Sumqayıtda yeni qazanxanaların tikintisinə nə vaxt başlanılacaq?
Sumqayıt şəhərinin müxtəlif məhəllə və mikrorayonlarında yerləşən SSRİ dövründən qalma köhnə istilik qazanxanalarının ətrafının natəmizliyi əhalinin şikayətləndiyi əsas məsələlərdən biri idi. Son günlərdə isə köhnə qazanxanaların ətrafında aparılan abadlıq və söküntü işləri əhalinin razılığı ilə yanaşı, yeni istilik qazanxanaların tikiləcəyi ümidini də oyadıb.
Məsələ ilə bağlı "Azəristiliktəchizat” ASC-nin "Sumqayıtistiliktəchizatı” İdarəsinin rəisi Avtandil Nuriyevlə əlaqə saxladıq. A.Nuriyev Xeberle.com-a bildirdi ki, Sumqayıtın hər bir tərəfində abadlıq işləri aparıldığı üçün hal-hazırda SSRİ dövründən qalan köhnə qazanxanaların ətrafında da abadlıq işləri aparılır. Buna səbəb isə qazanxana ətraflarının zibilliklərlə, it və pişiklə əhatə olunmasıdır.
"Yeni qazanxanaların tikintisi dövlət planında öz əksini tapıb. Orada qeyd olunub ki, 2018-ci ilə qədər Sumqayıt şəhərində istilik sistemlərinin tam tikilib təhvil verilməsi prosesi başa çatdırılmalıdır. Ancaq, 3 ildir ki, dövlət "Azəristiliktəchizat"a pul ayırmır. Yeni qazanxanalar isə dövlət investisiyası ilə tikilir. Dövlət nə vaxt ki, respublikanın hər bir yerində qazanxanaların tikilməsi üçün vəsait ayıracaq, o zaman da bu işlərə başlanılacaq".
A.Nuriyev qeyd etdi ki, Sumqayıt şəhərində qazanxanaların tikilməsi prosesi başa çatdığı zaman, əhali payız və qış aylarında fasiləsiz istilik sistemi ilə təmin oluna biləcək.
Hicranə İsmayılova
Xeberle.com
Xəbərdən istifadə edərkən istinad etmək vacibdir.
