Köhnə istiqamətdə hərəkət edən 2 nömrəli marşrut xəttinin istifadə edən "Sənan-2012” Məhdud Məsuliyyətli Cəmiyyəti yenidən Xeberle.com redaksiyasına müraciət edərək öz şikayətlərini bildiriblər. Daha əvvəl hazırladığımız şikayətlə əlaqədar mətni sizə təqdim edirik: "Əvvəlki avtobusların hərəkətini tənzimləyən "Sənan 2012” MMC məsul şəxslərindən biri olan Rizvan Məmmədov ilə əlaqə saxladıq.

 

R.Məmmədov Xeberle.com-a bildirdi ki, köhnə avtobusların fəaliyyətinin dayandırılması "Sumqayıt Nəqliyyat” MMC-nin göstərişi əsasında olub: "Dünən günortadan sonra marşrut avtobuslarını xəttə buraxmışıq. Bizə təzyiq göstərilir ki, avtobusları xətdən yığışdıraq. Buna baxmayaraq yenə də avtobusları işlətməyə çalşırıq ki, ailəmizi dolandıraq. Çünki mənim özüm və bir nəfər şəhid ailəsi daxil olmaqla hamımız Qarabağ əlilləriyik, hər birimizin krediti və öhdəliyində olan ailəsi var. Buna görə də aldığımız təqaüd bizə bəs etmir. 1999-cu ildən bu xətti biz açmışıq. 2012-ci ildə Nəqliyyat Nazirliyi bildirdi ki, marşrut avtobusları yenisi ilə əvəz olunmalıdır və biz də yeni avtobuslar gətirərək qanuni "Sənan 2012” Məhdud Məsuliyyətli Cəmiyyətini yaratdıq. Hazırda 15 avtobus və 33 nəfər işçimiz var və onlar qanuni şəkildə, əmək müqaviləsi ilə fəaliyyət göstərirlər. Ayda 2800 AZN-ə yaxın dövlətə vergi ödəyirəm. 2016-cı ildə "Sumqayıt Nəqliyyat MMC” yaradıldı və bizi həmin quruma tabe etdilər. Oranın rəhbəri məni yanına çağırıb soruşdu ki, bizə nə qədər ödəniş edəcəksiniz?!

 

Cavab verdim ki, mən heç kimə rüşvət vermirəm, dövlətə vergi ödəyirəm və qanunun tələb etdiyi bütün öhdəliklərimi yerinə yetirirəm. Mənə dedi ki, ona əldə etdiyimiz gəlirin yarısını, yəni 10000 manat məbləğində pul ödəməliyəm. Hətta bunun üçün bizimlə müqavilə imzalamaq istədi, hansı ki, onun surəti məndə hələ də var. Bu, hansı qanunda var ki, biz qazandığımızın 50 faizini onlara ödəməliyik?! 2016-cı ilin sentyabr ayından etibarən bizdən 4000 manat məbləğində pul alırlar. 10 gün bundan qabaq isə fəaliyyətimizi tamamilə dayandırıblar. Özü də yazılı surətdə müraciət belə etmədən. Cənab Prezidentimiz daim sahibkarlara dəstək verir, onlar üçün pul ayırır. Mən Xannı Rüstəmov ("Sumqayıt Nəqliyyat” MMC-nin direktoru) müəllimə dəfələrlə müraciət etmişəm ki, siz hansı qanuna əsasən bizim qazancımızın yarısını istəyirsiz?! Biz Qarabağ əlilləriyik, şəhid ailəsiyik və bizdə o qazanc yoxdur, lap olsa belə, nəyə görə onu sizə verməliyik?! Deyir, mənim kefim belə istəyir”.

Barəsində səslənən ittihamlarla bağlı yenidən "Sumqayıt Nəqliyyat” MMC-nin direktoru Xannı Rüstəmovla əlaqə yaratmağa çalışsaq da, bu istəyimiz baş tutmadı.

 

Bundan başqa Sumqayıt Sərnişindaşıma İdarəsinin rəis müavini Məzahir Piriyev ilə əlaqə saxladıq. O bildirdi ki, şəhərə yeni avtobuslar gətirildiyi üçün bir neçə marşrut avtobusları yenisi ilə əvəz olunub: " Kiçiktutumlu avtobuslar böyük tutumlu avtobuslarla dəyişdirilib. Respublikanın bir çox regionlarında olduğu kimi, Sumqayıt şəhərində də bu kimi tədbirlər həyata keçirilir. "Sənan-2012” MMC-yə Sumqayıt-Müşfiqabad qəsəbəsi və 10 nömrə Stansiya Sumqayıt istiqamətlərində marşrut xəttinin istifadəsi təklif olunub. İki marşrut xətti birləşdirələrək onların istifadəsinə verilib. Biz birinci həmin şəxslərə 15 nömrəli marşrut xətti təklif etdik, lakin razılaşmadılar. Səbəb kimi Sumqayıt-Müşfiqabad qəsəbəsi istiqamətində gediş haqının çox olmasını göstərdilər. Mən, bu gün də təklif edirəm və sözümə də cavabdehəm ki, istər 15 nömrə, istərsə də digər "Mercedes” markalı kiçiktutumlu avtobuslardan ibarət marşrut xətləri olsun, hansında istəyirlərsə, işləsinlər. Çünki bizim də məqsədimiz köhnə marşrut avtobusların daha böyükləri ilə əvəz olunmasıdır”.

 

Qeyd edək ki, Xeberle.com olaraq uzun müddətdir əlaqə saxlamağa çalışdığımız, lakin buna hələ də müvəffəq olmadığımız "Sumqayıt Nəqliyyat” MMC-nin direktoru Xannı Rüstəmovun da mövqeyini dərc etməyə hazırıq.