Payız mövsümi yaxınlaşdıqca əhalinin istilik məsələləri ilə bağlı narahatlığı və qayğıları da artır.

Sumqayıtın ən böyük problemlərindən biri də mənzillərin əksəriyyətinin istliklə təchiz olunmamasıdır. Mövzunun aktuallığını nəzərə alaraq "Azəristiliktəchizat" ASC ilə əlaqə saxladıq. Qurumun abonent və müştəri xidmətlərinin rəisi Rafiq Əliyev Xeberle.com-a bildirdi ki, 2016-cı ildə Sumqayıtın 18-ci mikrorayon ərazisində böyük bir layihə həyata keçirdik: "Layihə çərçivəsində 24 binanı istilik ilə təmin edən qazanxana tikildi. Düzdür, bu il nəyinki Sumqayıta, Azərbaycanın heç bir bölgəsinə dövlət tərəfindən investisiya ayrılmayıb. Amma buna qədər, Sumqayıtda hər il bir qazanxanın tikintisi icra olunurdu. Hazırda şəhərdə 255-ə yaxın yaşayış binası istilik sistemi ilə təmin olunub. Məktəblər, bağçalar və səhiyyə orqanlarında demək olar ki, istiliklə bağlı problem yoxdur". R. Əliyevin sözlərinə görə, ötən il Sumqayıt şəhər 18-ci mikrorayon ərazisində qazanxana tikilib və həmin ərazidəki yaşayış binaları istilik sistemi ilə təchiz olunub: "Lakin digər yaşayış binalarının istilik sistemi ilə təmin olunması üçün yeni qazanaxanalar tikilməlidir. Binadaxili, mənzildaxili istilik sistemi yenidən qurulmalı və onların qaz, elektrik enerjisi, su ilə təchiz olunması ilə bağlı tədbirlər görülməlidir. Bunlar regionların sosial-iqtisadi inkişafına dair Dövlət Proqramı çərçivəsində növbəti mərhələlərdə icra olunacaq. Sumqayıt şəhərinin tam olaraq istilik sistemi ilə təmin olunması məsələsinə gəldikdə isə deyə bilərəm ki, bu, dövlət tərəfindən ayrılan investisiyadan asılıdır”.

  Xatırladaq ki, bir müddət bundan öncə Sumqayıtın tam şəkildə istiliklə təchiz edilməsinin 2018-ci ildə başa çatdırılacağı bildirilirdi.