”nə həsr olunan tamaşa-tədbir, müxtəlif illərdə Gənclər gününə həsr olunan sərgi, flaşmob və "Gəncliyin Səsi” festivalı çərçivəsində keçirilən konsert tədbirləri KİV-də işıqlandırılıb.
 
-         Bir az da AKT, ASAN Məktub, ASAN Kadr, Asan School və İdeya Bankının fəaliyyəti və sizin onlarda iştirakçılığınız haqqında danışardınız
-         Asan Könüllüləri Təşkilatı 2013-cü ildə yaradılıb. Yarandığı andan bütün "ASAN xidmət” mərkəzlərinin 1000-dən çox könüllüsünü sıx əlaqələrlə birləşdirən  bu təşkilatda Sumqayıt regional "ASAN xidmət” mərkəzinin könüllüləri də fəal iştirak edir. Təşkilatın həyata keçirdiyi əksər layihələrdə mərkəzimiz uğurla çıxış edib. Bunlardan "Könüllülər yurdu Azərbaycan” , Könüllülərin I və II Ümumrespublika Forumu, "Əsgərə məktub” layihəsi, Könüllülərin I Spartakiadası, Könüllülər Parlamenti və s. qeyd etmək olar. Eləcə də AKT-nin təşkilatçılığı ilə könüllülərin özünü inkişafına yönəlmiş mütəmadi təlim və seminarlar, yay məktəbləri, regionlara müxtəlif gəzintilər həyata keçirilir.
ASAN Məktub həssas qrupa məxsus uşaqlara sevinc bəxş etmək və cəmiyyətdə qayğı hissini artırmaq məqsədilə yaradılmış sosial layihədir. Bu layihənin məqsədi qədim xeyirxahlıq ənənələrinə malik olan ölkəmizdə əvəzsiz bir sosial fəaliyyətin başlanğıcını qoymaq heç bir maddi qazanc güdmədən uşaqlara sevinc yaşatmaq, üzlərinin gülməsinə səbəb olmaqdır. Belə ki, "ASAN məktub” layihəsi vasitəsi ilə respublika ərazisində yaşayan uşaq evlərinin, az təminatlı ailələrin və kənardan qulluğa ehtiyacı olan uşaqların arzuları həyata keçirilir. Bu layihə çərçivəsində bu günədək Sumqayıt regional "ASAN xidmət” mərkəzindən 42 ASAN qasid təyin olunub.
ASAN School-un missiyası Azərbaycanda könüllü fəaliyyətinin təkmilləşdirilməsindən və könüllülərin praktiki bilik və bacarıqlarının gücləndirilməsindən ibarətdir. Könüllülər Master 1 və Master 2 proqramı çərçivəsində könüllülük fəaliyyəti ilə məşğul olurlar.  "Master 1” çərçivəsində gənclər müxtəlif təlimlərdə iştirak edir və praktiki vərdişlər yiyələnirlər. Bununla yanaşı, gənclər arasında komandada iş bacarıqları formalaşdırılır. "Master 1” 8 həftə ərzində həyata keçirilir. Proqram çərçivəsində gənclərin fəaliyyəti xüsusi hazırlanan qiymətləndirmə qaydalarına əsasən qiymətləndirilir və yekunda proqram iştirakçıları 3 növ sertifikatdan birini və xasiyyətnamə əldə edirlər. "Master 2” pilləsi "ASAN School” könüllülük proqramının ikinci pilləsi olaraq könüllülük fəaliyyətinin təkmilləşdirilməsi məqsədi ilə ixtisas sahəsi üzrə təcrübə toplamaq istəyən könüllülər üçün Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi və tərəfdaş qurumun əməkdaşlığı nəticəsində həyata keçirilir.
"ASAN Kadr” Karyera mərkəzi çərçivəsində fəaliyyət göstərən vakansiya portalıdır. Karyera Mərkəzi "ASAN School” könüllülük proqramı tərəfindən ASAN Könüllülərinin peşəkar kadrlar kimi formalaşması məqsədi ilə yaradılıb. Qeyd edək ki, www.asankadr.az portalı 12 mart 2015-ci il tarixində Bərdə regional "ASAN xidmət” mərkəzinin açılışı zamanı Azərbaycan Respublikasının Prezidenti cənab İlham Əliyeva təqdim olunub.Sumqayıt regional "ASAN xidmət” mərkəzinin yüzlərlə məzun könüllüsü ASAN Kadr sayəsində işlə təmin olunub.
İdeya Bankı 2012-ci il 20 noyabr tarixində yaradılıb və ilk ideya bu tarixdə qəbul olunub. Bankın yaradılmasında ilkin məqsəd Dövlət Agentliyinin, o cümlədən "ASAN xidmət” mərkəzlərinin fəaliyyətinin təkmilləşdirilməsi üçün vətəndaşlardan ideyaların toplanması ilə bağlı olub.
2015-ci ildən Azərbaycan Respublikasının Təhsil Nazirliyi və Tələbə Qəbulu üzrə Dövlət Komissiyası İdeya Bankına qoşulub. Hazırda bütün mərkəzlərin könüllüləri və əməkdaşları İdeya Bankında qeydiyyatdan keçmiş və innovativ ideyalarını Bank vasitəsilə qeydiyyatdan keçirirlər. Sumqayıt regional "ASAN xidmət” mərkəzinin könüllülərinə "İdeya Bankı” və "Layihələrin hazırlanması-təqdimat bacarıqları” mövzusunda təlimlər keçirilir. Keçirilən ideya məclislərində mərkəzin könüllüləri uğurla iştirak ediblər.            
 
Elnarə Salamova

 

Xəbərdən istifadə edərkən istinad etmək vacibdir.