"Sumqayıt şəhər Dəmiryolu yük həyəti adlanan ərazidə 100-dən çox ailə yaşayır. Ailə tərkiblərinə nəzər yetirsək, hər bir evdə yaşlı, uşaq, xəstə var. Qış aylarında qarlı hava yolları bağlayır və qazın olmaması evlərdə yaşayış şəraitini çox aşağı salır. Artıq 4 ildir ki, aidiyyəti qurumlara müraciət edilsə də, yalnız qaz xəttinin çəkilməsi ilə bağlı icazə alına bilinib. Qeyd edim ki, 300-400 metr yaxınlıqda qaz xətti var.

 

Xahiş edirik ki, bizim qazla təchiz edilməyimizlə bağlı müvafiq qurumlar əməli tədbilər görsünlər."

Bu sözlər Sumqayıt şəhər Dəmiryolu yük həyəti ərazisində yaşayan Azər Qasımovun Xeberle.com-un elektron ünvanına göndərdiyi şikayətdə yer alıb.

Məsələ ilə bağlı Sumqayıt şəhər Qaz İstismar İdarəsinin baş mühəndisi Teymur Balıyevla əlaqə saxladıq. Baş mühəndis Xeberle.com-a bildirdi ki, həmin əraziyə qaz çəkilməsi hələ ki, planda yoxdur: "Ora yeni salınan yaşayış massividir və hələ qaz çəkilməsi planlaşdırılmayıb. Əgər ərazi sakinləri qaz çəkdirmək istəyirlərsə, bunu öz hesablarına edə bilərlər. Stansiya Sumqayıtda evlər tikilib ancaq, orada rabitə, kommunikasiya ümumiyyətlə, heç nə yoxdur. Buna görə də sözügedən əraziyə qaz çəkilməsi plana salınmayıb. Orada yaşayan sakinlər qaz xətləri çəkmək üçün ilk olaraq ASAN Xidmətə müraciət edib texniki şərt almalıdırlar. Sonra isə Podratçı təşkilatla danışıb, ödəniş edərək qaz çəkdirə bilərlər”.

 

Hicranə İsmayılova

Xeberle.com

 

 

 

 

 

 

 

 

 

Xəbərdən istifadə edərkən istinad etmək vacibdir.