HAŞİYƏ:Hacıyev Vüsal Vilayət oğlu 23 sentyabr 1985-ci ildə Füzuli rayonu Qoçəhmədli kəndində anadan olub. 2003-2009-cu illərdə Qafqaz Universitetinin Şərqşünaslıq fakültəsində təhsil alıb. Əmək fəaliyyətinə idman jurnalistikası ilə başlayıb və "Futbol plus” qəzetində işləyib. Bakı Futbol Klubunun media və marketinq departamentində çalışıb, daha sonra "Əlincə” futbol klubunun mətbuat xidmətinin rəhbəri olub. Ərəb dilini yaxşı bildiyinə görə bələdçilik peşəsini də seçib. Əsasən Birləşmiş Ərəb Əmirlikləri, Səudiyyə Ərəbistan, Qətər və Bəhreyndən olan turistlərə bələdçilik edir. Bələdçiliklə yanaşı, hazırda idman sahəsində fəaliyyətini də davam etdiri. "Ərgünəş” peşəkar idman klubunun idman direktorudur.
- Ərəb turistləri Azərbaycanda necə dincəlirlər? Yəni onların digər ölkələrdən gələn turistlərdən əsas fərqləri nədir?
- Turizm Universitetində bələdçilik üzrə oxuyub sertifikat əldə etdikdən sonra düşünürdüm ki, ərəblərə Azərbaycanın tarixi yerlərindən bəhs edərəm. Amma daha sonra gördüm ki, onların 80 faizinin belə şeylərə marağı yoxdur. Səhradan, quru iqlimi olan ərazilərdən gələn bu insanlar çay, yaşıllıq, təbiət, yeməklər və əyləncəyə daha meyillidirlər. 
- Əsasən hansı yerləri gəzməyi və görməyi üstün tuturlar?
- Azərbaycan turizmində ən çox gedilən region Qəbələdir. Bunun səbəbi orada otellərin, istirahət mərkəzlərinin, restoranların daha çox olmasıdır. Digər səbəb isə Azərbaycan turizminin döyünən ürəyi olan kanatın Qəbələdə yerləşməsidir.
-      Çay, şəlalə görəndə onlar çox sevinirlər. Azərbaycanın müsəlman ölkəsi olması və burada terror təhlükəsinin olmaması onlarda razılıq yaradır. Bəzən deyirlər ki, biz Gürcüstanda olmuşuq və oradakı insanların bizə qarşı olan münasibətindən heç razı qalmamışıq. Amma müsəlman olduğunuza görə sizdə mehribanlıq, səmimilik var. Məsələn, Qəbələyə gedəndə oranın sakinləri ilə çox rahat bir şəkildə dialoqa girə bilirlər. Hətta bizim camaatdan da onların sözlərini öyrənib ünsiyyətə meyil edənlər də olur. Narazılıq məsələsinə gəldikdə isə, ilk olaraq demək istəyirəm ki, Azərbaycan yeni turizm ölkəsi olduğu üçün, problemlər də çoxdur. Buna, sanitar qovşaqların olmamasını misal çəkərdim. Ayaqyolu daha çox yanacaqdoldurma məntəqələrində olduğundan, şəhərə gələn turistlər bu cəhətdən çətinlik yaşayırlar.  Bundan başqa, alverçiləri misal göstərmək olar ki, bu, həm bizim, həm də turistlərin narazı qaldığı bir haldır. Ola bilər ki, hardasa, necəsə öz millətinin nümayəndələrinə 5 manata satdığın ərzağı onlara 10 manata satasan, amma həmin ərzaq 50 manata satılanda biz bunun nə üçün belə olduğunu turistlərə izah edə bilmirik. Bu səbədən bəzən restoranlarda mübahisələr də yaşanıb. Amma biz istəməzdik ki, belə hallar yaşansın. Çünki bu, ölkəmizin imicinə mənfi təsir edir.
Daha bir problem ölkəmizin bəzi restoranlarında menyunun olmaması və ya menyunun olub qiymətin olmamasıdır. Müəyyən restoranlar var ki, onlar öz əməllərinə don geyindirirlər. Amma bu, heç də xoşagələn hal deyil. Azərbaycanın zəngin turizm potensialı var və ölkəyə turizm sektorundan gəlir gəlməsi üçün bu kimi problemlərin aradan qaldırılması lazımdır.
- İki il əvvəlki Azərbaycan turizmi ilə hazırkı vəziyyət arasında nə kimi fərqlər görürsünüz?
- 2 mövsümdür  bu sektorda fəaliyyət göstərən bələdçi kimi deyə bilərəm ki, artıq bayaq sadaladığım alverçilər məsələsində az da olsa, irəliləyiş müşahidə olunur. Otellərdəki xidmətlərlə bağlı da problem yoxdur. Amma qiymətlər baxımından qonşu Gürcüstan Azərbaycandan irəlidədir. Bizdə turizm sahəsində qiymətlər Gürcüstana nisbətən çox bahadır.
- Fikrinizcə, avropalıların daha çox Gürcüstana, ərəblərin isə Azərbaycana üz tutmasına səbəb nədir?
- Yəqin ki, bunda daha çox bizim müsəlman ölkəsi olmağımız rol oynayır. Çünki biz ərəblərlə söhbət etdikdə onlar deyirlər ki, sizin insanlarınızla ünsiyyətimiz daha yaxşı tutur. Məsələn, Bibiheybət məscidi Səudiyyə Ərəbistanından gələn şiələr üçün çox maraqlıdır. Bundan başqa, Seyid Həkimə xanımın məqbərəsini ərəblərin gəldikləri zaman ilk olaraq baş çəkdikləri yerlərdən biri kimi misal göstərmək olar. Hətta elə olur ki, ərəblər turun əvvəlində də, axırında da oraya baş çəkirlər.
- Onlar Sumqayıtı da gəzirlərmi?
- Sumqayıtı görsələr də, şəhərin içini gəzməyiblər. Əslində onlar üçün Sumqayıtın görməli yerlərinə gəzinti təşkil etmək olar. Amma hələ ki, bu, baş tutmayıb.
- Ərəb turistlərinin Azərbaycan mətbəxi ilə bağlı fikirləri necədir? Ən çox hansı yeməkləri bəyənirlər?
- Kababı çox sevirlər. Mən özüm onlara pitini, buğlamanı təklif edirəm. Dadları çox xoşlarına gəlir. Qəbələ və digər bölgələrdə onlara daşarası kabab, Şəkidə "Şəki halvası”, Qubada "Quba paxlavası” təklif edirik və yeməkləri çox bəyənirlər.

Xəbərdən istifadə edərkən istinad etmək vacibdir.